‌بارزانی و لێڤەگەڕی سلێمانی!
PM:05:35:04/01/2016
سلێمان عەبدوڵا یونس

گرنگی دەستپێشخەرییەکەی بارزانی لەمیکانیزمەکانی دایە، بەتایبەت ئەمجارەیان کەئەو لەپێناو گەیشتن بەچارەسەر، دیواری یەکەمی ڕووخاندو لەودیوی عەنتەریات و فعلە ناجۆرەکانی ماوەکانی ڕابردووی پارتیەوە، خواستی هاویشتنی کۆمەڵێک هەنگاوی گرنگی بەکراوەیی ڕووەو ئەودیوی دێگەڵە خستەڕوو.

راستە بارزانی دیواری یەکەمی ڕووخاند، بەڵام هەمدیس قەدەریەتی دیواری دووەمیش ببڕێت و هەر خۆی یەکەمین کەس بێت ئەو هەنگاوە پراکتیکیانە ڕووەو تێپەڕاندنی دیواری دووەمی دێگەڵە بهاوێژێت و گرفتەکان بەڕوونی ببینێت.

گرفتی ئەم دیوی دێگەڵە بەتەنها گرفتی موزایەدەی نێوان هێزەکان نییە. بەڵکو گرفتەکە لەپەرشوبڵاوی حزبی و پیلانی سەر لێڤەگەڕێکی سیاسی بەقودەرەت دایە. لێڤەگەڕێک،کەتوانای هەیە لەسەعاتی سفردا کۆچانەکەی مام جەلال تاو بداتێ و باڵەکانی یەکێتی و ئەم دیوی دێگەڵە بۆ خوڵقاندنی حەدەسێکی دیکەی مێژوویی ساز بکاتەوە.

ڕەنگە لێرەدا گرفتی بارزانی لەهاویشتنی هەنگاوی عەمەلیدا کزو لاوازبوونی پارتی بێت لەکاتێکدا ئەو حزبە چوارشانە و قەڵەو دەبینرێت. 

بەڵام لەڕاستیدا چارە نییە و دەبێت بارزانی لەپێناو گەلێکی بێ دەرەتان و ڕووت و برسیدا ڕیسکە گەورەکە بکات و چاوەڕێی هیچ فریادڕەسێکی تر نەکات. چونکە با لە بارزانی مەعلوم بێت، بەدوور لەنەڕەنەڕو موزایەدەکانی ناو میدیا، گۆڕان و یەکێتی، لەغیابی مەرجەعێکی وەک مام جەلال، هەریەکەیان بەدەست سەرو عەقڵێکی حزبی بڕیار بەدەستی نەخۆشتر لەهی پارتیەوە 
دەناڵێنن!


ئه‌م بابه‌ته 602 جار خوێنراوه‌ته‌وه‌‌
هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی



Copyright 2017. westganews.com. All Rights Reserved.