‌تكایە لەهەولێرەوە وێنەی پاڵەوانی درۆینە نیشان مەدەن
PM:07:31:10/02/2021
گۆران عەلی کەریم


ئەوكاتەی مام جەلال سەرۆك كۆمار بوو لەچەند شوێنێك باسی لەوە كردبوو كە ئەو چەند خەریكی بردنە پیشەوەی كارەكانیەتی وەك سەرۆك كۆمار، ئەوەندەش خەریكی پینەكردنی لێدوان و راگەیاندنەكانی سەرۆكی هەرێمە. زۆرجار مام جەلالەوە ئەوەوە بیسراوە، كە لایەنە عێراقییەكان بەو لێدوانەی بەرپرسانی هەرێم ئیستفزازكراون و ئەوانیش رق ئەستور بوون بەرامبەر هەرێمی كوردستان و خەڵكەكەی. ئیستاشی لەگەڵدا بیت گرفتەكە هەرماوە و لێدوان و راگەیاندنەكانی سەرۆكی حكومەت و بەرپرسەكانی تر، گرفتی گەورەیان بۆ تیمی دانوستانكارانی كورد لەبەغداد دروست كردوە، تەنانەت كار گەیشتە ئەوڕادەیەی بەناچاری ئەو كوردانەی لە لیژنەی دارایی ئەنجومەنی نوێنەرانن بەراگەیاندنێك تكایان كرد، بالەهەرێمەوە بەلێدوانەكانیان گرفت و ئاڵۆزی دروست نەكەن بۆ تیمی دانوستكاران لەبەغداد.
 
لەبەغداد جگە لە  هەوڵەكانی شاندی هەرێم تیمێكی تریش لەنوێنەرانی كورد هەوڵەكانیان چركردۆتەوە بۆ ئەوەی رێككەوتن لەنێوان هەرێم و بەغداد بكریت و پشكی كورد لە پرۆژە یاسایی  میزانییە بەشێوەیەكی گونجاو شایستە جێگیر بكرێت، تیمی هاوپەیمانی هیوا و پەرلەمانتارە كوردەكان  لەهەموو فراكسیۆنەكان و سەرۆك كۆمار، پێكەوە هەوڵەكانیان چركردۆتەوە، تا رێگە خۆش بكەن بۆ رێككەوتن، بۆ ئەو مەبەستەش چەندین دانیشتنیان لەگەڵ لایەنە پەیوەندیدارەكانی ناوپەرلەمان و لایەنە سیاسییەكان سازكردوە، سەرۆك كۆمار د. بەرهەم ساڵح بەدور لەئاراستەی سیاسی و حزبی لەگەڵ هەموولایەنە سیاسیەكانی هەرێم راوێژدەكات و توانا و پەیوەندیە دبلۆماسیەكانی خۆی خستۆتە گەڕ تا ئەو بەستەڵەكەی نێوان هەرێم و بەغداد بشكێنێت.

كەچی ئەوەتا لەهەولێرەوە لەباتی دەستخۆشی و پێزانین تانە لەو هەڵە بەردەوامانە دەدرێت و ئەو پرسەش تێكەڵ بە ئەجێندای حزبی و رق و كینە دەكرێت و بەوە تۆمەتبار دەكرێن كە ئەوان دژی رێككەوتنی هەرێم و بەغدادن و وەك لەمپەر لەبەردەم ئەو رێككەوتنە وێنەیەكی ناشرینیان بۆ دروست دەكرێت. دەرئەنجەمی ئەم لوتبەرزی و عینادیەی هەرێم جگەلە بێ باكی دەرهەق بە ژیان و گوزەرانی خەڵكی هەرێم و دەرخستنی ناكاراییان لە هونەری دانوستاندن هیچ شتێكی تر نیشان نادات، دیارە لای خەڵكی گریفان بەتاڵیش كە ماوەی چەند مانگە مووچەیان پێنەدراوەو حكومەت بێ باكانە دەڵێت ئەوەی بەردەستە ئەوە دابەش دەین و هیچ گرەنتیەك نیە بۆ موچە خۆران هاوڵاتیانی هەرێم كەحكومەت بەچی پێوەرێك مامەڵەیان لەگەڵ دەكات چونكە تائێستاش هیچ شەفافیەتێك لە داهاتی هەرێمدا نیە، بۆیە ئەم هەڵویستانە هەرگیز بەهەڵوێستی نەتەوەیی و كوردایەتی لێكنادرێتەوە جگە لەوەی دەبێتە مایەی تورەبوونی زیاتری خەڵك بەرامبەر بەم بێ باكییەی حكومەت و لایەنە باڵادەستەكان.




هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی



Copyright 2018. westganews.net. All Rights Reserved.