‌سیناریۆكانی 10 رۆژی داهاتوی پەرلەمان
PM:09:49:04/07/2019
مەم بورهان قانع

دەبێت تا رۆژی 11ی ئەم مانگە (واتە پێنجشەممەی داهاتو)، پەرلەمانی كوردستان متمانە بداتە كابینەی نوێی حكومەتی هەرێمی كوردستان، بەڵام ئاماژەكان بۆ ئەوە دەچن پێش ئەو وادەیە، ئەو متمانەیە لە لایەن فراكسیۆنە بەشداربوەكانی ناو كابینەكەوە، بە كابینەی نوێی حكومەت دەدرێت و بەدیاریكراویی سێشەممەی داهاتو (9ی مانگ) متمانە بە كابینەكە دەدرێت و دوای ئەو متمانە بەخشینەیش، دوای 48 كاتژمێر و لەكۆتایی هەفتەدا (واتا رۆژی 11 مانگ)، خوێندنەوەی دوەم بۆ ئەو سێ‌ پڕۆژە یاسایە دەكرێت (كە رۆژی شەممەی داهاتو خوێندنەوەی یەكەمیان بۆ دەكرێت) و دانیشتنەكەی رۆژی 11ی مانگ، چەند كاتژمێرێك دەخایەنێت و رەنگە درێژترین دانیشتنی ئەم وەرزەی پەرلەمان بێت. رۆژێك دواتریش (13ی مانگ)، لیژنەی یاسایی پەرلەمان، بە پەلە پروسكێ‌  پێشنیازەكانی پەرلەمانتاران، كە لە دانیشتنەكەی رۆژی 11ی مانگی پەرلەمانی كوردستان دا خستویاننەتەڕو و پشتیوانیی سێ‌ پەرلەمانتاری بۆ بەدەستهێنراوە، گەڵاڵەدەكات و رادەستی دەستەی سەرۆكایەتیی پەرلەمانی دەكات (بۆ ئەوەی لە دانیشتنی دواتردا بخرێنە دەنگدانەوە) و راستەوخۆ سەرۆكی پەرلەمان-یش، بانگێشتی پەرلەمانتاران دەكات بۆ ئەوەی رۆژی (15)ی مانگ (كە دەبێتە دوایین رۆژی وەرزی بەهارەی دانیشتنەكان)، پەرلەمان كۆببێتەوە و بەرنامەی كاری دانیشتنەكەیش، دەنگدان دەبێت لەسەر ئەو سێ‌ پڕۆژە یاسایە، كە بریتین لە: "هەمواری یاسای ئەنجومەنی پارێزگاكان"، یاسای "تاپۆكردنی زەوییە زیادەرۆییەكان". هەروەها یاسای "مرۆڤسازیی لە هەرێمی كوردستان". سەرەڕای ئەگەری هەڵبژاردنی سەرۆكی نوێی پەرلەمان لە فراكسیۆنی "یەكێتی".

بەداخەوە، چەند رۆژێكی دیكە، وەرزی بەهارەی پەرلەمان (بە 15 رۆژە درێژكراوەكەیشەوە) تەواودەبێت و لەم خولەدا زۆر یاسای گرنگ هەبون كە دەبو پەرلەمان پەسەندیان بكات، بەڵام هەم ئیرادە نەبو، هەم نییەتی ئەوەیش نەبو  بخرێنە بەرنامەی كار و پەسەندبكرێن، كە گرنگترینیان گەڕاندنەوەی پاشەكەوتی موچەی موچەخۆرانی هەرێمی كوردستانە، كە پێشتر و لە سەرەتای ئەم وەرزەی پەرلەمانی كوردستان دا، وەك پڕۆژە یاسا، ئاڕاستەی دەستەی سەرۆكایەتیی پەرلەمان-مان كردبو. سەرەڕای ئەوەی بەدوری دەزانم ئەو دانیشتنە تایبەتییەیش بكرێت، كە ئەمڕۆ  (4/ 7/ 2019)، بە ئیمزای (15) پەرلەمانتار ئاڕاستەی دەستەی سەرۆكایەتیی پەرلەمانی كوردستان-مان كرد و داوامانكردوە پاڵپشت بە مادەی (66)ی پەیڕەوی ناوخۆی پەرلەمان، دانیشتنێك ئەنجامبدرێت و تایبەت بێت بە گڤتوگۆكردن لەسەر لەشكركێشییەكانی سوپای توركیا بۆ ناو خاكی هەرێمی كوردستان.
---------------- 
ئەندامی پەرلەمانی كوردستان.


هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی



Copyright 2018. westganews.net. All Rights Reserved.