ئێستا زانیتان من گەندەڵکارم؟

چەند مانگ و ڕۆژێکە دەوترێ چاکسازی دەکرێ ، خەیاڵ کردن بۆیە خۆشە چونکە بێ سنور و سانسۆرە ، لە خەیاڵی خۆم دەمگوت:

بڵێی سەروەت و سامانی چەندین ساڵەمان بۆ بگێڕنەوە و ئەوانەی بەم دزییە بوون بە خاوەن مۆڵ و بەنزینخانەو ڤێللاکان ڕاپێچی دادگا بکرێن و پێیان بڵێن:

من ٲین لك هذا ؟
ئیتر ئەوە هەر خەیاڵێک بوو وەک خەیاڵی ئەو هەموو گەنجە نازدارە گیرفان بەتاڵ و کەمئەندامانەی کە خەون بە شۆڕش و لە ڕەگەوە هەڵکێشانی گەندەڵی دەبینن.

حزبە بچووکەکان لە بێدەنگی و بندیواری دەتلێنەوە، بۆیە پێویستە ئەندامانیان بەر لەوەی ڕەخنە لە پارتی و یەکێتی بگرن، بچن و هەڵکوتنە سەر دەزگاو بارەگاکانی خۆیان.

جووت حزبەکەش....
واااای لە جووت حزبەکە
دوو بەحڕن
لەوەتەی هەن
 یەلتەقیان
یەلتەقیان
سەد بەرزەخ لە نێوانیانە
لا یەبغیان
....
ئینجا دەرکەوت من گەندەڵکاری ڕاستەقینەم ، هاتن و چاکسازییان لە موچەکەم کرد ، کوڕە قەسەم بەخوا پێمخۆشە موچەکەم ببڕن ، بەس فەرموون حاڵی ئەو خێزانە کرێچییە باش بکەن کە 500 هەزارەکەتان کردووە بە 395 هەزار.
لە کۆتاییدا دڵنیابن ئەنجامی ئەو دۆخە لەم دوو خاڵە زیاتر نییە:

یەکەم : بەهۆی سەمع و تاعەی دەستەڵاتی کوردی بۆ وڵاتانی دراوسێ و زلهێز وەک سعودیەو ئیماڕات نەوەی دەرەبەگ و ئاغاکان کە دوێنێ و ئەمڕۆ جاش و موستەشارن و دەقیڕێنن بەسەر پزیشک و مامۆستا کە دوێنێ کوڕە هەژار بوون و پێیان وترا:

بخوێنن خوێندن مەرهەمە بۆ دیفاعی گەل
کەچی خوێندیان و هەمدیسان کوڕە ئاغاو دەرەبەگ حوکمیان کردن . ئینجا دوو هێڵی هەژاری و سەرمایەداری تۆخ و تۆختر دەبنەوە.

دووەم: چاکسازی و گۆڕاااااانێک کە تا ئێستا نە زەمینەسازی بۆ کراوە، نە پیاوەکانیشی دیارن.

PM:03:07:23/06/2020

ئه‌م بابه‌ته 2336 جار خوێنراوه‌ته‌وه‌‌

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی