گورچیله‌ی به‌راز بۆ ئافره‌تێك دانرایه‌وه
وێستگە ستایل-
توانا لۆنی ئه‌و ئافره‌ته ئه‌مه‌ریكیه ته‌مه‌ن 53 ساڵه‌یه كه خاوه‌نی ته‌نها یه‌ك گورچیله‌یه و ئه‌ویش له‌كاركردن وه‌ستاوه، مانگی ڕابردوو نه‌شته‌رگه‌ری چاندنه‌وه‌ی گورچیله‌ی به‌رازی بۆكراوه، به‌مه‌ش لۆنی بۆته سێهه‌م كه‌س كه گورچیله‌ی به‌راز وه‌ربگرێت، و هێشتا ئه‌م جۆره نه‌شته‌رگه‌ریه له قۆناغی تاقیكردنه‌وه‌دایه.
پاش 3 هه‌فته له نه‌شته‌رگه‌ریه‌كه‌ی، لۆنی سه‌باره‌ت به‌و نه‌شته‌رگه‌ریه كه بۆی ئه‌نجامدراوه ده‌ڵێت" هه‌ست ده‌كه‌م چانسی دووه‌مم پێبه‌خشراوه له‌م ژیانه‌دا"
ساڵی 1999 ئه‌م خانمه گورچیله‌یه‌كی خۆی به‌خشیوه به دایكی، خۆی ماوه‌ی 8 ساڵ شۆردنه‌وه‌ی ئه‌و تاكه گورچیله‌یه‌ی بۆ كراوه كه توشی كاریگه‌ری لاوه‌كی بووه به‌هۆی دووگیانیه‌وه.
ئه‌م ئافره‌ته ئه‌مه‌ریكیه له ویلایه‌تی ئالاباما له باشووری ئه‌مه‌ریكا ده‌ژی، له‌ساڵی 2017 ه‌وه داواكاری پێشكه‌شكردوه بۆ ئه‌وه‌ی گورچیله‌ی مرۆڤێك وه‌ربگرێت به‌ڵام تا ئێستا هیچ كه‌سێك نه‌بووه گورچیله‌ی بداتێ.
له‌ماوه‌ی ڕابردوودا به‌ته‌واوه‌تی دۆخی ته‌ندروستی تێكچووه، به‌رواری 25 ی مانگی 11 ی ئه‌مساڵ پزیشكه‌كان بڕیاریانداوه گورچیله‌ی به‌رازێكبده‌ن به لۆنی كه له‌ڕووی پێكهاته‌ی بۆماوه‌ییه‌وه ده‌ستكاری كراوه و جه‌سته ڕاسته‌وخۆ ڕه‌تی ناكاته‌وه.
ئه‌مه یه‌كه‌مجار نییه ئه‌م نه‌شته‌رگه‌ریه ده‌كرێت و ساڵی 2022 تیمێكی پزیشكی دیكه‌ی ئه‌مه‌ریكی یه‌كه‌م دڵی به‌رازیان بۆ مرۆڤێك دانایه‌وه پاش 2 مانگ له‌نه‌شته‌رگه‌ریه‌كه نه‌خۆشه‌كه گیانی له‌ده‌ستدا.
PM:08:34:18/12/2024
ئه‌م بابه‌ته 932
جار خوێنراوه‌ته‌وه