ژاپۆن ڕێگایه‌كی نوێی داناوه بۆ ئه‌و منداڵانه‌ی دایك و باوكیان نایانه‌وێن
وێستگە ستایل-
نه‌خۆشخانه‌یه‌ك له تۆكیۆ وه‌ك یه‌كه‌م دامه‌زراوه‌ی پزیشكی له پایته‌ختی ژاپۆن سیستمێكی نوێی داناوه بۆ ئه‌و دایك و باوكانه‌ی ناتوانن منداڵه‌كانیان په‌روه‌رده بكه‌ن له‌قۆناغی ساواییه‌وه منداڵه‌كانیان به‌شێوه‌یه‌كی نهێنی و سه‌لامه‌ت لێوه‌رده‌گرن.
ئه‌م سیستمه 24 كاتژمێر له ته‌واوی ڕۆژه‌كانی هه‌فته كراوه‌یه و دایك و باوك ده‌توانن ئه‌و منداڵانه بخه‌نه ئه‌م شوێنه كه ته‌مه‌نیان له یه‌ك مانگ كه‌متره و شوێنه‌كه له لایه‌ن دامه‌زراوه‌ی"سانیكۆكای" مه‌سیحی به‌ڕێوه ده‌برێت.
به‌ڕێوبه‌ری نه‌خۆشخانه‌ی"هیتۆشی كاتۆ" له كۆنگره‌یه‌كی ڕۆژنامه‌نوسیدا وتویه‌تی" ئه‌م هه‌نگاوه وه‌ك ڕێگایه‌كی به‌په‌له‌یه بۆ ڕزگاركردنی ژیانی ئه‌و منداڵانه‌ی دایك و باوكیان نایانه‌وێن، هێشتا ژماره‌یه‌ك دایك هه‌ن كه پاش له‌دایكبوونی كۆرپه‌كه‌یان شوێن نییه بۆی بڕۆن له‌به‌ر ئه‌وه منداڵه‌كه‌یان له باخچه یان كه‌نار ئاو یان جێگای خراپ فڕێده‌ده‌ن"
ئه‌م سیستمه بۆته جێگای ناڕه‌زای هاوڵاتیان، چونكه لایان وایه به‌م هۆكاره منداڵ بێ به‌ش ده‌بێت له زانینی ناسنامه‌ی خێزانه‌كه‌ی.
منداڵه‌كه پاش وه‌رگرتنی له‌لایه‌ن دایك و باوكیه‌وه ده‌درێت به خێزانێكی وه‌رگر یان ده‌برێته سه‌نته‌ری چاودێری و گرنگی پێدانی منداڵ.
PM:09:43:02/04/2025
ئه‌م بابه‌ته 404
جار خوێنراوه‌ته‌وه