قۆناغی رۆمانسییەتی سیاسیمان بڕیوە

مانگی پێنجی داهاتوو، سەد ساڵ بەسەر راكێشانی نەخشەی سایكس بیكۆدا تێدەپەڕێ. پێشبینی دەكرێ ئەمساڵ ئەم نەخشەیە بگۆڕدرێ و لەو گۆڕانكارییەشدا كوردستان سەربەخۆیی مسۆگەر بكات. وەلێ كۆسپ و رێگری دێنە رێی ئەم گۆڕانكارییە، بەتایبەتی لەلای ئەو هێز و ناوەندانەوە كە كۆشش دەكەن ئەم گۆڕانكارییە روونەدات. ئێران و دەسەڵاتدارانی عێراق و سووریا زۆر سەرسەختانە بەرەنگاری ئەو گۆڕانكارییە دەكەن، تەنانەت ئەگەر بزانن هەر روودەدات، هەوڵ دەدەن دوای بخەن. یان مسۆگەری بكەن دەوڵەتی كوردستان تا چەند ساڵی دیكە بە دەست گرفتەكانی ئابووری و سیاسی و ئەمنییەوە بناڵێنێ و سەرقاڵ بێ، نەك بپرژێتە سەر خۆ دامەزراندن و گەشەكردن.

بڕینی بوودجەی هەرێمی كوردستان و مووچەی فەرمانبەران و خۆ بێبەریكردنی بەغداد لە دابینكردنی خزمەتگوزاریی بۆ دوو ملیۆن ئاوارە و جێهێشتنی چەك و ئیمكانیاتی سوپایەكی گەورە بۆ داعش و وەرگێڕانی ئاراستەی شەڕی داعش بۆ سەر كوردستان، ئینجا جموجوڵی ئیستیفزازییانەی حەشدی شەعبی و چەكدارانی پەكەكە، كردارگەلێكی نەخشەبۆداڕێژراون لە چوارچێوەی سیاسەتی دواخستن یان كێشە خستنە سەر رێی سەربەخۆیی.

پاشی پێكهێنانی ژووری عەمەلیاتی سەربەخۆیی و دیاریكردنی ئەركەكانی، چەندین بابەتی ناوخۆیی بۆ كۆسپ خستنە سەر رێی سەربەخۆیی ورووژێنران. لەوكاتەیشەوە لە مەیدانی ئەم ململانێیەدا هەر كارتێك دەسووتێ، كارتێكی دیكە لە جیاتی وی دەجوولێنرێ.

بەیاننامەی ئەنجوومەنی سیاسی كۆمەڵی ئیسلامی لە ساڵیادی دامەزراندنی سوپای عێراقدا، یەكێكە لە نموونەكان. لەوێدا كۆمەڵ بە چڕی هێرش دەكاتە سەر پێشمەرگە و بە "میلیشیا" ناوی دەهێنێ. هەروەها پێشمەرگە بە سوپاكەی سەددام حسێن دەشوبهێنێ و دەشڵێ ئەو شەڕەی لەگەڵ داعشدا دەیكات شەڕێك نییە بە خواستی خەڵكی كوردستان بەڵكو شەڕە بە خواستی حزبێك و سیاسەتمەدارێك. بۆیە دەرەنجامەكەیشی وەكو شەڕەكانی سەددام شكست و ماڵوێرانی دەبێ.

ئەم بەیاننامەیە پێماندەڵێ؛ هەڵمەتە ناوخۆییەكە گەیشتۆتە قۆناغی داماڵین لە هەموو ئەخلاقێكی سیاسی.
ئەمجۆرە وەسفكردن و پۆلینكردنی پێشمەرگەی داعششكێن تەنیا لە راگەیاندنی داعشدا هەیە. لەكاتێكدا هەموو جیهانی ئازاد دەڵێن شەڕی داعش شەڕی هەموومانە، كەچی كۆمەڵی ئیسلامی هەوڵ دەدات بچووكی بكاتەوە و تەنانەت بەشی ئەوەیشی پێوە نەهێڵێ كە شەڕی گەلی كوردستانە لەگەڵ ئەو دەوڵەتە تیرۆریستەدا. لەوەیشەوە ئیتر حەزی شكستهێنانی پێشمەرگە، تەنیا حەزی داعش نییە بەڵكو بۆتە حەزی كۆمەڵی ئیسلامیش.

كۆمەڵی ئیسلامی بۆچی ئەمە دەكات ؟! وەڵامەكەی ئەوەیە كە پێشمەرگە و سەركردایەتی سیاسی كوردستان و سەرۆك بارزانی دامەزرێنەر و پارێزەری سەربەخۆیی كوردستانن، بۆیە دەبێت لە بەهای ئازایەتی و یەكگرتوویی پێشمەرگە كەم بكرێتەوە و گومانیش بخرێتە سەر ئیرادەی سەركردایەتی سیاسی.
دەنگدانەوەیەكی دیكەی هەمان گوتار ئەوەیە، كە دەگوترێ: "با بە ئازایەتی پێشمەرگە نەنازین و بە رۆمانسییەتی سیاسی نەخەڵەتێین".

پێشمەرگەی كوردستان، جیاواز لە دوو دەوڵەتی عێراق و سوریا، كە خودان لەشكری گەورەی پڕچەك بوون و لەبەردەم داعشدا چۆكیان دادا، بەرەنگاری كرد. پاشان شەڕەكەی لە قۆناغی بەرەنگارییەوە گواستەوە بۆ هێرش و ئەفسانەی داعشی تێكشكاند و لەمەیشدا قوربانی گەورەی داوە، ئیتر بۆچی بە ئازایەتی ئەم هێزەوە نەنازین؟!
ئەدی ئەوە كامەیە ئەو رۆمانسییەتە سیاسییەی نابێ پێی بخەڵەتێین؟! گومانم لەوە نییە كە مەبەست لە چەمكی "رۆمانسییەتی سیاسی" لەم سەروەختەدا تەنیا "سەربەخۆیی"ـە. ئەمەیش هەوڵێكی سیاسی- مێدیاییە بۆ بێئومێدكردنی رای گشتی لە واقیعێك كە بەرجەستەیە و، فاكتە نێودەوڵەتییەكان بە گشتی و بەشێكی كاریگەر لە فاكتە هەرێمایەتییەكان لە بەرژەوەندی وی وەرگەڕاون.

هەڵمەتێكی تەبلیغاتیی هەیە، دەیەوێ بە خەڵكی كوردستان بڵێ سەربەخۆیی رۆمانسییەتە و بڕوای پێ مەكەن. بەڵام، هەموو رۆژێ گەلی كوردستان بە هەنگاوێكی دیكەی نزیكتربوونەوە لە سەربەخۆیی وەڵام دەداتەوە و، لەم ململانێیەدا كارتێكی دیكەی نەیارانی دەسووتێنێ.
پێشمەرگە هێزی پارێزەری سەربەخۆییە، بۆیە بنكەكانی تەبلیغات دژی سەربەخۆیی دەیانەوێ خەڵكی كوردستان متمانەیان پێی نەبێ و بە ئازایەتییەكەی نەنازن. بەڵام، هەموو رۆژێ پێشمەرگە بە سەروەرییەكی تر و بە تۆماركردنی داستانێكی نوێ وەڵام دەداتەوە و، پێگەی خۆی لەسەر تخووبی دەوڵەتی چێ بووی ئایندە توندتر دەكات.

PM:01:46:11/01/2016

ئه‌م بابه‌ته 2204 جار خوێنراوه‌ته‌وه‌‌

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی