ڕێنمایی گرنگ بۆ توشبووانی ڕۆماتیزمه له مانگی ڕه‌مه‌زاندا
وێستگە ستایل-
بۆ نەخۆشانی ڕۆماتیزم کە لە مانگی ڕەمەزاندا بەڕۆژوو دەبن، زۆر گرنگە ئەو خۆراکانە هەڵبژێرن کە هەوکردن کەم دەکەنەوە و پاڵپشتی تەندروستی جومگەکان دەکەن و ڕێگری لە هەڵئاوسانی جومگەکان دەکەن، لێرەدا دکتۆر هێمن پزیشكی نەخۆشیەکانی جومگە و ئێسک و ڕۆماتیزم و فەقەرات پلانێکی گونجاوی خواردنی تەندروستی خستۆته ڕوو:
ژەمی پارشێو بۆ نەخۆشانی ڕۆماتیزم
1- نانی شۆڤان، بادەم یان نانی گەنمی تەواو (لەبری ئاردی سپی) بۆ وزەی بەردەوام.
2-خواردنی دەوڵەمەند بە پرۆتین – هێلکەی کوڵاو، ماست، یان پرۆتینی ڕووەکی وەکو نۆک و نیسک بۆ پاراستنی تەندروستی ماسولکەکان.
3-چەوری تەندروست – مشتێک گوێز، بادەم، تۆوی کەتان، یان تۆوی چیاسید بۆ کەمکردنەوەی هەوکردن.
4- سەوزە و میوە – توو (شوتی، بلوبێری)، مۆز، خەیار، یان سەوزەی گەڵادار .
5- ئاوخوردنەو بڕێکی زۆر ئاو و چای گیایی (چای زەنجەفیل یان زەردەچەوە) بۆ کەمکردنەوەی ڕەقبوونی جومگەکان.
ژەمی بەربانگ بۆ نەخۆشانی ڕۆماتیزم
1-لە خورما و ئاوەوە دەست پێ بکە – خورما وزەیەکی خێرا و کانزای پێویست دەدات.
2- شۆربای سووک – شۆربای نیسک، شۆربای سەوزە، یان شۆربای ئێسک بۆ پشتگیریکردنی تەندروستی جومگەکان. دوور بکەوەرەوە لە شۆربای کرێمدار یان سوێر.
3-پرۆتینی بێ چەوری –ماسی بەتایبەت سەلەمۆن (دەوڵەمەندە بە ئۆمیگا 3)، مریشکی بێ پێست، یان پرۆتینی ڕووەکی وەک فاسۆلیا و پاقلەمەنییەکان.
4- کاربۆهیدراتی ئاڵۆز– برنجی قاوەیی، پەتاتەی شیرین، یان دانەوێڵەی تەواو لەبری کاربۆهیدراتی پاڵاوتە.
5- سەوزە – سەوزەی گەڵادار، گێزەر، کولەکە، یان بیبەر بۆ ڤیتامین و کانزاکان.
6- چەوری تەندروست – زەیتی زەیتون، ئەڤۆگادۆ، یان گوێز لەبری خواردنی سورکراوە.
ئەو خۆراکانەی کە دەبێت لێیان دوور بکەویتەوە بۆ نەخۆشانی نەخۆشی ڕۆماتیزم
-خۆراکی پرۆسێس کراو (دروستکراو) و سورکراوە – دەبێتە هۆی هەوکردن و ڕەقبوونی جومگەکان.
-خواردنەوە و شیرینی شەکردار – لەوانەیە هەوکردن و ماندوێتی خراپتر بکات.
-گۆشتی سوور و شیرەمەنی – دەبێتە هۆی هەوکردن لە هەندێک نەخۆشدا.
-خۆراکی سوێر – لەوانەیە ببێتە هۆی کۆبوونەوەی ئاو و خراپترکردنی ئاوسانی پەلەکان.
PM:05:29:11/03/2025
ئه‌م بابه‌ته 720
جار خوێنراوه‌ته‌وه