ئەنجوومەنی وەزیرانی عێراق: نابێت ئەنجامی سەرژمێریی لە ناوچەکانی ماددەی 140 بڵاوبکرێتەوە
وێستگەنیوز_
ئەمڕۆ سێشەممە 12ـی تشرینی دووەمی 2024، ئەنجوومەنی وەزیرانی عێراق بە سەرۆکایەتی محەممەد شیاع سوودانی کۆبووەوە. ئەنجوومەنی وەزیرانی عێراق بڕیاری دا، ئەنجامی سەرژمێریی لە ناوچەکانی ماددەی 140 بڵاونەکرێتەوە.
لە کۆبوونەوەکەدا بڕیار درا، ئەنجامی سەرژمێریی لە ناوچەکانی ماددەی 140 بڵاو نەکرێتەوە، تا ئەو کاتەی ئەو لێژنەیەی کە پێکهێنراوە بۆ بەراوردکردنی داتا و زانیاری هاوڵاتیانی ئەو ناوچانە بە سەرژمێری ساڵی 1957 دەکرێت، پاشان ئەنجامی سەرژمێری ئەو ناوچانە بڵاو دەکرێتەوە.
بڕیارە رۆژی 20ـی تشرینی دووەمی ئەم ساڵ سەرژمێریی گشتی لە عێراق، هەرێمی کوردستان و ناوچە دابڕاوەکان بکرێت.
بە پێی پێشبینییەکانی وەزارەتی پلاندانانی عێراق، ژمارەی دانیشتووانی ئەو وڵاتە تاوەکو ساڵی 2030 دەگاتە نزیکەی 51 ملیۆن و 500 هەزار کەس.
لە سه‌رژمێری ساڵی 1957ـی عێراق، ژماره‌ی دانیشتووانی عێراق بریتی بووە لە شەش ملیۆن و 538 هەزار و 199 کەس و کە کورد رێژەی 16%ـی پێکهێناوە و عەرەبیش بە شیعە و سووننەوە رێژەی 80%ـی دانیشتووان و تورکمان رێژەی 2%ـی دانیشتووانی عێراقیان پێکهێناوە.
ژمارەی عەرەب لە عێراق بە شیعە و سووننەوە، پێنج ملیۆن و 18 هەزار و 262 کەس بووە و ژمارەی کوردیش ملیۆنێک و 42 هەزار و 774 کەس و تورکمانیش 136 هەزار و 806 کەس و كریستیانه‌كانیش ژمارەیان 206 هەزار و 202 کەس بووە لە ئاماری سەرژمێری ساڵی 1957.
لە سەرژمێری ساڵی 1957ـدا، دابه‌شبوونی دانیشتووان له كه‌ركووك، کورد زۆرینە بووە بە 187 هەزار و 593 کەس و عەرەبیش 109 هەزار و 620 کەس و تورکمانیش 83 هەزار و 371 کەس و کریستیانەکانیش ژمارەیان بە هەزار و 605 کەس.
PM:09:01:12/11/2024
ئه‌م بابه‌ته 644
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت