‌مەرگی بڕیار و ئەسڵی کێشەکە
PM:05:34:26/08/2019
دڵشاد ئه‌نوه‌ر

نابێت مەرگی بڕیار بەسادەیی تەماشا بکەین، ناکرێ مەرگی بریار نەکەینە هەلێک بۆ قوڵ بوونەوە لە ئەسڵی کێشەکە. بڕیار هەمووانی گریاند، هەمووانی هەژاند، بەڵام گەر تەنها بە شێوەیەکی عاتفی لە کۆچی بڕیار بروانین، ئەوا دو سبەی تۆزی عاتیفەمان دەنیشێتەوە و بریارمان لە یاد دەچێت، دەیان بڕیاری‌ تر بێ باوک دەبن.
 
دەبێت تێبگەین، بڕیار تەنها مناڵ نیە، کۆچی باوکی گڕی لە ناخی بەردا بێت، دەیان منداڵە شەهیدی تر هەیە، شەو تا بەیانی ناخیان دەسوتێ، بێ باوکی دەیانکوژێت، بەڵام کەس پێیان نازانێت، چونکە زومی ئیعلامیان لەسەر نیە.
 
دەبێت مەرگی بڕیار و سوتانی ناخی مناڵە شەهیدەکان بکەینە دەرفەت، تا پەنجە بخەینە سەر برینەکان و قسە لەسەر ئەسڵی کێشەکان بکەین، چونکە تا پەنجە نەخەینە سەر برینەکان، هەمو ساتێک دەبێت چاوەروانی بێ باوک بونی دەیان جگەر گۆشەی تری وەکو بڕیار بکەین.
 
لێرەوە دەبێت بپرسین:
 
- ئەرێ ئێمە 400 هەزار  پێشمەرگەمان هەیە، بۆ سنورەکانی هەرێم واڵان بە روی  تیرۆردا و بە ئاسانی دەستیان دەگاتە کۆمەڵگەیەکی کوردنیشینی چەند هەزار کەسی؟
 
- ئەرێ بۆ بەرپرسێکی ئاسایی، 30 پاسەوانی هەیە و بە وەجبە پاسەوانێتی ماڵەکەی دەگرن، بۆ ناحیەیەکی گەورە و گران، چوار رەبیەی تۆکمەی لە دەوروبەر نیە؟
 
- ئەرێ بۆ باخی هەر مەسئولێک، چوار پێنج شێفی بۆ دانراوە و موچەکانیان لەسەر وەزارەتی پێشمەرگەیە، کەچی سنورەکان گرفتی بێ پاسەوانیان هەیە؟
 
- ئەرێ تاکەی پیشمەرگە ناکەنە هێزێکی نیشتیمانی؟ تاکەی مەشق و راهێنانیان پێ ناکەن؟  تاکەی بە بێ چەک و تەقەمەنی و کەرەستە و کەلوپەل، دەیانخەنە نێو کورەی ئاگرەکە؟
 
ئاخر مه‌عقول نیە، رەبیەیەکی سنور چوار پێشمەرگەی تیا بێ، بەر ماڵی مەسئولێک 20 دابەستەی تیابێ!
 
مه‌عقول نیە هێرشی داعش کە بەچەند سەد چەکدارێکەوە هاتبنە هەولێر، بە بیست سی چەکدارێکەوە جه‌له‌ولا بگرن، ئەمە دەسەڵاتی کوردی رانەچڵەکاندبێ!
 
بۆیە دەبێت کۆتایی بە فرمیسک و گریانی کاتی بێت لەمەودوا قسە لەسەر ئەسڵی کێشەکان بکەین.
 
 دەبێت هێزەکان مەشق و راهێنانیان پێ بکرێ، پێشمەرگە لەنێو باخ و بەردەمی ماڵی بەرپرسان دور بخرێتەوە و ئەرکە سەرەکیەکەی رادەست بکرێ کە پاراستنی نیشتیمانە، بێگومان گەر ئەمەش کرا، ئاسان نیە بۆ هێزێکی نامۆ، دزە بکاتە نێو ناحیەیەکی کوردنیشین و بڕیارەکان بێ باوک بکات.

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی



Copyright 2018. westganews.net. All Rights Reserved.