به‌راورد به دوو هه‌ڵبژاردنی رابردوو، ده‌نگه‌كانی یه‌كێتی به‌شێوه‌یه‌كی به‌رچاو زیادیكردووه
وێستگه‌نیوز-
به‌راورد به دوو هه‌ڵبژاردنی پێشوو، ده‌نگه‌كانی یه‌كێتیی نیشتمانیی كوردستان له‌م هه‌ڵبژاردنه‌دا به‌شێوه‌یه‌كی به‌رچاو زیادیكردووه و متمانه‌ی ژماره‌یه‌كی زۆری ده‌نگده‌رانی هه‌رێمی به‌ده‌ست هێناوه.
به‌پێی سه‌دا 95ی دەنگەکانی هه‌ڵبژاردنی په‌رله‌مانی كوردستان كه دوێنێ به‌ڕێوه‌چوو، له ده‌نگدانی گشتیدا یه‌كێتی 355 هه‌زار ده‌نگی به‌ده‌ستهێناوه و له ده‌نگدانی تایبه‌تیشدا 65 هه‌زار ده‌نگی به‌ده‌ستهێناوه، كه تێكڕا 420 هه‌زار ده‌نگ ده‌كات.
ئه‌مه له كاتێكدایه كه له هه‌ڵبژاردنی ئەنجومەنی نوێنەرانی عێراق کە لە 2021/10/10 بە ڕێوەچوو، لەسەر ئاستی سێ پارێزگاکەی هەرێمی کوردستان، یه‌كێتیی نیشتمانیی كوردستان توانی تەنها (215 هەزارو 316) دەنگ بەدەستبهێنێت.
هه‌روه‌ك له هه‌ڵبژاردنی خولی پێنجه‌می په‌رله‌مانی كوردستان كه له 2018/9/30 به‌ڕێوه‌چوو، یه‌كێتیی نیشنمانیی كوردستان توانی (319 هه‌زار و 912) ده‌نگ به‌ده‌ست بهێنێت.
ئه‌مه‌ش ئه‌و راستییه ده‌رده‌خات كه یه‌كێتیی نیشتمانیی كوردستان له‌م هه‌ڵبژاردنه‌دا توانیویه‌تی متمانه‌ی زۆری هاوڵاتیان و ده‌نگده‌ران به‌ده‌ست بهێنێته‌وه و به‌هێزه‌وه بگه‌ڕێته‌وه گۆڕه‌پانی سیاسی هه‌رێمی كوردستان و عێراق.
AM:09:52:21/10/2024
ئه‌م بابه‌ته 4620
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت