مەنعی کتوپڕ چییه؟
وێستگە ستایل-
بوونی دووگیانییەکی بێ پلان بۆ هەندێک کەس ناڕەحەتکەرە و هەندێک ڕووداویش وەک دڕانی کۆندۆم، ڕەنگە ببێتە هۆی ترس سەبارەت بە ئەگەری دووگیانی، مەنعی کتوپڕ، جۆرێکە لە کۆنتڕۆڵی دووگیانبوون کە بۆ ڕێگریکردن لە دووگیانی بەکاردێت دوای جووتبوونی بێ پارێز یان شکستی ڕێگری لە دووگیانی، دکتۆرە دلۆڤان پسپۆری نه‌خۆشیه‌کانی ژنان و منداڵبوون له‌م بابه‌ته‌دا ورده‌كاری زیاتر ده‌خاته ڕوو.
دوو جۆری سەرەکی مەنعی کتوپڕ هەیە:
1. حەبی ڕێگری لە دووگیانی فریاگوزاری (ECP):
- زۆرترین بەکارهێنانی (لیڤۆنۆرجیسترێل) کە وەک یەک حەب دەخورێت.
- پێویستە بە زووترین کات دوای سێکسی بێ پارێزراو بخورێت، باشترە لە ماوەی ٧٢ کاتژمێردا بخورێت، بەڵام دەتوانێت تا ١٢٠ کاتژمێر (٥ ڕۆژ) دوای سێکس کاریگەر بێت.
-بۆ ڕێگریکردن لە دووگیانی ئاسایی نین بەڵکو بۆ بارودۆخی نائاسایی و کتوپڕ بەکاردێن.
2. ئامێری مسی ناو منداڵدان(IUD) ، لەولەب:
-ئامێری مسی ناو منداڵدان ئامێرێکی پلاستیکی بچووکە لە شێوەی T لەناو منداڵدان دادەنرێت بۆ ڕێگریکردن لە دووگیانی.
- لە ماوەی 5 ڕۆژدا لە دوای سێکسی بێ پارێزراو کە ئامێرێکی منداڵدانی نا هۆرمۆنیە دەتوانرێت لەلایەن پزیشکەوە بخرێتە ناوەوە.
- ڕێگری لە دووگیانی بەردەوام دابین دەکات و دەتوانرێت لە شوێنی خۆیدا بەجێبهێڵرێت بۆ بەکارهێنانی درێژخایەن بۆ ماوەی ٥-١٠ ساڵ
حەبی ڕێگری لە دووگیانی فریاگوزاری چۆن کاردەکات؟
حەبی ڕێگری لە دووگیانی فریاگوزاری بەم شێوەیە کاردەکات:
-دواخستنی دابەزاندنی هێلکە (دەردانی هێلکە لە هێلکەدان)، ئەمەش ئەگەری ڕوودانی پیتاندن کەمدەکاتەوە.
-ڕێگریکردن لە پیتاندنی هێلکە لە ڕێگەی گۆڕینی شێوازی جوڵەی سپێرم لە جەستەدا.
-بەڵام ئەگەر پیتاندن و چاندن پێشتر ڕوویدابێت، ئەوا کاریگەر نابێت لە ڕێگریکردن لە دووگیانی، هەروەها کاریگەری لاوەکی لەسەر کۆرپەلە نابێت ئەگەر پێشتر هێلکەکە پیتێندرابێت، هەروەها نابێتە هۆی لەبارچوون.
-حەبی ڕێگری لە دووگیانی فریاگوزاری مەترسی دووگیانی 75%-89% کەم دەکاتەوە، حەبەکان باشترین کاریگەرییان هەیە ئەگەر بە زووترین کات دوای سێکسی بێ پارێزراو (لە ماوەی سێ ڕۆژدا) بخورێت.
PM:07:55:07/09/2024
ئه‌م بابه‌ته 900
جار خوێنراوه‌ته‌وه