رۆژنامەی زە ئەتلەتیک بڵاویکردووەتەوە کە دانوساتەکانی نێوان ڤینیسۆس و ریاڵ مەدرید سەبارەت بە نويکردنەوەی گرێبەستەکەی بەهۆکاری دارایی وەستاوە.

پاش ئەوەی گرێبەستی ڤینیسۆس جۆنیۆر لەگەڵ ریاڵ مەدرید لە هاوینی 2027 کۆتایی پێدێت و بەرپرسانی یانەی شاهانە چەندین جار هەوڵی نوێکردنەوەیان داوە بەڵام سەرکەوتوو نەبوون.

رۆژنامەی زە ئەتلەتیک بڵاویکردووەتەوە کە هۆکاری رێکنەکەوتنی هەردوولا دەگەرێتەوە بۆ ئەوەی کە ریاڵ مەدرید ئامادەن ساڵانە 20 ملیۆن یۆرۆ وەک مووچە بدەن بە یاریزانەکە، بەڵام ڤینیسۆس زیاتری دەوێت.

سەرچاوەکە ئەوەی ئاشکراکردووە کە ڤینیسۆس جۆنیۆر لە پاڵ مووچەکەیدا دەیەوێت ئەو برگەیەش بۆ گرێبەستەکەی زیاد بکات، لە ساتی پێشکەشکردنی ئاستی بەرز و بەدەست هێنانی نازناو پاداشتی دارایی بکرێت.

ئەوە لە کاتێکدایە زۆر یانە لە ئەوروپا و دەرەوەی ئەوروپا چاودێڕی بارودۆخی گرێبەستەکەی ڤینیسۆس دەکەن و ئامادەن ئۆفەری گرانبەهای پێشکەش بکەن.

ئەستێرە بەرازیلییەکە لەگەڵ یانەی شاهانە بەشداری 341 یاریی کردووە و توانیوێتی 111 گۆڵ و 90 ئەسیست تۆماربکات.

PM:02:37:03/12/2025

ئه‌م بابه‌ته 824 جار خوێنراوه‌ته‌وه‌‌