له كه‌ركوك رووبه‌ڕووبوونه‌وه له‌نێوان هێزه ئه‌منییه‌كان و بازرگانانی مادده‌ی هۆشبه‌ر روویدا
وێستگه‌نیوز-
له شاری كه‌ركوك رووبه‌ڕووبوونه‌وه له‌نێوان هێزه ئه‌منییه‌كان و دوو بازرگانی مادده‌ی هۆشبه‌ردا روویدا و به‌پێی زانیارییه‌كان دوو تۆمه‌تبار به برینداری ده‌ستگیركران.
به‌پێی ئه‌و زانیارییانه‌ی به وێستگه گه‌یشتووه، ئه‌مشه‌و له گه‌ڕه‌كی شۆراوی كه‌ركوك له كاتی هه‌وڵدان بۆ ده‌ستگیركردنی دوو بازرگانی مادده‌ی هۆشبه‌ر رووبه‌ڕووبوونه‌وه و شه‌ڕه‌ته‌قه له‌نێوان هێزه ئه‌منییه‌كان و ئه‌و دوو بازرگانه‌دا رویدا.
سه‌رچاوه‌یه‌ك له هێزه‌كانی ئاسایشی نیشتمانی عیراق رایگه‌یاند كه دوو بازرگانه‌كه رووبه‌ڕووی هێزه ئه‌منییه‌كان بوونه‌ته‌وه و ته‌قه‌یان كردووه.
سه‌رچاوه‌كه ده‌ڵێت: "له ئه‌نجامی رووبه‌ڕووبوونه‌وه‌كه‌دا دوو بازرگانه‌كه و كارمه‌ندێكی هێزه‌ئه‌منییه‌كانیش برینداربوون".
راشیگه‌یاند كه "دوو تۆمه‌تباره‌كه به برینداری ده‌ستگیركران و بۆ چاره‌سه‌ر ره‌وانه‌ی نه‌خۆشخانه‌كران، لێكۆڵینه‌وه‌ش له روداوه‌كه ده‌ستیپێكردووه و دۆخی گه‌ڕه‌كه‌كه‌ش ئاسایی بووه‌ته‌وه".
PM:08:27:08/01/2025
ئه‌م بابه‌ته 696
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت