محه‌مه‌د حاجی مه‌حمود: بڕیارە ناڕەواكەی دادگای فیدراڵی لێدانی بزمارە لە تابوتی قەوارەی هه‌رێم
محه‌مه‌دی حاجی مه‌حمود
وێستگه‌نیوزـ
محەمەد حاجی مەحمود، سەرۆكی پارتی سۆسیال دیموكراتی كوردستان بڕیارەكانی دادگای فیدراڵی سەبارەت بە مووچەو هەڵبژاردن بە بڕیارێكی ناڕەوا لە دژی قەوارەی هەرێمی كوردستان ناودەبات و دەڵێت: "لێدانی بزمارە لە تابوتی قەوارەی سیاسی هەرێمی كوردستان".
محه‌مه‌دی حاجی مه‌حمود، له راگه‌یه‌ندراوێكدا باسی له‌وه‌كرد: "بڕیارەكەی دادگای بەغدا لە 21ی شوباتی 2024، لەسەر مووچەو بودجەو هەڵبژاردنی پەرلەمانی كوردستان و پەراوێزەكانی، بڕیارێكی سیاسی و پڕ لە رقوكینەبوو دژ بە هەرێمی كوردستان و قەوارەی سیاسی هەرێم و گەلی كورد و دژی دیموكراسی و مافی كەمایەتی و دەستخستنە ناو دام و دەزگاكانی هەرێمی كوردستانە.
ئه‌وه‌شی وتووه: پەرلەمانی كوردستانی كەمتر لە دەسەڵاتەكانی مەجلیسی تەشریعییەكەی بەعسی عێراق و مەنتیقەی حوكمی داناوە.
باسی له‌وه‌شكردووه: هەڵوەشاندنەوەی كۆمسیۆنی هەڵبژاردنەكانی كوردستان خەنجەرێكی ژەهراویە لە پشتی كورد و قەوارەی سیاسی كوردستانی داوە.
ده‌شڵێت: "هەڵوەشاندنەوەی 11 كورسی پێكهاتەكان سەربڕینی دیموكراتی و مافی كەمایەتییەكانی كوردستانە".
ئه‌وه‌شی باسكردووه: رادەستكردنی داهاتی نەوتی و نانەوتی بە بەغدا وشكردنی سەرچاوەی داهاتی هەرێم و پاڕانەوەو دەستپانكردنەوەیە لە بەغدا و بە زەلیلی.
محه‌مه‌دی حاجی مه‌حمود ده‌شڵێت: بەهیچ شێوەیە ناونەهێنانی وەزارەتی دارایی هەرێم و هەر فەرمانگەیەكی هەرێم راستەوخۆ لەگەڵ بەغدا هەڵوەشاندنەوەی قەوارەی سیاسی هەرێمی كوردستانە، بۆیە قبوڵكردنی ئەم بڕیارە ناڕەوایە لێدانی بزمارە لە تابوتی قەوارەی سیاسی كوردستان.
بەشێک لە بڕیارەکانی دادگای فیدراڵی لەبارەی هەڵبژاردنی پەرلەمانی کوردستان:
1. کۆمسیۆنی باڵای سەربەخۆی هەڵبژاردنەکانی عێراق ئەرکی بەڕێوەبردن و سەرپەرشتیکردنی خولی شەشەمی هەڵبژاردنی پەرلەمانی کوردستان لە جێگەی کۆمیسیۆنی راپرسی و هەڵبژاردنی هەرێمی کوردستان دەگرێتە ئەستۆ.
2. بۆ خولی شەشەمی هەڵبژاردنی پەرلەمانی کوردستان؛ هەرێمی کوردستان بەسەر چوار بازنەی هەڵبژاردندا دابەش دەکرێت.
3. ژمارەی کورسی کوتاکان کە 11 کورسین هەڵدەوەشێندرێنەوە و نادەستوورین؛ بەو پێیەش کۆی ژمارەی کورسی پەرلەمانی کوردستان لە 111 کورسییەوە دەکرێنە 100 کورسی.
بڕیارەکانی دادگای فیدراڵی لەبارەی مووچەی فەرمانبەرانی هەرێمی کوردستان:
1. دەبێت بە پێی ماددەی 116 و 117 دەستووری عێراق؛ یەکسانی هەبێت لە دابەشکردنی داهاتی سەروەت و سامانیی گشتی و نابێت ستەم لە مووچەخۆرانی هەرێمی کوردستان بکرێت.
2. دەبێت هەردوو حکومەتی عێراق و هەرێمی کوردستان کار بۆ ئەوە بکەن کە مووچەی فەرمانبەر و مووچەخۆرانی هەرێمی کوردستان لە کاتی خۆی دابەش بکرێت.
3. دەبێت هەردوو حکومەتی عێراق و هەرێمی کوردستان پابەندی یاسایی بودجەی گشتیی فیدراڵی بن بۆ پێدانی شایستە داراییەکان و مووچەی فەرمانبەرانی هەرێمی کوردستان.
AM:09:58:22/02/2024
ئه‌م بابه‌ته 1988
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت