وەزیری پلاندانان: ئەو سەرژمێرییەی پلاندانانی عێراق رایگەیاند راست نييه و رەهەندی سیاسی هەیە

وێستگه‌نیوز –

وەزیری پلاندانانی هەرێمی کوردستان راگەیاندنی سەرژمێری گشتی عێراقی بە ناڕاست وەسفكرد و دەڵێت، رەهەندی سیاسی لەپشتەوەیە.

دارا رەشید محمود، وەزیری پلاندانانی هەرێمی کوردستان له كۆنگرەیەكی رۆژنامەوانیدا رایگەیاند، "وەزارەتی پلاندانانی حکومەتی فیدراڵ پابەند نەبووە بە بڕیارەكانی حكومەتی عێراقەوە و ئەنجامی سەرژمێری گشتی عێراق دەستكاری كراوە و پێشێلكاری تیادا كراوە".

وتيشى، "بەپێی سەرژمێری گشتی رێژەی دانیشتوانی هەرێمی كوردستان 6 ملیۆن و 519 هەزار و 129 هاوڵاتیه لە كۆی گشتی 46 ملیۆن و 118 هەزار كەس كۆی دانیشتوانی عێراق".

دووپاتیشیكردەوە، "كۆی دانیشتوانی هەرێمی كوردستان لە سەدا 14ی رەتكردووە، ئەگەر ناوچە هاوبەشەكانیشی بخرێتە سەر لە سەدا 15 رەتدەكات".

بەوتەی وەزیری پلاندانانی هەرێمی کوردستان، "وەزارەتی پلاندانانی عێراقی پابەندی بڕیارەكانی ئەنجومەنی وەزیرانی عێراق نەبووە و راگەیاندنی سەرژمێرییەكەی پلاندانانی عێراق پێچەوانەی بریارەكانی ئەنجومەنی وەزیرانی عێراق و رێكەوتنی سیاسی و حكومی نێوان حكومەتی هەرێم و حكومەتی عێراقه".

داواشی لە سەرۆك كۆمار و سەرۆك وەزیرانی عێراق كرد "بەدواداچون بۆ بابەتەكە بكەن و چارەسەری بكەن ئەگەر نا سەرژمێرییەكەی ئەمجارەش وەك هەمان سەرژمێرییەكانی پیشوو بە سیاسی دەكریت و ئەنجامی سەرژمیرییەكە رەهەندی سیاسی و رەهەندی بابەتی بودجە و ریژەی ژمارەی دانیشتوانی هەیە".

PM:05:04:29/11/2025

ئه‌م بابه‌ته 92 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت