ئه‌نجامی توێژینه‌وه‌یه‌كی نوێ ئاشكرای كردوه‌ سه‌دان جۆری ڤایرۆس له‌سه‌ر فڵچه‌ی‌ خاوێنكردنه‌وه‌ی‌ ددان و دوشی حه‌مام ده‌ژین چونكه‌ ئه‌م دوو شوێنه‌ زۆر گونجاون بۆ گه‌شه‌ی‌ میكرۆبه‌كان به‌هۆی ئه‌وه‌ی‌ جێگایه‌كی شێدارن.

به‌گوێره‌ی‌ ئه‌م توێژینه‌وه‌یه‌ كه‌ تۆڕی"CNN" ی ئه‌مه‌ریكی بڵاویكردۆته‌وه‌ تیایدا ئاماژه‌ بۆ ئه‌وه‌ كراوه‌" ئه‌و ڤایرۆسانه‌ی‌ له‌سه‌ر فڵچه‌ی‌ خاوێنكردنه‌وه‌ی‌ ددان و سه‌ری دوشی حه‌مام ده‌ژین هۆكاری توشبوونه‌ به‌ په‌تای وه‌رزی و ئه‌نفلۆنزا، له‌ توێژینه‌وه‌كه‌دا كه‌ سامپڵی چه‌ند فڵچه‌یه‌كی ددان و دوشی حه‌مام وه‌رگیراوه‌ ده‌ركه‌وتوه‌ به‌كۆی گشتی 614 ڤایرۆسی جیاواز له‌سه‌ر دوشی حه‌مام هه‌بووه‌، به‌شێكیان سه‌رچاوه‌كه‌یان ئاوی ناو گه‌رماوه‌كه‌ و فڵچه‌ی‌ ددان و ژینگه‌ی‌ گه‌رماوه‌كه‌ دروستبوون"

له‌م باره‌یه‌وه‌ مامۆستای یاریده‌ده‌ر له‌ كۆلێجی ماكۆرمیك تایبه‌ت به‌ ئه‌ندازیاری له‌ زانكۆی نۆرس وسترن "ئه‌یریكا هارتمان" باسی له‌وه‌ كردوه‌ ژماره‌ی‌ ئه‌و ڤایرۆسانه‌ی‌ له‌سه‌ر ئه‌م دوو پارچه‌یه‌ دۆزراوه‌ته‌وه‌ زۆر زۆره‌، به‌شێك له‌م ڤایرۆسانه‌ پێشتر نه‌مان بینیون و زانیاریمان زۆر كه‌مه‌ له‌باره‌یانه‌وه‌"

ئه‌م پسپۆڕه‌ ده‌شڵێت" ئه‌و میكرۆبانه‌ی‌ بوونیان هه‌یه‌ به‌ به‌رده‌وامی له‌ ده‌وروبه‌رمان هه‌ن، ناتوانین خواردن هه‌رس بكه‌ین و جه‌سته‌مان ته‌ندروست بێت ئه‌گه‌ر میكرۆبه‌ سوودبه‌خشه‌كان له‌ جه‌سته‌ماندا نه‌بێت"