هەرێمی كوردستان و میحوەربەندی لە ناوچەكەدا
ئازا حەسيب قەرەداخی
نزیكەی پێنج ساڵە، ئەمریكا بۆئەوەی لەبارەی توانای ئەتۆمییەوە لەگەڵ ئێراندا بگاتە رێككەوتنێك، چاوی لە بەشداریی ئێران لە درێژەدان بە جەنگ لە سووریا و مانەوەی رژێمی ئەسەد و مەینەتیی یەكجار زۆری خەڵكی ئەو وڵاتە پۆشی. ئێستا پاشی رێككەوتنەكە، ئێران بە هاوپەیمانیی روسیا و دروستكردنی میحوەر بەرامبەر ئەمریكا، وەڵامی چاوەڕوانییەكانی ئەمریكای دایەوە.
بەهۆی خاوەخاوكردنی ئەمریكا و هاوپەیمانەكانی لە یەكێتی ئەوروپا و پەیمانی ناتۆ و وڵاتانی عەرەبی لە چارەسەركردنی كێشەی سووریادا، دواجار بە هاوكاریی ئێران و بەغدا و رژێمی ئەسەد، رووسیا هەژموونی خۆی خستە سەر مەیدانی جەنگ لە سوریا و، بە تەوژمێكی توندی سەربازیی ئاسمانی و زەمینی هاتە ناو كێشەكەوە و لەو دەروازەیەشەوە گەڕایەوە ناوچەكە.
مۆسكۆ و تاران و بەغدا و دیمەشق میحوەری (مۆ تا بە د)ـیان راگەیاندووە و، خۆیان دەڵێن بۆ ئاڵوگۆڕكردنی زانیاریی هەواڵگرییە لەبارەی داعشەوە، بەڵام لە مەیدانی شەڕدا زۆر لەوە زیاترە و فرۆكەكانی روسیا بە خەستی بۆردوومانی هێزەكانی ئۆپۆزسیۆن دەكەن و كەمترین رۆكێتیش بەر مۆڵگەكانی داعش دەكەون.
هەروەها هێزی پیادەیش ئامادەن بۆ هاتە ناو مەیدانی شەڕەوە بۆ هاوكاریكردنی سوپاكەی ئەسەد و هێزەكانی ئێران و حزبوڵڵا و میلیشیا شیعییەكانی عێراق، كە لەوێن.
ئەو میحوەرە تەنیا میحوەری ژمارەیەك هاوپەیمان نییە بۆ شەڕێك و، ئامانجەكەیشی تەنیا مانەوەی دەسەڵاتەكەی بەشار ئەسەد نییە. بەڵكو لەوە زیاتر و قووڵترە.
ئەو میحوەرە میحوەری هێشتنەوەی جوگرافیای سیاسیی ناوچەكەیە وەك خۆی، لە كاتێكدا كە قسەكردن لەبارەی كۆتاییهاتنی نەخشەی سایكس بیكۆ و هەڵوەشانەوەی دەوڵەتە بەزۆر دروستكراوەكانی ناوچەكە و سەرلەنوێ داڕشتنەوەی نەخشەی ناوچەكە بۆتە وێردی سەر زمانان و پلانی نەخشەداڕێژەران و ناوەندە سیاسییە بڕیاردەرەكان لە جیهاندا، بەتایبەتیش لەلایەن ئەمریكا و هاوپەیمانەكانییەوە.
میحوەری (مۆتا بەد)، میحوەرێكی بەدە بۆ هێشتنەوەی دەوڵەتانێك كە لەسەر بناغەی باڵادەستیی ژمارەیەك نەتەوەی فاشی و شۆفێنی دروستكراون و، سەد ساڵە ئەنفال و جینۆساید و جیاكاریی نەتەوەیی بەرامبەر هەموو نەتەوە و پێكهاتەكانی غەیری خۆیان لە ناوچەكەدا پیاده‌دەکەن و مێژوویەكیان لە دیكتاتۆری و فاشییەت و كۆمەڵكوژی و كاولكاری و هەژاری و دواكەوتوویی ئابووری و كۆمەڵایەتی تۆماركردووە.
میحوەری (مۆتابەد)، میحوەری زیندووكردنەوەی دیكتاتۆری و عەسكەرتاری و تۆڕەكانی تیرۆر و جاسووسی و مافیاكانی بازرگانی تلیاك و چەكە لە ناوچەكەدا.
میحوەری (مۆتابەد)، میحوەری هەژموونی نەتەوەپەرستی فاشییانە و توندوتیژیی مەزهەبگەرایی و تایفییەتە، كە تەنیا توندوتیژیی تایەفەگەریی بەرامبەری بەرهەمهێناوە و، هەموو خەباتی گەلانی ئەو ناوچەیەی لەپێناوی گەشەكردن و خۆشگوزەرانی و دیموكراسیدا بەلارێدا بردووە و فڕێیداونەتە بازنەی شەڕی هەزار و چوارسەد ساڵەی شیعە و سوننەوه.
ئەو میحوەرە، كە رووسیا بۆ بەرامبەرێنە لەگەڵ ئەمریكا، سەركردایەتیی دەكات، ئێران و بەغدا و دیمەشق و حزبوڵڵای تێدا كۆبۆتەوە، كە هەموویان هێزگەلی شیعین و لە رواڵەتدا دژی هێزگەلی سوننەن لە قاعیدە و داعش و جەبهەی نوسرە، بەڵام ئەمان خۆیان بەهۆی سیاسەتی مەزهەبگەرایی و تایفییان و دەخالەتكردن لە كاروباری گەلان و ناوچەكە، هۆكار و زەمینەی لەبار بوون بۆ دروستكردنی رێكخراوە توندڕۆیەكانی سوننە و هەراشبوون و بڵاوبوونەوەیان. تەنانەت چەندین توێژینەوە و راپۆرتی سیخوڕییش هەن دەڵێن؛ ئەو رێكخراوە سوننە توندڕۆیانە لەلایەن بەشدارانی میحوەری(مۆتا بەد)ەوە هاوكاریی جۆراوجۆر كراون و دەكرێن. هێرشە ئاسمانییەكانی روسیا و بەشدارییە زەمینەییەكانی سوپای پاسداران و حزبوڵڵا و میلیشیا شیعییەكانی عێراق، دژی ئۆپۆزسیۆنی میانڕەوی سوریان و داعش بەهێز دەكەن.
لەوانە هەموویدا، ئیدارەی ئۆباما لۆمە كراو و رەخنەلێگیراوە. سیاسەتی دەرەوەی ئەو ئیدارەیە، بەتایبەتی لە كێشەی سوریا و شەڕی داعشدا، دواجار بووە هۆی دروستبوونی درز و بۆشایی، كە روسیا بە قەڵەمبازێك خۆی تێ فڕێدا و ئەو بۆشاییەی پڕ كردەوە.
كە میحوەری (مۆتا بەد) راگەیەنرا و كتوپڕ دەست بەكاربوو، ئەوسا ئۆباما دركی بە هەڵەكانی كرد و لە كۆنگرەیەكی رۆژنامەگەریدا لە كۆشكی سپییەوە هۆشداریی دایە هەر یەك لە روسیا و ئێران، كە لە شەڕی سوریادا داهاتوویەكی مەترسیدار چاوەڕوانیانە و ئەوان ناگەنە هیچ ئامانجێك، بەڵكو بە پێچەوانەوە دەكەونە زەلكاوەوە.
لە رێی (پەكەكە)ەوە، میحوەری (مۆتا بەد) توانیویەتی هێزگەلێكی كورد لە ناوچەكەدا بۆ ئامانجە هەنووكەیی و ئایندەییەكانی بەكاربهێنێ و تەنانەت دنەیان داون كە دژی خەونی نەتەوەیی و نیشتمانی كوردانیش قسە بكەن و بڵێن؛ دەوڵەتی نەتەوەیی باوی نەماوە و مەترسییە بۆ سەر گەلان و مایەی ماڵوێرانییە بۆ كورد. بەواتایەكی دیكە، هێزی كورد بەكاردەهێنن بۆ هەڵوەشانەوەی نەخشەیەك كە دەیەوێ نەخشەی ناوچەكە بگۆڕێ و، لەو گۆڕانكارییەشدا دەرفەتێك بۆ دروستكردنی قەوارەی كوردستانیی بڕەخسێ.
لە سەرینی ئەو دابەشبوونە لە ناوچەكەدا و بۆئەوەی پێگەی كورد لەو هاوكێشە ئاڵۆزانەدا بە هاوسەنگی بمێنێتەوە، هاوكات ماف و قوربانییەكانمان نەچنە سەبەتەی بەرژەوەندیی ئەوانەوە كە سەد ساڵە جینۆسایدمان دەكەن، سەرۆكایەتیی هەرێمی كوردستان هەڵوێستی خۆی راگەیاند.
هەرێمی كوردستان، هاوبەشێكی كاریگەرە لە هاوپەیمانێتیی نێودەوڵەتی بە سەرۆكایەتی ئەمریكا و، تەوەری سەرەكیی كێشەكەیشمان لەو قۆناغەدا لەناوبردنی داعشە و ئێمەی كوردستانیش تاكە هێزی سەرەكیی رووبەڕووبوونەوە و لێدانی داعشین لەسەر ئەرز، بۆیە هەرێمی كوردستان سوپاسی رووسیا و هەر دەوڵەت و لایەنێك دەكات ئەگەر لە شەڕی دژی داعشدا یارمەتیی پێشمەرگە بدەن. بێگومان هەماهەنگی و كاری هاوبەش لە نێوانی هاوپەیمانێتیی نێودەوڵەتی و رووسیا لە دژی داعش ئەنجامی باشتر و خێراتری دەبێ و، هەرچی زووترە ئەو مەترسییە بەرۆكی هەرێمی كوردستان بەردەدات و دەرگایش لەسەر ئایندە ده‌کرێته‌وه، بۆ گەشەكردن و چنینەوەی بەرهەمی سەرلەنوێ داڕشتنەوەی نەخشەی ناوچەكە.
PM:04:52:05/10/2015
ئه‌م بابه‌ته 2150
جار خوێنراوه‌ته‌وه
هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی