ئەمشەو پرۆسەی سەرژمێری کۆتایی دێت

وێستگەنیوز-

وەزارەتی پلاندانانی حکومەتی هەرێمی کوردستان، راگەیەنراوێکی لەبارەی کۆتاییهاتنی پرۆسەی سەرژمێری گشتیی دانیشتووان لە عێراق و هەرێم بڵاوکردەوە.

ئەمشەو شەممە 14ی کانونی یەکەمی 2024، وەزارەتی پلاندانانی حکومەتی هەرێمی کوردستان رایگەیاند، "سەرەرای بوونی ئاستەنگی دارایی، تەکنیکی و هونەری، کەمی کات بۆ ئامادەکاری و جێبەجێکردنی پرۆسەی سەرژمێری گشتیی دانیشتووان لە هەرێم و ناوچە کورستانییەکانی دەرەوەی ئیدارەی هەرێم، دواجار توانرا ئەم پرۆسە گەورە و گرنگە بە باشترین شێوە بەڕێوەبچێت".

ئاماژە بەوەشکراوە، "جێگەی خۆیەتی ئاماژە بە رۆڵ و کاریگەری مامۆستایانی پەروەردە و گەنجانی بژمێر بکەین کە جێدەستیان دیاربوو لە سەرخستنی پرۆسەکە".

دەقی راگەیەندراوەکەی وەزارەتی پلاندانانی هەرێمی کوردستان...

ئەمشەو کاتژمێر ۱۲ کۆتایی بە پرۆسەی سەرژمێری گشتی دانیشتوان و ئاڤاهییا لە عێراق و هەرێمی کوردستان دێت .

سەرەرای بوونی ئاستەنگی دارایی، تەکنیکی و هونەری، کەمی کات لەبەردەممان، بۆ ئامادەکاری و جێبەجێکردنی پرۆسەی سەرژمێری گشتیی دانیشتووان لە هەرێم و ناوچە کورستانیەکانی دەرەوەی ئیدارەی هەرێم، دواجار توانرا ئەم پرۆسە گەورە و گرنگە بە باشترین شێوە بەڕێوەبچێت، ئەویش بە پاڵپشتی و پشتگیری بەڕێزان، سەرۆکی حکومەتی هەرێمی کوردستان و جێگری سەرۆکی حکومەت و وەزیرە بەڕێزەکان و دامودەزگاکانی تر لە حکومەتی هەرێم، هەروەها سوپاسی هەوڵ وماندووبوونی سەرۆکی دەستەی ناوچە کوردستانییەکانی دەرەوەی ئیدارەی هەرێم و سەرجەم فەرمانبەرانی ئەو دەستەیە دەکەین.

هەر بەم بۆنەیەوە، بە پێویستی دەزانین سوپاسی فەخامەتی سەرۆک کۆماری عێراق و جێگری سەرۆکی پەرلەمان و وەزیرە بەڕێزەکان و فراکسیۆنە کوردستانیەکان بکەین کە هاوکارو پشتیوان بوون لە میانەی گفتوگۆکانمان لەگەڵ حکومەتی عێراق لەسەر ئەنجامدانی پرۆسەکە لە ناوچە کوردستانیەکانی دەرەوەی ئیدارەی هەرێم بە جێبەجێکردن و بە بەستنەوەی بە ئەنجامی سەرژمێری ١٩٥٧ کە بنەمای سەرەکی رێکەوتن بوو لەگەڵ حکومەتی فیدراڵ بۆ ئەنجامدانی سەرژمێری.

جێگەی خۆیەتی ئاماژە بە ڕۆڵ و کاریگەری مامۆستایانی پەروەردە و گەنجانی بژمێر بکەین کە جێدەستیان دیاربوو لە سەرخستنی پرۆسەکە.

سوپاسی لیژنەی باڵا و ژووری عەمەلیاتی سەرژمێری لە پارێزگاکان وئیدارەکان دەکەین بۆ پێشکەشکردنی ئاسانکاری و پاڵپشتیکردنی پرۆسەکە تاکو گەیشتین بە ئەنجام.

سوپاس و پێزانینی زۆرمان بۆ ڕۆڵی میدیاکاران و کەناڵەکانی راگەیاندن هەیە، کە لەسەرەتایی پرۆسەکەوە هاوکار و پشتیوانی ئێمە بوون لە هۆشیارکردنەوە و گەیاندنی زانیاری بە هاووڵاتیانمان.

لە کۆتایدا، سوپاسی بێ پایانمان هەیە بۆ تەواوی فەرمانبەران لە دەستەی ئامار و بەڕێوەبەرایەتییەکان لە پارێزگاکان و ئیدارە سەربەخۆکان کە ماندونەناسانە شەو و رۆژیان خستەسەر یەک و زاڵ بوون بەسەر ئاستەنگەکان وتوانییان نموونەی جوانی کاری بە تیم و ڕۆحیەتی نیشتیمان پەروەرانە کارەکان ئەنجامبدەن.

وەزارەتی پلاندانانی حکومەتی هەرێمی کوردستان

۱٤ـ۱۲ـ۲۰۲٤

PM:08:15:14/12/2024

ئه‌م بابه‌ته 436 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت