شێتەكانی هەولێر(1) ‌

‌شێرزاد شێخانی


لەحیكایەتە فۆلكلۆریەكانماندا زۆرجار باس لەچیرۆكی خۆشەویستی دەكەن،كە زۆربەیان لەنەتیجەدا نەگەیشتنە ئاواتو بەشێتبون كۆتاییان هات..بەران تێناگەم لۆ لەحەمو ئەو چیرۆكانەدا بەس كوڕەكان شیت دەبون و كچەكانیش وەكی دەگۆترێ» بەرزەكی بانان»لێی دەردەچونو،هەندەكیشیان مێردەكی ملپانیان لۆ خۆیان دەدیتەوە..لەوەوە لۆمان دەردەكەوی كە هەر شێتبونەك سەبەبی خۆی هەیە.. لۆ نمونە ئێستا ئەمنیش خەریكە لەدەست ئەو حكومەتەی خۆمانەوە شێت بم..چونكی تێناگەم كوو بەفرۆشتنی یەك ملیۆن بەرمیل نەفتەوە حكومەت ناتانی روبعە معاشۆكەكی ئەو مۆزفە قوڕبەسەرانەمان بدا.. ئێستاش تێناگەم كوو پرۆفیسۆرێكی وەكی ئاشتی هەورامی نەفتەكەمان بەسیعری تەماتەو خەیار دەفرۆشی كە بەشی كاوجۆی ئەو كەروعارەبانەش ناكا كە نەفتەكەی پێدەگوازرێتەوە؟؟!!!..عەلاكولین با واز لەسیاسەت بینینو بچینەسەر ئەسڵی مەسەلەكە كە شێتەكانی هەولێرە..

لەو سارانەدا دەیان شێتو شێتۆكە لەو هەولێرە هەبون كە ببونە كەسایەتی ناسراوی ناو میللەتەكەمان،تەبعەن لەبیرتان نەچی شێت لەهەر شارو وراتەكیدا هەبی دەبیتە بەشەك لەتاریخی ئەو وراتو شارانە، لۆیە خەركی قەت لەبیریان ناكەن..

سەركردەی شێتەكانی زەمانی مە «حەمەشێت» بو، كە پیاوەكی لەتەمەنی تەقریبەن پەنجا ساریدا بو.. زۆركەس دەیانگۆت ئەو حەمەیە پیاوچاكەو وەلی خوایە،چونكی قسەی وایدەكرد لەقسەی فەیلەسوفان دەچو.. حەمە رۆژانە لەدووی پارچە ئاسنەكاندا بو، لەهەر جێیەكی ئاسنەكی بدیتبایە هەریدەگرت.خەركی دەیانگۆت رۆژەك دادێ ئەو حەمە شێتە بەو ئاسنانە سارۆخەكی دروست دەكا.. عەنتیكەترین شتی ئەو پیاوە نانخواردنەكەی بو، لەسەر جادە مەنجەرەكی گەورەی دادەناو تەماتەو باینجانو بامیەو توورو پیازو چار پێنج نانی فرنیشی تێكەر دەكردو بەبێ ئاگركردنەوە بەخاوی تێكەری دەكردنو دەیخواردن!.

«كسۆك»ئەویش شێتەكی دی بو، دشداشەیەكی فشوفۆڵی خەتداری لەبەر دەكرد سەری تراشرابو،بەدائیم چڵمی لەكەپوی دەهاتەخوارێ،زمانی ڵاڵبو،لەپێش كەبابخانەكەی حاجی قادر دادەنیشت،جارجار عائیلەكانی قەراتێ ئیشیان پێدەكردو پارەیەكی كەمیان دەدایێ، زەمیبلەكی لەدەست دەگرتو مسواگی لۆ هەندەك ماران دەكرد..ئەو كسۆكە یەك شتی زۆر عەیبی هەبو، ئەویش كە لەناو جەرگەی بازاردا دادەنیشت دەعبایەكەی لەناو دشداشەكەیەوە دەكەوتە گۆڕێ!.

«چورچە»ش شێتۆكەیەكی دی بو، ئەو چورچەیە كوڕەكی جاحێری زۆر زەعیفبو، ئەوكاتی تووڕەت بكردبایە چڵمی كەپووی تێدەگرتی، زۆر عەجایب بو، چڵمەكەی زۆر بڕی دەكردو كەمجار نیشانەكەی غەڵەتی دەكرد هەر پێت دەكەت..چورچە زۆر حەزی لەجلكی عەسكەریبو،لەبیرمە كاتەكی ئەمە لەساری حەفتاوچار چوینە سەرێ ببینە پێشمەرگەی ئەیلول،چورچەش لەگەر حەشامەتەكە هاتبوە دەرێ،لە گەڵاڵە دیتم جلكی عەسكەری لەبەر كردبو وروتبەی مولازم ئەوەلی بەستبو.خۆی كوڕەكی روحسوكو كۆمیدیان بو، كوشتنەكەشی هەر كۆمیدیانە بو، چونكی كەوتە ناو بۆسەوە وایانزانیبو كەوا زابتی عەسكەرییە!.

«حەسەن 55» ئەو حەسەنە خەركی دەشتێ بو، هەردو چاویشی سەقەت بو، هەر كاتەكی پێت گۆتبا پەنجاوپێنج تووڕە دەبوو بەردی دەهاوێشت.دائیم بەردو كەرپوچی بەدەستەوە بو. ئێستاش تێنەگەشتم لۆ بەو رەقەمە شێتوهار دەبو!.

« عەمۆ جەلیل» ئەو عەمۆیە حەمودەم رادیۆیەكی بەبن گێی دەناو موتابەعەی ئەخباری دەكرد..كاتەكی پێت دەگۆت « ها عەمو جەلیل ئەخبار چییە»؟. یەكسەر دەیگۆت» تررن تررن. هونا لەندەن». ئەوجا ئەخبارەكانی لۆ دەخیندیەوە!.

« شێخ رەزا» ئەو پیاوە دەموچاوەكی زۆر ترسناكی هەبو..دەتگۆت شەیتانەكانی فلیمە ئیسلامیەكانە.پرچی درێژبو  لەبن جەمادانییەكەی دەردەكەت، دەموچاوی ڕەشی لۆچاوی بو.. حەمو رۆژەكی دەچوە قەسابخانە هەرچی ریخۆلەو ناو ورگی حەیوانات هەبو خڕی دەركردەوەو ئێواران پشیلەكانی شاری هەولێر لێی خر دەبونەوەو دەیدانێ، لۆیە بەناوی» مام پشیلە»ش ناوی دەركردبو.. ئەویش وەكی حەمە شێت دەیانگۆت»وەلییە» چونكی زۆر زگی بەحەیوانات دەسوتاو دەیانگۆت ئەوە رەحمەتی خوایە لۆ پشیلەكانی ناردیە!.لۆ حەڵقەی دی چاوەڕێم بن..


PM:12:02:02/01/2017

ئه‌م بابه‌ته 3512 جار خوێنراوه‌ته‌وه‌‌



هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی