48 ساڵ، شێوەکانی خەبات لەپێناوی خزمەتی خەڵکدا

‌بارزان شيخ عوسمان

ئەوێ رۆژێ كە یەكێتیی نیشتمانیی كوردستان دامەزرا ، نەك هەر گەلی كوردستان لە عیراق، بەڵكو تەواوی كورد و دیموكراتخوازانی ناوچەكە، بەو بۆنەیەوە بە ئومێدەوە پێشوازییان  دەکرد لە ئایندەیەكی گەش.

‎ئاخر یەكێتیی نیشتمانیی كوردستان، لە بەیاننامەی دامەزراندنیدا هێڵە گشتییەكانی دیاریكردبو و خستبوەڕوو بۆ بەدیهێنانی ویست و داوای كۆمەڵانی خەڵكی كوردستان و عێراقیش لە هەمو ئاست و روەكانەوە.
 
‎(ی.ن.ك) سەرباری ئەوەی لە هەلومەرجێكی دژواری شكستی خەباتی چەكدار  هاتە مەیدانی تێكۆشان و دوبارە هەستانەوەی گیانی شۆڕشگێڕیی و تێكۆشان، بەڵام  بە روانین و بەرنامەیەكی هاوچەرخ خۆی ناساند، كە هەر بە تەنیا رێكخراوێكی چەكدار نییە، بەڵكو  بە دیدێكی پێشكەوتنخواز و مۆدێرن رێگەچارەكانی تەواوی كێشەكانی  خستە ڕوو،  كە لە چەندین تەوەرە و رەهەنددا خۆی دەبینییەوە.
 
‎(ی.ن.ك) هەر لەسەرەتاوە بۆ بەدیهێنانی ئامانج و مافەرەواكانی گەلی كوردستان، كە لە چەندین چین و توێژ پێكهاتوە، هەموو شێوە و شێوازەكانی خەباتی گرتەبەر، هەر لە خەباتی  سیاسیی، چەكدار، جەماوەریی تا دەگاتە دیپلۆماسیی، پەرلەمانیی، سەندیكایی، رێكخراوەیی و ئیعلامیی، لە هەمووو ئەو شێوانەی خەباتیشدا كە بە پشودرێژیی و دانبەخۆداگرتن  پەیڕەویكردون ، بەرنامە و جیهانبینیی راستوڕەوانی خستۆتەڕوو.
 
‎دیارە هەموو ئەو  بیركردنەوە و جیهانبینییە دەگەڕێتەوە بۆ فكری سەرۆك مام جەلالی مەزن، كە هەر لەیەكەم ساتی دامەزراندنی (ی.ن.ك) دا چەسپاندنی و بوونە رێنما و نەخشەی رێگای خەبات، تا ئێستاش هەر لەو روانگەیەوە خەبات درێژەی هەیە، بە شێوازە جیاجیاكانییەوە.
 
‎بۆیە لەم یادە پڕشكۆیەی دامەزراندنی (ی.ن.ك)  دا بە گرنگم زانی، هەم وەك بیرخستنەوەیەك بۆ مێژوو، هەم بۆ لێدوان لە بارەی ئەركەكانی خەبات لە پێناوی كۆمەڵانی خەڵكی كوردستان، روناكیی بخەمە سەر  شێوەكانی خەباتی ئەم حزبە مەزنە،  كە  حزبی هەموو  مەیدانەكانی خەباتە لە هەمو سەردەم و هەلومەرجێكدا.

 

‎(1)  یەكێتیی و خەباتی سیاسیی
 
‎بە پیویستی نازانم بچمە ناو وردەكارییەكانی مێژوی پێش دامەزراندنی (ی.ن.ك) و ئامادەكارییەكان، چونكە پێشتر وەك بەڵگەنامەیەكی مێژوویی لە زۆر سەرچاوە دا باسكراوە و تۆماركراون ، بۆیە راستەوخۆ دەچمە ناو بابەتەكەوە.
 
‎هەر دوای راگەیاندنی دامەزراندنی (ی.ن.ك)، سەركردەكان لە ریزی پێشەوەیان،  سەرۆك مامجەلال  سەرباری كاركردن بۆ بوژاندنەوەی گیانی تێكۆشان و  جۆشدانەوەی خەبات لە نێو ریزەكانی جەماوەردا، پەیوەندیش دەكرا بە كەسایەتییە سیاسییە كوردستانییەكان  تا هەموان لەدەوری ئاڵای (ی.ن.ك)  كۆببنەوە بۆ درێژەدان بە خەباتی هاوبەش لە چوارچێوەی ئەو یەكێتییەدا، لەگەڵ پاراستنی ناسنامەی چینایەتیی و ئایدۆلۆژیاییاندا، بەوپێیەی یەكێتی رێكخراوێكی نیمچە بەرەییە و هەموو چین و توێژەكانی كوردەواریی دەتوانن لەژێر ئاڵاكەیدا  تێبكۆشن بە ئامانجی بەدیهێنانی مافەكانی گەلی كوردستان.
 
‎بەمەبەستی پێكەوە گرێدانی خەباتی هاوبەشی كوردستانیی و عیراقییش (ی.ن.ك) پەیوەندییە سیاسییەكانی لەگەڵ هێزو لایەنە دیموكراتخوازەكان بەهێز كرد، كە ئەمڕۆی ئەو پەیوەندییانە لە گۆڕەپانی عیراقییدا  رەنگدانەوەی ئەوێ رۆژێی ئەو  سیاسەتە دروستەیە.
 
‎ئەمڕۆش دوای 48 ساڵ  خەبات، (ی.ن.ك) لە هەر كات زیاتر، روانین و جیهانبینیە واقیعیەكەی لە خەباتی سیاسییدا كردۆتە پێویستییەك  بۆ   چارەسەركردن و یەكلاییكردنەوەی كێشە و ناكۆكییەكان لە ئاستی كوردستانیی و لابردنی كۆسپ و گرفتەكانی بەردەم  بەدیهێنانی مافە دەستوریی و یاساییەكانی گەلەكەمان لە ئاستی عێراقییدا.
 
‎بەلای (ی.ن.ك)ەوە ،ئەم  روانینە نەگۆڕەی ئەو شێوەیەی خەبات ، گەیشتنی گەلەكەمان و  وڵاتەكەشمان  بەرەو كەنارێكی ئارام زامن دەكات.
 
‎لەو روانگەیەشەوەیە، كە هەموو توانایەكی خۆی تەرخان دەكات ، لە پێناوی  سەرخستنی ئەم شێوەیەی خەبات، كە هەمیشە  سەرۆك مامجەلالی مەزن دوپاتیكردۆتەوە بە ئامانجی  دەستەبەركردنی  ژیانێكی  ئاسودە و خۆشگوزەران  بۆ  كۆمەڵانی خەڵك لە كەشوهەوایەكی پڕ لە ئارامیی و  پێكەوە ژیانی هێزە سیاسییەكان  و پێكهاتە نەژادیی و ئاینییەكان بە ئاشتیی و تەبایی.
 
هەر بۆیە (ی.ن.ك) بە حزبێكی ئاشتیخواز ناوبانگی دەركردوە، چونكە ئاشتیی تاكە دەروازە و وێستگەیە كە خەباتی سیاسیی تیایدا گەشە دەكات و  ویستەكانی كۆمەڵانی خەڵكی تیادا بەدیدەهێنرێن.
 
2 یەكێتیی و خەباتی چەكدار
‎ئەو سەردەمەی (ی.ن.ك)   لە ١ی حوزەیرانی ساڵی١٩٧5 دا شۆڕشی نوێی بەرپاكرد و  شێوە خەباتی چەكداری هەڵبژارد، رژێمی بەعس لەوپەڕی بوغراییدا بوو، دووبارە هەڵگیرسانەوەی شۆڕشی  بە مەحاڵ و ئەستەم  دەزانی.
 
‎هەر لەرێی ئەو ئەقڵێتەوە  هەموو ئسلوبێكی گرتەبەر بۆ تواندنەوەی  زیاتری نەتەوەی كورد لە بۆتەقەی سیاسەتی چەپەڵی  سێ كوچكەی بەعس (تەعریب، تەهجیر، تەرحیل) دیارە تەبعیسیش لە نێو ئەو سیاسەتەدا بوو.
 
‎ئەم شاڵاوەی بەعسییەكان پێویستی بە وەڵامێكی توند و بەزەبری شۆڕشگێڕانە بوو، كە ناسنامەی گەلی كوردستان لە نێو ئەو شەوەزەنگ و بێ ئومێدییەدا  رزگار بكات و ورە ببەخشێتەوە بە گەل، ئەو هێزەش كە شانی دایە بەر ئەو ئەركە سەختە (ی.ن.ك) بوو.

هەر دوای ساڵێك لە دامەزراندنی، لەرێی مەفرەزە سەرەتاییەكانەوە (ی.ن.ك)  خەباتی چەكداریی و گەڕانەوەی پێشمەرگە بۆ چیا سەركەشەكانی كوردستانی راگەیاند، كەواتە خەباتی چەكدار پێویستیەكی مێژوویی بوو بۆ ئەو قۆناغە، سەرباری سەختییەكان و هەلومەرجی پڕ  كەند و كۆسپ، بەمەش   (ی.ن.ك)  مەحاڵی كردە واقیع.
 
‎ئەو روداو و وەرچەرخانە گەورەیە نەك هەر ئومێدی خستەوە نێو دەرونی كۆمەڵانی خەڵكی كوردستانی عیراق و ئازادیخوازنی عیراق، بەڵكو كوردی هەموو بەشەكانی تر و دیموكراتخوازانی  وڵاتانی دراوسێ و ناوچەكەش  ئاسودەبوون.

شۆڕشی نوێی گەلەكەمان بە رابەرایەتیی (ی.ن.ك)  لە ماوەی پانزدە ساڵی تەمەنیدا (1975 -١٩٩١) هەوراز و نشێوی زۆری بینی، بەڵام  قارەمانێتی پێشمەرگەو فەرماندە و سەركردە  و جەماوەرە خۆراگرەكەی بە پرەنسیبی پشودرێژیی  شكستیانهێنا بە هەموو پیلانەكانی بەعسی فاشیست.
 
‎راستە شان دانە بەر خەباتی چەكدار  لەو قۆناغە سەختەدا شەڕێكی نابەرامبەر بو، بەڵام پێشمەرگە و فەرماندەكانی (ی.ن.ك) كوڕ و رۆڵەی بە ئەمەك و ئازای ئەو رۆژە دژوار و سەختە بوون، ئەوان بە خوێنی گەشیان سەدان داستانی بێ وێنەیان تۆمار كرد، لە هەزاران شەڕی نێو سەنگەری  سەختی خەباتدا سەركەوتنی بێوێنەیان بەدەستهێنا،  كە نەك هەر   جەماوەری گەلەكەمان و كوردی بەشەكانی تر، بەڵكو دوژمنەكانیش  بەو ئازایەتیی و  قارەمانێتیەی پێشمەرگەكانی  (ی.ن.ك)  سەرسام بون، بەراستیی داستانەكانی پێشمەرگە لەو چەند ساڵەی خەباتی چەكدار دا لە مێژوی بزوتنەوەی چەكداریی شۆڕشگێڕانەی گەلەكەماندا بێ وێنەبون، هەرگیز دوبارە نابنەوە ،هیچ هێزێكی تریش ناتوانێت بەو چەكە سادەیە بێ هیچ پشتیوانییەكی  ئیعلامیی و سیاسیی  ناوچەیی و جیهانیی  قارەمانێتیی وا بنوێنێت، یا بتوانێت ئەو داستانە كەم وێنانە تۆمار بكات، بۆیە  ناسنامەی پێشمەرگەكانی شۆڕشی نوێ هەمیشە بە زیندوویی دەمێننەوە.بە جۆرەی نەك هەر یەكێتییەكان، بەڵكو جەماوەری گەلەكەمان و دۆستەكانمان  شانازیی پێوەدەكەن و ئەو شایەتییە دەدەن بۆ ئەو هێزە  قارەمانەی كە  تەنیا و تەنیا چیاكان و گەلەكەی و بیروباوەڕە پۆڵاینیەكەی پشتوپەنای بو، دەرو دراوسێ دوژمنی بوون، ئەوروپا و ئەمریكا  بەرژەوەندییەكانیان وایدەخواست كە لەگەڵ رژێمی عیراقدا دۆست بن، كەچی بەو گیانبازییە بێنەزیرەی  بە تەنیا بەگژ ئەو هێزە زەبەلاحەی فاشیستەكانی بەعسدا دەچۆوە.
 
‎هەر  ئەو گیانی خۆبەختكەرانەی پێشمەرگەكانی شۆڕشی نوێ بوو، كە هێزەكانی  پێشمەرگەی هەرێمی كوردستان شكستیان هێنا بە   تاقمی تێرۆریستی داعش  و دەیان داستانیان تۆماركرد، راویان نان و كوردستانیان لە پیسی و لیخنیی ئەو تێرۆریستانە پاككردەوە.

‎(3) یەكێتیی و  خەباتی دیپلۆماتیی
 
‎هەر لە سەرەتاوە (ی.ن.ك)  خەباتی دیپلۆماتیی   بە گرنگ زانیوە  بۆ ئەوەی سەرنجی  دەوڵەت و هێزە سیاسییەكانی دەوروبەر و ناوچەكە  و  جیهان رابكێشێت  بۆ  رەوایی مەسەلەی گەلی كوردستان لە پێناوی بەدیهێنانی  خواستە بنەڕەتییەكانی گەلەكەمان و ئاشناكردنی ناسنامەی خۆی و شۆڕشی نوێ، كە   گوزارشت لە بزوتنەوەی دیموكراتی رزگاریخوازی  گەلێكی بن دەست و چەوساوە دەكات . هەر لەو روانگەیەشەوە بو سكرتێری گشتیی  لەرێی دۆستایەتیی دێرینەی خۆی لەگەڵ رۆژنامەنوس و سیاسەتمەدار و كەسایەتییە  عەرەب و ئەوروپاییەكان پەیوەندییەكانی  بەهێز قوڵتركردەوە. 

بەلای هەڤاڵ سكرتێری گشتیی (ی.ن.ك) ەوە كردنەوەی  ئەو كەناڵی پەیوەندییە و پەیڕەوكردنی ئەو شێوازەی خەبات لەو سەردەمە دا، دواتریش و تائەمڕۆش  زۆر گرنگ و پێویستبوو، لەو روانینەشەوە بوو كە لە هەموو كۆڕ و كۆبونەوەیەكدا لە بیر نەكردن و بە هەندوەرگرتنی ئەو شێوازەی خەباتی بۆ سەركردە و كادیر و  دۆست و لایەنگرانی (ی.ن.ك)  دوپاتكردۆتەوە. دیارە ئەو هەوڵە دیپلۆماتییانەی سەرۆك مامجەلال لەو سەردەمە سەختە و قۆناغەكانی  داهاتووی خەبات و دوای راپەڕین و پرۆسەی ئازادیی عیراقیشدا هەر بەردەوام بووە و بەرهەم و دەستكەوتی بێ سنوری هەبوە.
 
‎ئەگەر  زۆربەی هەرە زۆری هێزە سیاسییە عێراقیی و جیهانییەكان  لەو بڕوایەدا بوبێتن  دوای رێككەوتنامەی شومی جەزائیر  مەحاڵە جارێكی تر كورد توخنی سیاسەت یا شۆڕش بێتەوە،ئەوا هەوڵە دیپلۆماتییەكانی سەرۆك مامجەلال ئەوانی هێنایە سەر ئەو بڕوایەی كە بەڵێ شۆڕشی دیموكراتی  رزگاریبەخشی  گەلی  كوردستان مێژوو كردە  و  دروستكراوی هیچ دەوڵەت و هێزێكی ناوچەیی یا جیهانییەوە نییە، بەڵكو  شۆڕش و بزوتنەوەیەكە و بەردەوام دەبێت تا ئەو كاتەی مافەكانی گەلەكەمان  دەسەلمێنرێت و لە سایەی سیستمێكی دیموكراسییدا دەچەسپێت.
 
‎خۆشبەختانە (ی.ن.ك)  لەم شێوەیەی خەبات هەر لەسەرتاوە  تا ئەمڕۆ كە یادی چل وهەشتەمین ساڵڕۆژی دامەزراندنی دەكەینەوە  سەركەوتو بوە، توانیویەتی پشتیوانییەكی ناوچەیی و نێودەوڵەتیش بۆ  مەسەلەی رەوای گەلەكەمان بەدەستبهێنێت  بە درێژایی  قۆناغە جیاجیاكانی  خەبات. ئەو پشتیوانییە نێودەوڵەتیی و ناوچەییەی ئەمڕۆش بەرهەمی  ئەو  شێوەیەی خەباتە، كە (ی.ن.ك)  پشتی پێ بەستوە  لە پێناوی كۆدەنگیی و پشتیوانیی نێودەوڵەتی  بۆ مەسەلەی رەوای گەلەكەمان.
 
‎هەر ئەو پێداگرییەی سەرۆك مامجەلال بۆ  گرنگیدان بەم شێوازەی خەبات بوو، كە لە حوزەیرانی ١٩٩١ بۆ یەكەمینجار  سەرانی  دەسەڵاتدار و ئۆپۆزیسیۆنی توركیا بە بایەخەوە  پێشوازی بكەن لە بەڕێزیان و سەركۆماری توركیا ئۆزال  لە كۆشكی (چانكایا)  لە ئانكارا بەرەسمیی لەگەڵیدا كۆبوەوە. لە ئەمریكا و ئەوروپاش دیدارەكانی لێپرسراوان لە ئاستی بەرز و رەسمیدا بێت، لەگەڵ سكرتێری گشتییدا ،دواتریش  بووە مایەی  كۆبوونەوە لەگەڵ سەركردەی حزبە كوردستانیی و عیراقییەكانیش  بە هەمان شێوە.
 
‎كەواتە دەبێت ئەو نەریتەی خەبات لەم سەردەمەشدا درێژەی هەبێت  تا ئەو كاتەی تەواوی مافە دەستورییەكانی گەلەكەمان لە چوارچێوەی  عیراقێكی  دیموكراسیی یەكگرتوودا بەدەستدێت . لە ئاستی ناوچەكە و جیهانیش پەیوەندییەكان  هاوبەش و داد پەروەرانەبن لەگەڵ هەرێم و گەلەكەماندا.

‎(4) یەكێتی و خەباتی  راگەیاندن ، پەرلەمانیی و سەندیكایی   
 
‎ راگەیاندن یەكێكە لە بنەماكانی  گەیاندنی پەیام و سیاسەتەكانی هەر حزب و حكومەتێك، فاكتەرێكی بنەڕەتیشە  بۆ  گەیاندنی دەنگ و  خواستی هەرگەلێك  كە خەبات دەكات بۆ رزگاریی بۆ ناساندنی خۆی بە دنیای دەرەوە و پەیداكردنی پشتیوانیی بۆ رەوایی و هەقیانەتی مەسەلەكەی.



یش لە سەرەتای  (ی.ن.ك) مەزراندنیدا ئەم رێچكە گرنگەی پەیڕەو كرد و ئەوەبو لە٢٣ی  حوزەیرانی ١٩٧٥ بەیاننامەی  دامەزراندنی خۆی لە رادیۆی دیمەشق بڵاوكردەوە .ئەوە وێستگەی یەكەمی ئەو شێوازەی خەبات بوو.دواتریش لە رێی بڵاوكردنەوەی نامیلكە بە ناوبانگەكەی هەڤاڵ مام جەلال (ی.ن.ك ،بۆچی؟)ەوە، هەنگاوی  بەرەو پێشەوە هەڵهێنا، تا الشرارە، رێبازی نوێ، هەواڵنامە  و دامەزراندنی ئیزگە كە، لە دوای راپەڕینیش  تەلەفزیۆنی گەلی كوردستان و  رۆژنامەی كوردستانی نوێ، وەك یەكەم تەلەفزیۆن و یەكەم رۆژنامەی رۆژانەی كوردیی. ئەمڕۆش خاوەنی چەندین دەزگاو دامەزراوەی راگەیاندنە.
 
‎(ی.ن.ك)  لەرێی راگەیاندنەوە لە هەموو قۆناغەكانی خەباتدا، هەم ناسنامە سیاسیی و فیكرییە پێشكەوتنخوازەكەی خۆی، هەم رەوایی مەسەلەی گەلی كوردستان و  زوڵم و زۆردارییەكانی رژێمی بەعسی ناساندوە بە دنیای دەرەوە، لەولاشەوە لەرێی خەباتی راگەیاندنەوە كەناڵێكی دۆستایەتیی بەهێزی دروستكردوە لە نێوان گەلی كوردستان و رای گشتیی عیراقیی و ناوچەییشدا .
 
‎هەر لەرێی ئەم شێوەیەی خەباتیشەوە، روانینی  (ی.ن.ك)  بۆ پێكەوە گرێدانی خەباتی نێوان گەلانی عیراق لە لایەك، بنەماكانی دۆستایەتیی لەگەڵ هێزە كوردستانییەكانی بەشەكانی تری كوردستان لەلایەكی ترەوە  خراوەتەڕوو، لە سەردەمی حوكمڕانییشدا  بە هەمان شێوە خەباتی راگەیاندن بە فاكتەرێكی گرنگ دەزانێت بۆ خستنەڕووی راستییەكان لە هەموو ئاستەكانی ژیان و چارەسەركردنی كێشە و ململانێكان، تا دەگاتە قوڵكردنەوەی چەمكەكانی پێكەوەژیانی هێز و لایەنەكان بە ئاشتییەكی دادپەروەرانە و هاوسەنگ.
 
‎(ی.ن.ك)  وەك هێزێكی سیاسیی دیموكراتخواز، وەك هێزێك كە باوەڕی پتەوی بە   دەوڵەتداریی و رێكخستنی ژیانی هاووڵاتیانە بە یاسا، هەر لە سەرەتای دامەزراندنیەوە تا ئەمڕۆ، خەباتی پەرلەمانیی وەك كۆڵەكەیەكی بەهێزی خەبات دەزانێت بۆ بەدیهێنانی ئامانج و مافەكانی كۆمەڵانی خەڵكی كوردستان.  ئەوروانینەش لەو روانگەیەوەبووە كە خەبات بۆ گەیشتن بە مافەكان تەنیا  بە زەبروزەنگی شۆڕشگێڕانە  و شەڕی ناو سەنگەرەكان بە چەك و تفەنگ نییە، بەڵكو  لە هەلومەرجی گونجاودا دەبێت لە میانەی خەباتی سیاسیدا ئەم شێوازەی خەبات بە هەند وەربگیرێت، شەڕەكە  لە پێناوی خزمەتكردنی كۆمەڵانی خەڵكی كوردستاندا لە پەرلەماندا بكرێت.
 
‎ئەو بیر كردنەوە و دیدەی  (ی.ن.ك)  هەر لە سەرەتای دامەزراندنیەوە لەوەوە سەرچاوەی گرتووە، كە (ی.ن.ك)  بەو گیان و قەناعەتەوە شانی داوەتە بەر خەبات كە رۆژی روناكی رزگاریی و سەرفرازیی هەر دێتەدی و گەلەكەمان دەبێتە خاوەنی پەرلەمان و دامەزراوەی قانونیی و حكومیی، هەر بۆیە دوای راپەڕینی ئازاری ١٩٩١ (ی.ن.ك)، هەر زوو داوای گواستنەوەی  شەرعیەتی شۆڕشگێڕانەی كرد بۆ شەرعیەتی هەڵبژاردن و پەرلەمانیی و حكومیی، هەمیشە سەرۆك مامجەلالی مەزن ئەوەی بۆ یەكێتیەكان و جەماوەری گەلەكەمان و حزبە سیاسییە كوردستانیی و عیراقییەكان دوپاتكردۆتەوە كە خەباتی پەرلەمانیی چەسپاندنی مافەكانی تەواوی گەل زامن دەكات و دەستكەوتەكانی كۆمەڵانی خەڵك دەچەسپێنێت.
 
‎لەم بوارەدا (ی.ن.ك) لە شەڕی پەرلەمانییدا خاوەنی سەروەریی زۆر و زەوەندە  بۆ گەلی كوردستان، چ لە ئاستی هەرێمی كوردستان، چ لە ئاستی عیراقی فیدراڵدا، ئەوەش بە سووربونی  رابەرێكی مەزنی وەك سەرۆك مامجەلال و بە پشتیوانیی هەڤاڵەكانی و جەماوەرە بەرینەكەی بوو، كە ژیانی  پەرلەمانیی  هاتەكایەوە  لە هەرێمی  كوردستان، بووە نمونەیەكی گەشیش كە لەبەرچاوی دۆست و دوژمندا شانازیی پێوەبكەین، دواتریش لە دوای رووخانی بەعسی دیكتاتۆر  لە عیراقدا چاوی لێكرا.
 
‎بۆیە دەبێت  تێكۆشەران، سەركردەكانی (ی.ن.ك)  وەك چۆن پێشتر شۆڕشی نوێیان بە پشوودرێژیی گەیاندە  لوتكەی سەركەوتن، ئەمڕۆش بە هەمان ئەو گیانەوە  درێژەبدەن  بەم شێوە گرنگەی خەبات لە هەردوو ئاستی  هەرێم و فیدراڵدا  بۆ چەسپاندنی مافە دەستورییەكانمان لە عیراقی فیدراڵ و  دابینكردنی ژیانێكی ئارام و خۆشگوزەران و سەربەرز  بۆ  كۆمەڵانی خەڵك لە هەرێمی كوردستان كە قانون سەروەر بێت.


PM:10:47:02/06/2023

ئه‌م بابه‌ته 1120 جار خوێنراوه‌ته‌وه‌‌



هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی