مه‌زڵوم عه‌بدی: 250 هه‌زار كورد له حه‌له‌ب له مه‌ترسیدان
وێستگه‌نیوز-
فه‌رمانده‌ی گشتی هێزه‌كانی سوریای دیموكرات "هه‌سه‌ده" رایگه‌یاند كه رێكخراوی تیرۆریستی داعش ده‌ستی به هێرشكردووه، ده‌شڵێت: "250 هه‌زار كورد له حه‌له‌ب له مه‌ترسیدان و به‌رگرییان لێده‌كه‌ین".
ئه‌مڕۆ هه‌ینی مه‌زڵوم عه‌بدی فه‌رمانده‌ی گشتی هێزه‌كانی سوریای دیموكرات "هه‌سه‌ده" له كۆنگره‌یه‌كی رۆژنامه‌وانیدا له‌باره‌ی رووداوه‌كانی سوریا وتی: "ده‌مانه‌وێت كێشه‌كانمان له‌گه‌ڵ توركیا به دیالۆگ چاره‌سه‌ر بكه‌ین".
وتیشی: "250 هه‌زار كورد له حه‌له‌ب له مه‌ترسیدان و به‌رگری له دانیشتوانی گه‌ڕه‌كه‌كانی ئه‌شره‌فیه و شێخ مه‌قسود ده‌كه‌ین".
ئاماژه‌شی به‌وه‌دا كه "داعش ده‌ستی به هێرش كردووه و له نزیك كه‌مپی هۆل هێرشی كردووه و بۆ رووبه‌ڕوبوونه‌وه‌ی له‌گه‌ڵ هاوپه‌یمانی نێوده‌وڵه‌تی له په‌یوه‌ندیداین".
فه‌رمانده‌ی گشتی هێزه‌كانی سوریای دیموكرات باسی له‌وه‌ش كرد كه "په‌یوه‌ندیمان له‌گه‌ڵ ده‌سته‌ی ته‌حریری شامدا هه‌یه و بڕیارمان نه‌داوه له دژیان بجه‌نگین".
فه‌رمانده‌ی گشتی هه‌سه‌ده روونیشیكرده‌وه كه "به هاوكاری ئه‌مریكا ئاواره‌كانی شه‌هبامان رزگار كرد و ئاماده‌ین به‌شداری له دیالۆگی چاره‌سه‌ری سوریا بكه‌ین".
راشیگه‌یاند كه "هاوئاهه‌نگیمان له‌گه‌ڵ عێراق و سوریا هه‌یه سه‌باره‌ت به دواگۆڕانكارییه‌كانی سوریا".
ئه‌مه‌ش له‌كاتێكدایه كه له چه‌ند رۆژی رابردوودا ده‌سته‌ی ته‌حریری شام و گرووپه چه‌كداره‌كانی تری لایه‌نگری توركیا، هێرشیان بۆ سه‌ر ناوچه‌كانی ژێر ده‌سه‌ڵاتی حكومه‌تی سوریا ده‌ستپێكرد و تا ئێستا شاره‌كانی حه‌له‌ب و حه‌مایان كۆنترۆڵ كردووه و به‌ره‌و شاری حومس پێشڕه‌وی ده‌كه‌ن.
PM:12:53:06/12/2024
ئه‌م بابه‌ته 1280
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت