قسەکەی خۆتان بوو،

‌هوشیار عه‌بدوڵا

بۆچی فکری ئاپۆ لەباکور دەتوانێ ئەزموونی درەوشاوەی وەک بەدەپە بەرهەمبهێنی و ئەو ئەزموونە شاکارەی پێکەوە کۆکردنەوەی گەلان لە هەڵبژاردنی تورکیا سەرپێ بخات و سەریبخات! بۆچی لە رۆژئاڤا فکری عەبدوڵا ئۆجەلان دەتوانێ کانتۆنەکانی پێ دروست بکرێ و بەو شیوەیە سەرکەوتوو نمونەیی بێ لە ئاستی سیاسی و ئیداری و دبلۆماسیدا، ئەی بۆ پەکەکە بە فکری هەمان ئەو سەرۆکە مەزنە لە باشوری وڵات لە هەرێمی کوردستان ئەزمونەکانیی لە دروستکردنی حزب و رێکخراو شکشت دەهێنێت و سەرکەوتوو نابێ؟

لە وەڵامدا یەکێک لەو دو هەڤاڵە وتیی، چەند هۆکارێک هەن دیارترینیان ئەوەیە ((ئێمە و ئەوانەی پێشتر ئیدیعای ئاپۆ چێتیمان کردوە لێرە لە باشور، هاوڕێیەکی باش و راستەقینەی ئاپۆ نەبوین)) قسەیەکی لە خۆبوردوانە بەڵام قوڵ و دەقیق بوو، لە شەرحی ئەو جەملەیەشیدا وتی، وەک پێویست لە فکری ئەو حاڵی نەبووین و کارمان پێنەکردوە .

ئەم رۆژانە بە چاوی خۆمان راستی قسەی ئەو هەڤاڵە دەبینین .

من ئیدیعای ئەوە ناکەم لە فکری ئاپۆ زۆر باش حاڵیم، چونکە ماوەیەکی کەمە سەرقاڵی مانیفیستۆکانیم کە لە سجنەوە هاتونەتە دەرێ بە تایبەت کتێب یا مانفێستی پێنجەم کە لە راستیدا لە سەر شیوەی دیفاع و مورافەعە نوسیونی و دوای کراون بە کتێب .

دوو نمونە بەسن بۆ ئەوەی بزانین بە فیعلی هاوڕێکانی ئاپۆ لە باشور زۆر لە فکری ئەو تێگەیشتون یان نا؟

یەکیان ئەوەیە کە پەیوەستە بە کۆنگرەی نەتەوەییەوە، پێم وایە ئەوانەی لە باشور سەرقاڵی ئەو کۆنگرانەن هێشتا پێیان وایە ساڵی نەوەدەکانە، هێشتا بە فکری ئاپۆی نەوەدەکان کار دەکەن، لە کاتێکدا ئێستا ئاپۆ گەیشتووەتە قەناعەتی ئەزموونی کاری هاوبەشی گەلان و خۆسەری دیموکراتیی و دوورکەوتنەوە لە هەمو دەمارگیریەکی نەتەوەیی و نەژادی تازە بە تازە لێرە ئەو فکرە قەومیە چەقبەستوە کۆنگرەی بۆ دەگیرێ، لە کاتێکدا ئاپۆ هەر وەک نەوشیروان مستەفا باوەری بە دروستکردنیی نیشتیمان هەیە، لەدەرەوەی تاپۆی نەتەوەیی و بە دیدی نیشتیمانیی و هاوڵاتیبوون بۆ پەیوەندیی نێوان گەلان دەروانێ، تازە بە تازە لێرە قەومچیەت تۆخ دەکەنەوە .

ئەوەی لە رۆژئاڤا جێبەجێدەکرێ کرۆکی دیدی ئۆجەلانە بۆ خۆسەری دیموکراتی گەلان و جێهێشتنی ئەو دەمارگیریە قەومییە، هەر بۆیە دەبینی هەمو نەتەوە و گەلان لە روداوەکانی عفرین بوونەتە شەڕڤان .

هەر لەو دیدە نیشتیمانیە باڵایەشەوە بو نەوشیروان مستەفا زۆرترین بایەخ و پەرۆشی بۆ سەرکەوتنی کانتۆنەکانی خۆرئاوا بوو، چونکە دەیزانی لەسەر رێگایەکی راست ئەرۆن و لەگەڵ دیدە نیشتیمانیەکانیی یەکیان دەگرتەوە .

ئەوەی دووهەمیان، لە کاتیکدا پرۆژە فکریەکەی ئاپۆ کۆکردنەوە و دروستکردنیی چەترێکی گەورەی سەرو حزبیە بۆ تێکرای هیزە سیاسی و گروپە کۆمەڵایەتی و چین و توێژ و دین و مەزهەب و پێکهاتەکانی تر وەک ئەوەی بەدەپە لە هەڵبژاردنەکان لە تورکیا کردی لەسەر بنەما و فکرێکی بالای ئینسانیی و ستراتیجی کە ئاپۆ دارێژەریەتی، کەچی لە باشور تازە بەتازە دەچنە سەنگەربەندی حزبی تەسکەوە بۆ هەڵبژاردن، کە بە حساب ئامانجی سەرەکیان گۆرینی لوتکەی دەسەڵاتە، لە کاتێکدا فەلسەفەی گۆڕین لای ئاپۆ لە خوارەوەیە بۆ سەرەوە، واتا گۆڕین لە ئاستەکانی خوارێی کۆمەڵگەوە دەکرێ نەک ئاستی سەرەوەی دەسەڵات .

ئەوە خۆئەگەر بێتە سەر ئەدەبیاتی سیاسی و زمانی طرح و دونیابینی ، فکری ئاپۆ زمانێکی باڵا و بەرپرسیاری ئەوتۆیە کە پارچەیان لەگەڵ هەموو هێز و گروپ و حیزبێکدا بۆ یەک نابێت .

هیوادارم هەڤاڵانی باشور، ئەو دێرانە بە دڵی فراوان وەربگرن، بەوە وەریبگرن کە بە فیعلی خۆیان جوان دیاریانکردبوو، هاوریێی باشی ئۆجەلان نین کە بەهیوام ببن، چونکە بە دیدی من تێگیشتن لە دوا قۆناغە کامڵەکانیی فکری نەوشیروان مستەفا و ئاپۆ، بەرپرسیارێتییە و پێویستە بۆ هەموو کەسێک کە خەمی ئەوەی هەبێ سیاسەت لە کوردستاندا نوێ بکاتەوە.