راگه‌یه‌ندراوی كۆبوونه‌وه‌ی هاوبه‌شی ئه‌نجومه‌نی وه‌زاریی بۆ ئابووری و ئه‌نجومه‌نی ئابووری هه‌رێم بڵاوكرایه‌وه
وێستگه‌نیوز-
ئه‌نجومه‌نی وه‌زاریی عێراق بۆ كاروباری ئابووری و ئه‌نجومه‌نی ئابووری هه‌رێمی كوردستان، رێككه‌وتن كه راسپارده‌یه‌ك ئاراسته‌ی ئه‌نجومه‌نی وه‌زیرانی فیدراڵ بكه‌ن بۆ ئاڕاسته‌كردنی وه‌زاره‌تی دارایی فیدراڵ بۆ چاره‌سه‌ركردن و ناردنی مووچه ڕاگیراوه‌كانی هه‌رێم، ئه‌وانه‌ی به هۆی ته‌واونه‌كردنی بایۆمه‌تری دوورخرابوونه‌وه.
بڕیاری هه‌نووكه‌ییان له‌باره‌ی هه‌ندێك كێشه‌وه دله‌باره‌وه درا و ئه‌وانی تریش راسپارده ئاراسته‌ی ئه‌نجومه‌نی وه‌زیرانی فیدراڵ كرا
ئه‌نجومه‌نی وه‌زاریی عێراق بۆ كاروباری ئابووری له ماوه‌ی دوو ڕۆژدا، كۆبوونه‌وه‌ی ئاسایی بیست و هه‌شته‌مینی خۆی له‌گه‌ڵ ئه‌نجومه‌نی ئابووری هه‌رێمی كوردستان له شاری هه‌ولێر سازكرد.
به‌گوێره‌ی راگه‌یه‌ندراوی كۆبوونه‌وه‌كه، "له ماوه‌ی دوو ڕۆژی كۆبوونه‌وه‌كاندا، كۆمه‌ڵێك بابه‌تی جێی بایه‌خی هاوبه‌ش له نێوان حكومه‌تی فیدراڵ و حكومه‌تی هه‌رێمی كوردستان، له كه‌شێكی ڕاشكاوانه و ئه‌رێنیدا تاووتوێ كران، كه هه‌ندێكیان بڕیاری هه‌نووكه‌ییان له‌باره‌وه درا و ئه‌وانی تریش راسپارده ئاراسته‌ی ئه‌نجومه‌نی وه‌زیرانی فیدراڵ كرا، و جه‌خت له به‌رده‌وامبوونی گفتوگۆكان كرا بۆ چاره‌سه‌ركردنی ئه‌و پرسانه‌ی كه پێویستیان به كۆبوونه‌وه و دیداری زیاتر هه‌یه".
ئاماژه به‌وه‌شدراوه كه "ئه‌نجومه‌نی وه‌زاریی بۆ ئابووری بڕیاریدا به پێشكه‌شكردنی ڕاسپارده‌یه‌ك بۆ ئه‌نجومه‌نی وه‌زیرانی فیدراڵ بۆ ئاڕاسته‌كردنی وه‌زاره‌تی دارایی فیدراڵ بۆ چاره‌سه‌ركردن و ناردنی مووچه ڕاگیراوه‌كانی هه‌رێم، ئه‌وانه‌ی به هۆی ته‌واونه‌كردنی بایۆمه‌تری دوورخرابوونه‌وه".
ئه‌وه‌ش خراوه‌ته‌ڕوو كه هه‌روه‌ها گفتوگۆ له‌باره‌ی هه‌ندێك پرسی په‌یوه‌ندیدار به رۆزنامه‌ی كشتوكاڵی، مۆڵه‌تی هه‌نارد ه و هاورده‌كردن، مۆڵه‌تی كارگه‌كان، تۆماركردنی كۆمپانیاكان، پۆلێنكردنی به‌ڵێنده‌ران، ده‌روازه سنوورییه‌كان، گومرگ، دۆسێیه‌ی نه‌وت و وزه و كه‌رتی بانكی كرا.
وه‌ك له راگه‌یه‌ندراوه‌كه‌داهاتووه، "راسپارده‌یه‌كی دیكه‌ی ئه‌نجومه‌نی وه‌زاریی بۆ ئابووری، به‌رده‌وامبوونی كاركردنی لیژنه هاوبه‌شه‌كانی نێوان وه‌زاره‌ت و كه‌رته په‌یوه‌ندیداره‌كانه بۆ ته‌واوكردنی ئه‌و ئه‌ركانه‌ی پێیان سپێردراوه له پێناو گه‌یشتن به له‌یه‌كتێگه‌یشتنی هاوبه‌ش كه له به‌رژه‌وه‌ندی هه‌موو هاووڵاتییانی عێراقدا بێت".
روونیشیكراوه‌ته‌وه كه "ئه‌نجومه‌نی وه‌زاریی پێشنیاری ئه‌نجامدانی كۆبوونه‌وه‌یه‌كی تایبه‌ت و له ئاستێكی باڵادا ده‌كات بۆ گفتوگۆكردن له‌باره‌ی دۆسێیه‌كان نه‌وت و وزه و ده‌روازه سنوورییه‌كان و گومرگ".
له كۆتاییدا بانگهێشتی ئه‌نجومه‌نی ئابووری هه‌رێمی كوردستان كرا بۆ ئه‌نجامدانی كۆبوونه‌وه‌یه‌كی هاوبه‌ش له‌گه‌ڵ ئه‌نجومه‌نی وه‌زاریی بۆ ئابووری، له شاری به‌غدا.
PM:10:53:09/09/2024
ئه‌م بابه‌ته 2788
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت