نیشانه و هۆكار و چاره‌سه‌ری پەتای وەرزی
وێستگە ستایل-
گۆرانکاریەکانی کەش و هەوا بەتایبەت لەوەرزی سەرما بۆ وەرزی گەرما هۆكاره بۆ بڵاوبوونه‌وه‌ی په‌تای وه‌رزی، ماوەی چەند هەفتەیەکە بە ڕێژەیەک توشبون بە پەتا بەتایبەت پەتای وەرزی زۆر بڵاوە هەرچەندە زۆرێک لەسەر چاوەکان ئاماژە بەوە دەکەن ئەنفلۆنزای باڵندە یاخود شێوازی گۆڕاوی کۆرۆنا بیت، بەڵام بەگشتی بەپەتای وەرزی دەست نیشان دەکرێت تاوەکو پشکنینی تاقیگەی سەلمێنراوی بۆ ئەنجام نەدرێت، سه‌رخێڵ ئاراز پسپۆڕی ته‌ندروستی گشتی له‌م بابه‌ته‌دا ورده‌كاری زیاتر ده‌خاته ڕوو.
ئه‌م پسپۆڕه ده‌ڵێت"پەتای وەرزی (Seasonal Flu) یەکێکە لە نەخۆشییە باوەکانی وەرزی بەھار، کە زۆرجار بەهۆی گۆڕانکاری کەشوهەوا و بڵاوبوونەوەی ڤایرۆسەکان، بەتایبەت ڤایرۆسی ئەنفلۆنزا (Influenza)، دروست دەبێت، لە دەستپێکی بەھاردا، کە کەشوهەوا لە سەرما بۆ گەرما دەگۆڕێت، سیستەمی بەرگری لەش دەکرێت لاواز ببێت، کە ئەمەش دەرفەت بۆ بڵاوبوونەوەی په‌تاكه زیاد دەکات."
نیشانەکانی پەتای وەرزی:
1-تایەکی زۆر (بە گشتی زیاتر لە هه‌ڵامه‌تی سادە)
2-کۆکە
3-سەرئێشە
4-ئێشەی ماسوولکەکان و جومگەکان
5-ئازاری گەروو
6-هیلاک و ماندوێتی
هۆکارەکان:
پەتای وەرزی زۆرجار لە ڕێگەی ڤایرۆسەوە دەگوازرێتەوە، کە دەتوانێت به‌ركه‌وتنی ڕاستەوخۆ (وەک دەستدان) یان بە هەناسەدان لە ڕێگەی هەوای پیسه‌وه (droplets) بڵاو ببێتەوە لە بەھاردا، کە خەڵک زیاتر لە دەرەوە کۆدەبنەوە و به‌ركه‌وتنی کۆمەڵایەتی زیاد دەکات، ئەگەری تووشبوونیش بەرزتر دەبێت.
چارەسەر و پاراستن:
1-پشوودان: لەشی پێویستی بە پشوودانی تەواوە بۆ چاکبوونەوە.
2-خواردنەوەی شلە: ئاو و شلەمەنیەکان یارمەتیدەرن بۆ نەهێشتنی وشکبوونەوەی لەش.
3-دەرمان: دەرمانی تای و ئێشەکەمکەرەوە (وەک پاراسیتامۆل) دەتوانرێت بەکاربهێنرێت بەپێی پێویست، بۆ دۆخی قورس، پزیشک دەرمانی ئەنتی-ڤایرۆسی تایبەت پێشنیار دەکات.
4-پاراستن: شوشتنی دەست بەردەوام، دوورکەوتنەوە لە کەسانی نەخۆش، و وەرگرتنی ڤاکسینی ئەنفلۆنزا (ئەگەر بەردەست بێت) یارمەتیدەرن.
5-خۆراکی بەهێزکەر: خواردنی خۆراکی دەوڵەمەند بە ڤیتامین C (وەک پرتەقاڵ و لیمۆ) دەتوانێت بەرگری لەش بەهێز بکات.
PM:09:11:02/04/2025
ئه‌م بابه‌ته 416
جار خوێنراوه‌ته‌وه