ئاگره‌كه‌ی قه‌ڵادزێ كۆنترۆڵ كرا و 4 كه‌س به تۆمه‌تی سووتاندنی ده‌ستگیركران
وێستگه‌نیوز-
دوای چه‌ند كاتژمێرێك له كه‌وتنه‌وه‌ی، ئاگره‌كه‌ی دارستانی قه‌ڵادزێ كۆنترۆڵ كرا و چوار كه‌سیش به تۆمه‌تی كردنه‌وه‌ی ئاگره‌كه، ده‌ستگیر كراون.
ئێواره‌ی ئه‌مڕۆ به‌هه‌وڵی تیمه‌كانی به‌رگری شارستانی و دانیشتوانی سنووره‌كه، توانرا ئاگره‌كه‌ی دارستانی قه‌ڵادزێ كۆنترۆڵ بكرێت.
لای خۆیه‌وه ئیسماعیل ته‌ها به‌ڕێوه‌به‌ری دارستان و پاوانی ڕاپه‌رین بۆ كوردستان24 ئاشكرایكرد كه "به تۆمه‌تی سووتاندنی دارستانی قه‌ڵادزێ، چواركه‌س ده‌ستگیركراون".
وتیشی: "له گرته‌یه‌كی ڤیدیۆییدا ده‌ركه‌وتووه، چواركه‌س ئاگره‌كه‌ی دارستانی قه‌ڵادزێ ده‌كه‌نه‌وه و ده‌یسوتێنن".
ئاماژه‌شی به‌وه‌دا كه "به‌هۆی ئاگره‌كه‌وه زیاتر له سێ هه‌زار دار سنه‌وبه‌ری دارستانه‌كه سووتاون و زیانیان پێگه‌یشتووه".
پێشتریش به‌كر بایز، قایمقامی قه‌زای پشده‌ر رایگه‌یاندبوو كه "له دارستانی قه‌ڵادزێ ئاگركه‌وتووه‌ته‌وه و به‌هۆی ره‌شه‌باوه ئاگره‌كه له‌كۆنترۆڵ ده‌رچووه"، داواشی له‌و هاوڵاتیانه‌ش كرد كه خاوه‌نی تانكی ئاون به‌هانای تیمه‌كانی به‌رگریی شارستانی بچن و به هه‌ر جۆرێك له توانایاندایه هاوكاری تیمه‌كان بكه‌ن بۆ كۆنترۆڵكردنی ئاگره‌كه.
به‌ره‌به‌یانی ئه‌مڕۆش ئاگرێكی گه‌وره له شاخی گۆیژه كه‌وته‌وه، دواتر له چیای ئه‌زمه‌ڕ و ئه‌مشه‌ویش له نزیك گوندی ته‌گه‌رانی سنووری شارباژێڕ ئاگر كه‌وته‌وه و زیانێكی زۆر به دارستان و سروشتی ناوچه‌كه كه‌وت.
PM:11:55:29/07/2024
ئه‌م بابه‌ته 1104
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت