شاسوار عه‌بدولواحید: خۆمان به به‌دیلی یه‌كێتی و پارتی ده‌زانین
وێستگه‌نیوز-
سه‌رۆكی جوڵانه‌وه‌ی نه‌وه‌ی نوێ له په‌یامێكدا كه ئاراسته‌ی یار و نه‌یاری كردووه، ده‌ڵێت: "ده‌زانم خه‌ڵكانێك به په‌یوه‌ندییه‌كانمان ئاوس بوون، به‌ڵام خۆمان به به‌دیلی یه‌كێتی و پارتی ده‌زانین".
شاسوار عه‌بدولواحید له په‌یامێكی ڤیدیۆییدا له‌ژێر ناوی پەیامێکی تایبەت بۆ یار و نەیار، ده‌ڵێت: "پێشتر سه‌ردانی توركیام كردووه و سه‌ردانیشی ده‌كه‌مه‌وه. ئه‌وانه‌شی زۆر پێیان ناخۆشه كام تاشه‌به‌رده زۆر زۆر گه‌وره‌یه سه‌ری خۆیان بده‌ن له‌وه".
ده‌شڵێت: "ئێمه هێزێكی مه‌ده‌نین. خۆمان به به‌دیلی یه‌كێتی و پارتی ده‌زانین و چاكیش ده‌زانم یه‌كێتی و پارتی كوێیان دێشێ و چاكیش ده‌زانم به‌م په‌یوه‌ندییانه‌ی ئێمه ئاوس بوون".
ئاماژه‌شی به‌وه‌داوه كه "توركیا وڵاتێكی زۆر زۆر گرنگی ناوچه‌كه‌یه، هه‌روه‌ك چۆن ئێرانیش وڵاتێكی گرنگه و ئێستا په‌یوه‌ندییه‌كی باشمان له‌گه‌ڵ هه‌موو لایه‌كدا هه‌یه".
ئه‌وه‌شی خسته‌ڕوو كه "موهیمی نه‌وه‌ی نوێ ئه‌وه‌یه كه په‌یوه‌ندی له‌گه‌ڵ هه‌موو لایه‌كدا هه‌یه و خۆمان به به‌دیلی یه‌كێتی و پارتی ده‌زانین و ساحه‌كه‌یان بۆ چۆڵ ناكه‌ین".
شاسوار عه‌بدولواحید جه‌خت له‌وه ده‌كاته‌وه كه "ئێمه ئه‌و حزبه بچووك و شاگردانه نین دانیشتوون بۆ خۆیان له هه‌ولێر و سلێمانی بۆڵه‌بۆڵ ده‌كه‌ن و دوای یه‌كێتی و پارتی كه‌وتوون و له‌ژێره‌وه پاره‌یان لێوه‌رده‌گرن. به‌ڵێ به شانازییه‌وه په‌یوه‌ندییه‌كی باشمان هه‌یه و له‌گه‌ڵ وڵاتانیش دروستی ده‌كه‌ین و له داهاتووشدا سه‌ردانی توركیا ده‌كه‌مه‌وه".
باس له‌وه‌ش ده‌كات كه "ئێمه نه جاشایه‌تی بۆ وڵاتان ده‌كه‌ین، نه هێزی چه‌كدارمان هه‌یه، نه‌ده‌توانین كه‌س بكوژین، نه‌ده‌توانین كه‌س بده‌ین به كوشت، هێزێكی مه‌ده‌نین. نه‌وه‌ی نوێ یه‌كێكه له هێزه كاریگه‌ره‌كانی هه‌رێم و 15 كورسی هه‌یه، هه‌موو وڵاتان به گرنگییه‌وه لێی ده‌ڕوانن".
له كۆتایی په‌یامه‌كه‌یدا سه‌رۆكی جوڵانه‌وه‌ی نه‌وه‌ی نوێ رایگه‌یاندووه كه "شته بچووكه‌كانی تریش كه دوای پارتی و یه‌كێتی كه‌وتوون و ده‌زانم كوێیان دێشێت، چی ده‌كه‌ن با بیكه‌ن".
PM:06:47:11/01/2025
ئه‌م بابه‌ته 1664
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت