‌پلان لە پەیوەندییە گشتییەكاندا
PM:04:03:01/11/2018
چرۆ شه‌هاب‌

زۆر جار زۆرینەمان لە كاتی كێشە و گرفتەكاندا بەردەوام گلەیی و گازەندەكانمان ڕوو لە دەستەڵاتداران و حكومڕانان دەكەین كە بەهۆی بێ پلانیەوە دووچاری كێشەكان دەبینەوە، ئەمە لە كاتێكدا كە بە وردی لە شێواز و جۆری پلان شارەزاییەكی ئەوتۆ نیە و بەشێوازێكی هەڕەمەكی باس لەبون و نەبونی دەستەواژەی پلان دەكەین لە پڕۆسەی ژیانی كۆمەڵایەتی و دامەزراوەیی، بەهۆی زۆری و بەربڵاوی بەكارهێنانی ئەم دەستەواژەیە بە باشم زانی ئەگەر بەكورتیش بێت شتێك لە زانستی پلان لەبواری پەیوەندیە گشتییەكان بخەمە بەر دیدی خوێنەر.

لە كۆی سەرچاوە زانستیەكاندا پلان لە پەیوەندیەگشتییەكاندا بە شێوەیەكی گشتی دادەنرێت بە چالاكی زیهنی و توانا فیكریەكانی كە پشت بەستوون بە پسپۆڕی و شارەزایی زانستی، هەموو ئەمانەش بەئامانجی پێشبینی پێویستی و قەبارەی ئەوكارانە دێت كە لە چوارچێوەی كاتدا مامەڵەی لەگەڵ دەكرێت كە هەندێك جار دەشێت كاتەكە كورت یاخود درێژ مەودابێت، جگە لەوەش پلان بەردەوام لەگەڵ ڕاستیەكان مامەڵە دەكات.

پەیوەندیەگشتییەكان بەردەوام دادەنرێت بە یەكەم زانست لە زانستە كۆمەڵایەتیەكان كە پشت ئەستورە بە پلانی زانستی و دروست، هەربۆیە هەر چالاكییەكی ئامانجداری پەیوەندیەگشتییەكان بەدەست نایەت ئەگەر پشت بە پلانی سەركەوتوو نەبەستێت. پلان وەك كۆمەڵەی نێودەوڵەتی پەیوەندیە گشتییەكان پێناسی دەكەن و دەڵێن « پلان ئەركێكی كارگێڕیە كە سروشتێكی بەردەوامی هەیە لە ڕێگەیەوە ڕێكخراو و دامەزراوەگشتی و تایبەتەكان هەوڵی بەدەستهێنان و پارێزگاری كردنی هەموو ئەو لێك تێگەیشتن و هاوسۆزی و پشتیوانییانەی ئەو لایەنانەن كە گرنگیان پێدەدەن ئەویش لەڕێگەی هەڵسەنگاندنی ئەو ڕای گشتییەی كە پەیوەستە بە سیاسەت و جێبەجێكردنی ئەركەكانیان بەپێی توانا لەڕێگەی زانیاری پلان بۆ داڕێژراو و بڵاوكردنەوەی».

لەگەڵ ئەم باسەی پلان بێگومان بۆچونی تر هەیە لە بارەی پلان كە بە كارێك دادەنرێت كە بەشێوازێكی لۆژیكی ڕێكخراو كار لەسەر شیكردنەوەی توانا مرۆیی و دارایی و مەعنەویەكان دەكات و بە باشترین شێواز ڕێكیان دەخات ئەویش بە مەبەستی گەیشتن بە ئامانجە دیاریكراوەكەیە.

لە گرنگیەكانی چەمكی پلان ئەوەیە كە یارمەتیدەرە بۆ خستنە ڕووی شێوازی كاركردن و ئامانجەكەی كە دواجار لەخزمەت خستنە سەر رێگەی ڕاستی ئەرك و كار و پرۆژەكانە، لەگەڵ ئەمانەشدا پلان یارمەتی دەرێكی باشە لە دیاریكردنی قۆناغەكانی جێبەجێكردنی هەموو ئەوكار و پڕۆژانەی خراونەتە بەردەست، بێگومان خاڵێكی تری پلان ئەوەیە كە گرفت و كێشەكان دەخاتە ڕوو، هەروەها توانای هەیە چارەسەریەكانیش بەردەست بخات. دوو جۆری سەرەكی پلان هەن كە لەڕووی بنەما زانستیەكانەوە دەست نیشان كراون ئەوانیش:

یەكەم : پلانی خۆپارێزیە:
لەم جۆرەی پلاندا پشت ئەستورە بە توێژینەوە و زانستی سەردەمیانە كە ئامانج لێی دووربینی و دور مەوداییە لە چوارچێوەی پەیوەندیەكانی نێوان هەر دامەزراوەیەك و جەماوەرەكەی،لەم جۆرەی پلاندا كاردەكرێت لەسەر ڕەوینەوەی ئەو لێك تێنەگیشتن و بەربەستانەی كە دێنە بەردەم بەرژەوەندی دامەزراوەكە، هەندێك جار ئەو بەربەست و لێك تێنەگەیشتنانە كورت یاخود درێژ مەودان.

دووەم: پلانی چارەسەر:
لێرەدا پسپۆڕانی بواری پەیوەندیە گشتییەكان ناوزەندی دەكەن بە (پلانی قەیرانەكان) ئەم پلانە بە شێوازێكی مەیدانی ڕووبەڕوی ئەو قەیران و گرفتانە دەبێتەوە كە دووچاری دامەزراوەكە بووە و بەردەوامە لە چارەسەركردنی. بێگومان پلان وەك هەر كار و ئەركێكی بەردەوام لە ناو دامەزراوە گشتی و تایبەتەكان لەگەڵ دەرخستنی شێواز و تێگەیشتنی زانستیانە بۆی وە دیاریكردنی جۆرەكانی، پێویست دەكات قۆناغەكانیشی دیاری بكەین، ئەویش خۆی دەبینێتەوە لە قۆناغی ئامادەكردنی پلان كە تیایدا گرفتی سەرەكی دەستنیشان دەكرێت و واقیعی حاڵی دامەزراوەكە دەخرێتە بەرچاو، قۆناغی دووەم قۆناغی جێبەجێكردنی پلانەكەیە و بە دواشیدا لە قۆناغی سێیەم بێگومان چاودێریكردن و بەدوادا چون دێت كە تیایدا بۆمان دەردەخات تاوەكو چەند توانراوە پلانەكە وەك خۆی جێبەجێبكرێت.

لەبیرمان نەچێت كە هۆكاری سەركەوتنی هەر پلانێك دەگەڕێتەوە بۆ چەندین هۆكار كە هەندێكیان خۆی دەبینێتەوە لە دیراسەكردنی ووردی پرۆژەكە لەگەڵ دابەشكردنی ئەرك و ڕۆڵی كاركردنی نێو گروپ و دەستەكان، هەروەها پشت بەستن بە هەڵبژاردنی باشترین شێوازی پەیوەندیكردن بە جەماوەر دامەزراوەكە، لە هەموو ئەمانەش گرنگتر ئەوەیە كە دان بەهەڵەكانی خۆماندا بنێین و ببێتە وانەیەك بۆ داهاتوو، كۆتا هۆكاری سەركەوتنی پلان دەگەڕێتەوە بۆ دانانی پلان لەلایەن كەسانی پسپۆڕ و بەئەزمون و لێهاتوو.

ئه‌م بابه‌ته 174 جار خوێنراوه‌ته‌وه‌‌
هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی



Copyright 2018. westganews.net. All Rights Reserved.