یەکگرتوو لەبارەی دوورخستنەوەی بەشێک لە ئەندامانی روونکردنەوە دەدات

وێستگەنیوز-

یەکگرتووی ئیسلامی کوردستان لەبارەی دوورخستنەوەی بەشێک لە ئەندامانی حزبەکەی روونکردنەوەیەکی بڵاوکردەوە.

سەرۆکی لیژنەی هەڵبژاردنی ئەندامانی کۆنگرەی نۆیەمی یەکگرتووی ئیسلامیی کوردستان رایگەیاند، ماوەی دووساڵە داخوازیەک هەیە لە لایەن کادرو رێکخستنەکانی یەکگرتووی ئیسلامیی کوردستان، لەبارەی پێویستی بوونی ڕێوشوێنی لائیحی سەبارەت بە کەمتەرخەمی و پابەند نەبوون بە ئەرکەکانی حیزب و ئۆرگانەکان بۆ کۆنگرەی نۆیەم، لەم ڕوانگەوە ئەنجومەنی جێبەجێکردن بڕیاریدا سێ پێوەر هەبێت بۆ ئەندامیتی کۆنگرە وەک سەرەتاییترین ئەرکی ئەندام:

1- پابەندبوون بە بەشداریکردن لە ئیشتراکات و ئابوونە.

2- پابەندبوون بە ئاڕاستەو مەنهەج لە لێدوان و کاردا.

3- پابەندبوون بە ئامادەبوون لە کۆبونەوەکان.

ئاماژە بەوەکراوە، "لێرەوە ئەو بەڕێزانەی پابەندیان نەبووە بەو سێ خاڵەی سەرەوە، مافی ئەندامێتی کۆنگرەیان نابێت، ئەمەش واتای دورخستنەوەیان نیە لە حیزب، هەروەک بەشداری نەکردن لە کۆنگرەش کارێکی لائیحی و ئاساییەو سەدان کادری باڵا و خاوەن فەزڵ بە هۆی سنوردار بونی ئەندامانی کۆنگرەوە، بە لائیحەو هەلبژاردنیش بەشدار نابن لە کۆنگرەو زۆر بە ئاسایی مامەڵەیان لەگەڵ کردووە".

ئەوەشخراوەتەڕوو، "بەداخەوە کەسانێک دەیانەوێت لێکدانەوەی هەڵە بۆ ئەو حاڵەتە بکەن و بەمەبەست یان بە نەزانی خۆیان، سوشیال میدیایان سەرقال کردوە، ئێمە هەموو لایەک دلنیا دەکەینەوە کە هەنگاوەکانی کۆنگرە بە شێوازێکی سروشتی کارەکانی خۆی دەکات، بەڕێوەچوونی سەرکەوتووانەی کۆنگرەش ئامانجی هەموو یەکگرتوەکانە".

PM:06:43:21/12/2024

ئه‌م بابه‌ته 6168 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت