چەند وشەیەکی تر دەربارەی (دیداری تەمەن)

لەم رۆژانەدا، مانگێ تێدەپەرێت بەسەر دەرچونی کتێبی( دیدای تەمەن )دا، کە چاوپێکەوتنێکی درێژە لەگەڵ مام جەلال دا. ئەوەی هەمولایەک تێبینی کردوە، ئەوەیە کە کتێبەکە پێشەوازییەکی زۆر گەرمی لێکرا و خوێنەرێکی بەرفراوانی بۆ خۆی دروست کرد، بەو پێیەی کە ئەم دیدارە روناکییەک دەخاتە سەر مێژوی هاوچەرخی بزوتنەوەی رزگاریخوازی گەلی کورد، بەدڵنیاییەوە لە ئایندەشدا ئەبێتە سەرچاوەیەکی زۆر گرنگ بۆ لێکۆڵینەوەی زانستیانەی ئەو سەردەمە.

هەندێ کەسایەتی و گروپ و لایەنی سیاسی، کە هەندێکیان خۆیان بە (منەوەر و زۆر رۆشنبیر) دادەنێن، خۆیان پێنەگیراوە و لەیەکەم رۆژی دەرچونی کتێبەکەوە، کەوتنە هێرشکردن و جنێودان و تۆمەت بەخشینەوە و ئەمریان بە هەندێ کۆیلەی خۆیان کرد لە دەرەوەی وڵات کە شتێ دژی دیدارەکە بنوسن، بەمەرجێ ئەوانە تەنها بەرگی کتێبەکەیان لە رێگای فەیسبوکەوە بینیبو، ئەمە تەنها لەبەر ئەوەی کە مام جەلال لەو دیدارەداو لە قۆناغێکی دیاریکراودا باسی ئەوان و گروپەکەکانیان بەو شێوەیە نەکردوە کە ئەوان ویستویانە. ئەمەوێت جارێکی تر، ئەم راستیانە رون بکمەوە:

1. ئەم کتێبە بریتیە لە پرسیار و وەڵام. بەندە تەنها پرسیاری کردوە و مام جەلال وەڵامی داوەتەوە، واتا ناوەرۆکی کتێبەکە بریتیە لە بۆچونی مام جەلال لە ماوەی ١٥ ساڵدا.

2.وەک لە پێشەکی کتێبەکەدا نوسیومە کە: زۆر ئاساییە کە كۆمەڵێك پرسیار لای هەندێ كەسایەتی دروست بكات، یان كومەڵێكیان بۆچونی جیاوازیان هەبێت، دەربارەی روداوەكان و  ئەوان لە روانگەیەكی ترەوە روداوەكانیان بینیبێت و هەڵسەنگاندنی جیاوازیان بۆی هەبێت، ئەمەش كارێكی زۆر ئاساییە، كە بۆچونی جیاواز دەربارەی روداوەکان لێكدانەوەی جیاوازی بۆ بكرێت.

لەم دیدارەدا، مام جەلال روداوەكان وەك تێگەیشتنی خۆی دەگێرێتەوە، چۆن دیوێتی و تێیدا ژیاوە، بەتایبەتی ئەو ڕۆڵی دیار و گەورە و سەرەكی لە زۆربەی ڕوداوەکاندا هەبوە، بۆیە ناتوانین بڵێین كە ئەوەی شێوازێكی گێرانەوەی هەیە زۆر بێلایەنانەیە و ئەو تەنها وەك گێڕانەوەی روداوێكی مێژویی سەیری كردوە، کە پرسیارەکەی تێدا کراوە. زۆر ئاساییە كە مام جەلال كاتێ بیرەوەرییەكانی خۆی دەگێڕێتەوە، ئەوە گوزارشت لە كات و شوێنی دیاریكراوی خۆی دەكات، كە پرسیارەكەی تێدا كراوە و زیاتر ئەو روداوە مێژوییە بەوشێوەیە دەگێرێتەوە وەك ئەوەی كە ئەو لەوساتەدا چۆن بینیوێتی، نەك وەك ئەوەی ئێستا هەیە، لەبەرئەوە، هەمو لێکدانەوە و هەڵسەنگاندن و شیتەڵکردنەوەی ئەم دیدارە، پێویستە لە ڕوانگای ئەو ڕۆژەوە لێکبدرێتەوە.

هەندێ پرسیار و وەڵام، بو قۆناغێك دەگەرێتەوە كە ڕوداوەكانی ئەوكاتە زۆر كاریگەرییان لەسەر مام جەلال هەبوە، هەرلەبەرئەوەش هەندێ وەڵامی ״سیاسیانە و دبلۆماسیانە״ی نەداوەتەوە، بەڵكو زیاتر وەك هەمو تاكێك كە ڕوداوەكان كاریان تێكردوە و هەستی ئەو كاتەی خۆی دەربڕیوە

3.رەنگە مام جەلال ناوی هەندێ کەس و لایەن و شەهید و گروپی هێنابێت، کە ئێستا خاوەنەکانیان، کەسوکاریان یان حیزب و گروپەکانیان نیگەران دەکات، ئەمە بە تۆمەت بەخشین و ئیتیئهام کردن چارەسەر ناکرێت، بەڵکو تەنها بەوە چارەسەر دەکرێت کە ئەوانیش مافی رەوای خۆیان بەکار بهێنن و راو بۆچون و تێبینی خۆیان لەو بارەیەوە بنوسن و بڵاوی بکەنەوە. ئیمرۆش نەبێت، سبەێنێ دەبێت کە راستیەکان دەردەکەون و مێژوش رەحم بە کەس ناکات.

4.بۆ جاری چەندهەم دەڵێم و دەنوسم، کە بڵاوکردنەوەی ئەم دیدارە بێ ئاگاداری خانەوادەی مام جەلال نەبوە و لەسەر دەخوازی ئەوان ناو و گوزارشت بۆ هەندێ کەسایەتی و گروپمان لابردوە، بۆ ئەوەی گرژی دروست نەکات. هەروەها پێش چەند ساڵێک چەند ئەندامێکی مەکتەبی سیاسی و سەرکردایەتی و چەند کادێرێک و لێپرسراوی یەکێتی نیشتیمانی ئەم کتێبەیان بینیوە و هاوکاری دیاریشیان کردوین و تێبینی بەسودیان داوینێ..

هیوادارم کاتێ هەمولایەک دڵمان زیاتر فراوان دەبێت، ئەو کاتە هەمو دیدارەکە وەک خۆی بڵاوی بکەینەوە.

5.وەک وتومانە، تۆماری دەنگی چاوپێکەوتنەکە پارێزراوە..هەرکەسێ هەست بکات و دودڵ بێت لە ناوهێنانی خۆی یان کەس و کاری یان گروپەکەی، ئەتوانێت داوامان لێبکات بۆ ئەوەی بۆی بسەلمێنین کە ئەوەی ئەوان مەبەستیانە لە کتێبەکەدا، هەموی بەدەنگ پارێزراوە، ئەمەش لە پێناوی ئەوەی کەئەو دودڵیەی کە هەیانە بڕەوێتەوە، یاخود سەربەستن و دەرگای دادگا واڵایە.

6.بە ئەرکی ئەخلاقی و سیاسی و مێژوی خۆمم زانیوە، کە ئەم چاوپێکەوتنە کە زیاتر لە چارەکە سەدەیەک پێوەی سەقاڵ بوم، زیاتر دوانەخەم و بیخەمە بەدەم خوێندەواران، لەبەر ئەوەی نازانین، سبەینێ چی روئەدات و پێم باش بوە تا مام جەلال لە ژیاندا ماوە، ئەم دیدارەی بڵاوببێتەوە..چونکە ئاسان نەبو، دوای ئەو کاتە بەندە بڵاوی بکردایەوە. لەبەر ئەوە هەقە خوێنەرانی بە ویژدانەوە بڕیار لەسەر ئەوە بدەن، ئایا بڵاوکردنەوەی ئەم دیدارە، بەسود بۆ مێژوی بزوتنەوەی رزگاریخوازی گەلی کورد ئەگەرێتەوە یان نا؟ وە ئایا لەمەودوا بۆچونێکی جیاواز دروست نابێت بۆ بینینی مێژوی دوێنێی ئەو بزوتنەوەیە؟

7.هیوادارم کە هەمو ئەو کەسایەتییانەی کە رۆڵی دیار و کاریگەریان هەبوە لە بزوتنەوەی رزگاریخوازی گەلی کوردا، هەوڵ بدەن کە تا زۆر لە رابوەردوی دوێنێیان لە بیر ماوە، بیرەوەری  خۆیان تۆمار بکەن و روداوەکان بگێرنەوە وەک ئەوەی ئەوان تێدا ژیاون، بەشیکی مێژووش هەر بەو شێوەیە دەنوسرێتەوە.

PM:05:09:31/05/2017

ئه‌م بابه‌ته 5578 جار خوێنراوه‌ته‌وه‌‌

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی