كۆنگرە

‌ئاشتی عەبدوڵا

لەم ساتە وەختەدا كەتەواوی بارودۆخی هەرێمی كوردستان لەقۆناغێکی هەستیاری سیاسیدایە و نێو ماڵی كورد بەجۆرێك لیكترازاوە، كە مەترسیەكان روولەزیادبوونە و هەروەها ئەو بێ‌سەروبەرەییە سیاسیەی كەنكۆڵی لێناكرێت بۆشاییەكی گەورەیان دروستكردووەو بێ‌ هیواییەكی گەورە روویكردۆتە خەڵك و ژیان و گوزەرانیشیان خراپ و بێ‌ چارە ماوەتەوە.

 یەكێك لەلایەنە سەرەكییەكانی ناو گۆڕەپانی سیاسی هەرێم كەئەتوانیت كاریگەریی و رۆڵی گرنگ بگێڕێت و ببێتە فریادرەسی ئەم شكستە و سەرلەنوێ‌ كورد خۆی ئامادەبكاتەوە بۆ هەستانەوەو پاراستنی ئەوەی لەدەستیداماوە، یەكێتیی نیشتمانیی كوردستانە، نامەوێت بچمە تەفاسیلی زیاترەوە و مێژووی یەكێتی بكەمە شاهیدی ئەم تێڕوانینەم، چونكە ئەوە واقیعێكی مێژووییە و ئاشكرایە، بەڵام لەبەدبەختی كوردو چانسی نەیارانی كورد، دۆخی یەكێتی دوایی كۆچی هەڤاڵا مام جەلال لەقۆناغێكدایە كەئیرەیی پێنابرێت و لەزۆر رووەوە دەرگیری كۆمەڵێك قەیرانی نێوخۆیی بووەو ناتوانێت بڕیاری چارەنووسساز بدات.

 لەئێستادا تەنها فاكتەرێک كەبتوانێت چارەسەری كێشەكانی یەكێتی بكات كۆنگرەیە، بۆ ئەم مەبەستە لەئێستادا دڵسۆزانی یەكێتی فشاریان دروستكردوە بۆ بەستنی كۆنگرە، بۆئەوەی سەرلەنوێ‌ ستراتیژێكی نوێ‌ بەعەقڵێكی سیاسی نوێ‌ دابڕێژرێتەوەو یەكێتی لەسەر بنەماو دروشمە راستەقینەكانی خۆی بەفۆرمێكی نوێوە نۆژەن بكاتەوە.

 قوباد تاڵەبانی كە لەنوێترین پەیامیدا سەبارەت بەبەستنی كۆنگرەو چارەسەری كێشەكانی یەكێتی بڵاویكردەوە، ئەتوانم بڵێم یەكێك بوو لەو پەیامانەی كەبەرپرسیارانە بوو، دەست خستنە سەر برینەكانی نێو یەكێتی و داننابوو بەكەموكورتیەكان و لەهەمانكاتدا ئەو مەترسیانەی لەئارادایە بۆ سەر دەستكەوتەكانی هەرێمی كوردستان، هەروەها پێشنیار بوو بۆ چارەسەری دۆخی یەكێتی لەڕێگەی كۆنگرەوە بەو میكانیزمانەی كە لەپەیامەكەدا ئاماژەی پێ‌ كردبوو.

هەر دوابەدوای پەیامەكە، كاریگەریی ئەرێنی و پشتیوانی ئەم جۆرە خیتابانە لەنێو كادیران و لایەنگرانی یەكێتیدا ئامەژەیەكی تر بوو بۆ گرنگی پەیامەكە، بەڕێژەیەكی بەرفراوان لەتۆڕە كۆمەڵایەتیەكاندا دەنگدانەوەی هەبوو كە لەنێو هەموو بیروبۆچوونە جیاوازەكانی یەكێتیدا قبوڵكراوو جێی بایەخیان بوو، هێندەی گرنگی ناوەرۆكی پەیامەكە گرنگە، كە كاك قوباد یەكێتیەكان لەچاوەڕوانیدا نەهێڵێتەوە و هەنگاوی كردارەكی دەستپێبكات بۆ ئەو ئاماژانەی نێو پەیامەكەی، كە ئومێدی لای دڵسۆزان و كادرانی یەكێتی دروستكردوە.

 ئەوەی سەرنجی منی زیاتر راكێشا پەرەگرافی كۆتایی پەیامەكەبوو، كە رام وایە دانانی ئەو وتەیەی مام چەند ئاماژەیەكی گرنگی لەخۆگرتبوو، لەوانە مەفهومی وتەكەی مام كەتەعبیریش بوو لەبۆچوونی كوڕەكەی مام جەلال، هەروەها دەیەوێت ئەو بنەمایانەی كە باوكی باوەڕی پێیبوو نیوسەدە زیاتر خەباتی بۆ كرد درێژەپێبدات.

 لەلایەكی تر ئەگەرێكی كراوەیە، كە قوباد تاڵەبانی پێگەو دەسەڵاتی فراوانتربێت لەنێو حزبەكەیدا، بۆ منی ژن گرنگە كاتێك هەر سیاسی و سەركردەو بڕیاربەدەستێك باوەڕی بەبەشداری فیعلی ژنان هەبێت و كاری بۆ بكات، ئەمە ئامانجی ئێمەی ژنانیشە كە خەباتی بۆ دەكەین تا دونیابینی ژنانیش لەبڕیاری سیاسیدا رەنگبداتەوە.

 ئەم باوەڕو دیدگایە لەوتەكەی مامدا جەختی لەسەركراوەتەوە و قوباد تاڵەبانی لەپەیامێكی وا دا بایەخی پێداوە.

بەو وتەیەی هەڤاڵا مام جەلال كەكۆتایی پەیامەكەی قوباد تاڵەبانییە، بۆ وەبیرهێنانەوە و بایەخی وتەكە دایدەنێم و كۆتایی بەم نووسینە دێنم.

"پێمخۆشە شتێكی كەش بڵێم، ڕوم بكەمە ئەندام و كادیرەكانی یەكێتیی نیشتمانیی كوردستان، كە بەو جۆش و خرۆشەی ئێستەوە هەڵمەت بەرن بەرەو كۆنگرێسی داهاتوی یەكێتیی نیشتمانیی كوردستان بەو جۆش و خرۆشەوە خەبات بكەن بۆئەوەی كۆنگرێسی داهاتوی یەكێتیی نیشتمانیی كوردستان كۆنگرێسی پتەوكردن و چەسپاندنی یەكێتیی ناو یەكێتیی بێت، هەڵبژاردنی سەركردایەتی شایستەی یەكێتیی بێت و خوێنێكی نوێ بكرێتە لەشی یەكێتیەوە و ئەمجارە ژنان، گەنجان سەربخرێن بەرەو سەركردایەتی".