روانگەی (ئیكۆ عێراق): زیانی وەستانی بەرهەمهێنانی کۆرمۆر زیاتر لە 7 ملیۆن دۆلاره لە رۆژێکدا

وێستگه‌نیوز-

روانگەی (ئیکۆ عێراق) ئاشکرای کردووە، بەهۆی هێرشکردنە سەر کێڵگەی غازی کۆرمۆر زیانە داراییەکانی وەستانی بەرهەمهێنانی غاز لەو كێڵگەیە گەیشتووەتە 7.41 ملیۆن دۆلار لە رۆژێکدا.

روانگەی (ئیکۆ عێراق)، لە راپۆرتێكیدا بڵاویكردەوە، "کێڵگەی کۆرمۆر پێش ئەوەی هێرشبكرێتە سەری، رۆژانە 530 ملیۆن پێ سێجا غازی سروشتیی بەرهەم دەهێنا".

ئاماژەشیكردووە، "کێڵگەى کۆرمۆر رۆژانە 1580 تۆن غازی LPG بەرهەم دەهێنێت و نرخی یەک تۆنى 500 دۆلارە، هەروەها نزیکەی 22 هەزار بەرمیل لە رۆژێکدا غازی چڕکراوە (Gas Condensate) بەرهەم دەهێنێت و نرخی یەک بەرمیلى 60 دۆلارە".

بەپێی ئیکۆ عێراق "ئەم زیانانە، زیانی وەستان بۆ کرێی کۆمپانیا بەرهەمهێنەرەکان و تێچووی هێڵەکانی گواستنەوە و کەمبوونەوەی بەرهەمهێنانی وزەی کارەبا ناگرێتەوە".

شەوی چوارشەممە 26ـی تشرینی دووەمی 2025، هێرشکرایە سەر کێڵگەی کۆرمۆر لە سنووری قەزای چەمچەماڵ کە بووە هۆی ئاگرکەوتنەوەیەکی گەورە لە تانکییەکی کۆگاکردنی غازی شل و کەمبوونەوەی بەرهەمهێنانی کارەبا لە هەرێمی کوردستان بە رێژەی 80٪.

PM:03:11:29/11/2025

ئه‌م بابه‌ته 160 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت