چ کاتێک ڕۆژوو مەترسی هەیە بۆ دایک و کۆرپە؟
وێستگە ستایل-
ڕۆژووگرتن لە کاتی دووگیانیدا لە هەندێک بارودۆخدا دەبێتە حاڵەتێکی مەترسیدار بۆ هەردوو دایک و کۆرپە، دکتۆرە دلۆڤان پسپۆری نه‌خۆشیه‌کانی ژنان و منداڵبوون باس له‌و حاڵه‌تانه ده‌كات كه به‌هۆی ڕۆژوه‌وه مه‌ترسی له‌سه‌ر دایك و كۆرپه دروست ده‌بێت.
ئەو مەترسییە سەرەکییانە بریتیین لە؛
1-ووشکبوونەوەی لەشی توند
-نیشانەکانی: ڕەنگی میزی تۆخ، سەرگێژخواردن، سەرئێشە، تینوێتی زۆر، یان زۆر کەم میزکردن.
-مەترسی: دەتوانێت ببێتە هۆی کەمبوونەوەی شلەی ئامنۆتیک، کاریگەری لەسەر گەشەکردنی منداڵەکە دەبێت و مەترسی منداڵبوونی پێشوەختە زیاد دەکات.
2-گەشەی خراپی کۆرپەلە
-ئەگەر منداڵەکە بە باشی گەشە نەکات، ئەوا بەڕۆژووبوون دەبێتە هۆی سنووردارکردنی ماددە خۆراکییە پێویستەکان.
-مەترسی: کەمی کێشی لەدایکبوون، کێشەی گەشەکردن، یان ئاڵۆزییەکان لە کاتی منداڵبووندا.
3-نەخۆشی شەکرەی دووگیانی و کێشەکانی شەکری خوێن
-بەڕۆژووبوون دەبێتە هۆی دابەزینی شەکری خوێن یان بەرزبوونەوەی شەکر لە خوێندا دوای بەربانگ.
-نیشانەکانی: لەرزین، ئارەقکردنەوە، سەرلێشێواوی، یان ماندوێتی زۆر.
4-مەترسی منداڵبوونی پێشوەختە یان لەبارچوون
-ئەگەر دایکەکە پێشینەی لەبارچوون یان منداڵبوونی پێشوەختەی هەبوو، ئەوا بەڕۆژووبوون مەترسییەکەی زیاد دەکات، بەتایبەتی لە سێ مانگی سێیەمدا کاتێک منداڵەکە پێویستی بە ماددە خۆراکییە زیاترەکانە.
ئەگەر ئافرەتی دووگیان لە کاتی بەڕۆژووبووندا تووشی هەریەکێک لەم کێشانە بوو، پێویستە دەستبەجێ ڕۆژووەکەی بشکێنێت و ڕاوێژ بە پزیشک بکات.
PM:01:28:06/03/2025
ئه‌م بابه‌ته 792
جار خوێنراوه‌ته‌وه