نوسینگەی راگەیاندنی سەرۆکایەتی کۆماری عێراق ئەمڕۆ دووشەممە 28-2-2022 لەراگەیەنراوێکدا باسی لەوەشکردوە، د.بەرهەم ساڵح سەرۆک کۆماری عێراق فەرمانیکرد هەردوو مەرسومی کۆماری ژمارە 1 و 2 هەڵبوەشێنرێنەوە، هەروەها لیژنەی لێکۆڵینەوە تایبەت بە دەرکردنی هەردوو مەرسومەکە بەپەلە کۆببێتەوە.
ئاماژە بەوەشکراوە، سەرۆک کۆمار داواشی لە دەسەڵاتی دادوەری کردووە رێکاری یاسایی پێویست بگرێتەبەر دوای کشاندنەوەی هەردوو مەرسومەکە، هەروەها داوا لە هەردو وەزارەتی داد و ناوخۆ کراوە فەرمانی دەستگیرکردنەوە بۆ ئەو تۆمەتبارە دەربکات کە بەگوێرەی مەرسومەکە فەرمانی لێبوردنی بۆ دەرچووبوو.
نوسینگەی راگەیاندنی سەرۆکایەتی کۆماری عێراق ئەوەشی خستوەتەڕو، لیژنەیەکی لێکۆڵینەوە پێکهێنراوە بۆ ئەوەی هۆکاری دەرچوونی مەرسومەکە و کەمتەرخەمییەکان دیاریبکەن و روبەڕوی سزایان بکەنەوە، چونکە سەرۆک کۆمار جەخت دەکاتەوە کە بەهیچ شێوەیەک پشتیوانی لەکارئاسانیکردن بۆ تۆمەتبارانی مادە هۆشبەرەکان و پێشێلکاری یاسایی ناکات، ئەویش بەهۆی ئەو مەترسیانەی تۆمەتبارانی مادە هۆشبەرەکان لەسەر ئاسایشی کۆمەڵایەتی وڵات دروستی دەکەن.
رونکردنەوەکەی سەرۆک کۆماری عێراق لەکاتێکدایە، لەچەند رۆژی رابردودا فەرمانێکی سەرۆکایەتی کۆماری عێراق بڵاوکرایەوە، یەكێك لەم دوو مەرسومە كە سەرۆك كۆمار فەرمانیداوە هەڵوەشێندرێنەوە، لێبوردنێكی تایبەتی سەرۆك كۆمارە بۆ كوڕی پارێزگاری پێشووی نەجەف، كە لەسەر بازرگانیكردن بە مادەهۆشبەرەكان، حوكمی زیندانی هەتاهەتایی بۆ دەرچووە.
بڵاوبونەوەی دەقی لێبوردنی بەرهەم ساڵح بۆ بازرگانێكی ماددە هۆشبەرەكان كاردانەوەی بەدوای خۆیدا هێنا، بەتایبەتی لەكاتێكدا بەرهەم ساڵح بۆ ویلایەتی دووەم خۆی بۆ پۆستی سەرۆك كۆمار كاندید كردوەتەوە.