خه‌زعه‌لی له‌سه‌ر هێرشه‌كه‌ی سلێمانی هاته ده‌نگ: پێشێلكردنی روونی سه‌روه‌ریی عێراقه
وێستگه نیوزـ
سه‌رۆكی عه‌سائیبی ئه‌هلی حه‌ق له‌سه‌ر بۆردومانكردنی فڕۆكه‌خانه‌ی كشتوكاڵی له ناحیه‌ی عه‌ربه‌تی سه‌ربه پارێزگای سلێمانی هاته ده‌نگ و به پێشێلكردنی روونی سه‌روه‌ریی خاكی عێراقی له‌قه‌ڵه‌مدا.
له هه‌ژماری تایبه‌تیی خۆی له تۆڕی كۆمه‌ڵایه‌تیی ئێكس، قه‌یس خه‌زعه‌لی، سه‌رۆكی عه‌سائیبی ئه‌هلی حه‌ق، كه گروپێكی چه‌كداری شیعه‌ی عێراقه، رایگه‌یاند: سه‌روه‌ریی عێراق و به‌رگریكردن لێی، یه‌كێكه له‌و بنه‌ما جێگیرانه‌ی كه سازشی له‌سه‌ر ناكرێت.
وتیشی: ئه‌وه‌ی له فڕۆكه‌خانه‌ی عەربەت له سلێمانی روویدا، پێشێلكردنی روونی سه‌روه‌ریی عێراقه و ده‌بێت حكومه‌ت و هێزه سیاسییه‌كان یه‌كڕیز بن بۆ راگرتنی ئه‌و پێشێلكارییانه كه دووباره ده‌بنه‌وه.
هه‌ر له راگه‌یه‌ندراوه‌كه‌دا خه‌زعه‌لی سه‌ره‌خۆشیی له كه‌سوكاری شه‌هیده‌كان و هیوای چاكبونه‌وه‌شی بۆ برینداره‌كان خواستوه.
ئه‌وه‌ش له‌كاتێكدایه كه دوانیوه‌ڕۆی ئه‌مڕۆ دووشه‌ممه 18ی ئه‌یلولی 2023، به فڕۆكه‌ی بێفڕۆكه‌وان هێرشكرایه‌سەر فرۆکەخانەی کشتوکاڵیی عەربەت لە سلێمانی و به‌هۆیه‌وه سێ كارمه‌ند لە هێزەکانی دژەتیرۆری کوردستانی (یه‌كێتی) شەهید بوون و سیانی دیكه‌ش بریندار بوون .
PM:10:06:18/09/2023
ئه‌م بابه‌ته 16176
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت