بنێشت له پلاستیك دروستده‌كرێت؟
وێستگە ستایل-
بۆ خۆشكردنی تام و بۆنی ده‌م و هه‌ندێكجار دووركه‌وتنه‌وه له كێشانی جگه‌ره و چه‌ندین هۆكاری دیكه زۆر كه‌س بنێشت ده‌جوون، به‌ڵام ئه‌نجامی نوێترین توێژینه‌وه ڕاستی مه‌ترسیداری له‌سه‌ر ئه‌م بابه‌ته ئاشكرا كردوه.
ئه‌نجامی توێژینه‌وه‌یه‌كی نوێ كه زاناكان له زانكۆی"كوینز بلفاست" بڵاویان كردۆته‌وه تیایدا هاتووه" جوینی بنێشت هۆكاره بۆ ئه‌وه‌ی هه‌زاره‌ها وردیله‌ی پلاستیك بچێته ناو لیكه‌وه" ئه‌گه‌رچی هێشتا ئه‌م بابه‌ته توێژینه‌وه‌ی له‌سه‌ر ده‌كرێت به‌ڵام پسپۆڕان ڕێنمایی هاوڵاتیان ده‌كه‌ن جوینی بنێشت كه‌م بكه‌نه‌وه.
له توێژینه‌وه‌كه‌دا ئاماژه بۆ ئه‌وه كراوه له پێكهاته‌ی بنێشتدا وردیله‌ی پلاستیكی هه‌یه به‌ته‌واوه‌تی هاوشێوه‌ی ته‌واوی ئه‌و به‌رهه‌مانه‌ی ڕۆژانه ده‌یخۆین و به‌ركه‌وتنمان هه‌یه له‌گه‌ڵیان و پلاستیكی تیادایه، ئه‌م وردیلانه‌ش قه‌باره‌كه‌یان له‌نێوان یه‌ك مایكرۆمیته‌ر بۆ 5 میلیمه‌تره، ئه‌وه‌ی جێگای مه‌ترسییه هێشتا كاریگه‌ری درێژخایه‌نی ئه‌م وردیله پلاستیكانه له‌سه‌ر ته‌ندروستی مرۆڤ ڕوون و ئاشكرا نییه"
بنێشت له پێكهاته‌یه‌كی لاستیكی و تام دروستده‌كرێت هه‌ندێك جۆری بنێشت له مادده‌ی سورشتی دروستده‌كرێت به‌ڵام ئه‌وانه‌ی مادده‌ی لاستیكی له‌دروستكردنیان به‌كارده‌هێندرێت له پۆلیمه‌ر و نه‌وت دروستده‌كرێن.
شایه‌نی باسه له‌ماوه‌ی ئه‌مساڵدا توێژینه‌وه‌یه‌ك له‌سه‌ر خانه شێرپه‌نجه‌ییه‌كانی گه‌ده بڵاوكراوه‌ته‌وه و تیایدا هاتووه" خانه شێرپه‌نجه‌ییه‌كانی گه‌ده كاتێك خواردنێك ده‌خورێت و پلاستیكی تیادا بێت ئه‌وه گه‌شه‌ی خانه شێرپه‌نجه‌ییه‌كان زیاتر ده‌بێت"
PM:10:23:02/04/2025
ئه‌م بابه‌ته 396
جار خوێنراوه‌ته‌وه