‌ڕێبین هەردی بۆ وا ئەكات؟
PM:04:19:11/05/2020
ئاری محه‌مه‌د هه‌رسین

ئەم بەیانیە كەسێك بە ژمارەیەكی واستئاپی وڵاتی سوید، كە هیچ ناوێكی لەسەر نەبوو سەردێڕی ئەم وتارەی بۆ ناردم. لە پێشا زۆر بە شان و باڵمدا هات و موجامەلەی كردم. پاشان ووتی: ڕاستە ڕێبین هەردی خزمی بەڕێزتانە؟… ووتم بەڵی ڕاستە و لە خزم زیاترە… ووتی: ئەرێ ئەم ڕێبین هەردیە بۆ وا دەكات؟… لێم پرسی ڕێبین هەردی چی ئەكات؟… ووتی: دژایەتی پارتی و بنەماڵەی بارزانی ئەكات و گێرەشێوێنە…  وتم چۆن ئەزانی وایە؟… ووتی بە وتارەكانیا؟… وتم تۆ ڕێبین بە شەخسی ئەناسی؟… وتی نەخێر لە ژیانما نەمدیوە، بەس هەر دیارە چ ئینسانێكە ئەوە خیانەتی لە گۆڕانیش كرد. پێم وت تەلەفونەكەت داخەرەوە و، ئەم ووتارەم بخوێنەرەوە. وتی كام وتارە؟… وتم ئەوەی كە دوای داخستنی ئەم تەلەفونە دەست ئەكەم بە نوسینی… 

بۆ ئەو كەسەی كە خۆی نەناساند و پرسیاری لەسەر كاك ڕێبین هەردی هەبوو:

ڕێبین جگە لە شوێنگرەوەی ئامۆزا، ڕەفیقیشمە. بەڵام ئەم نوسینە لەدەرەوەی عاتیفەی كەسایەتی و ڕەفیقایەتیەوە نوسراوە. ئەم گێرەشێوێنە، كوڕی شاعیر و سیاسەتمەداری كوردستان، مامۆستا ئەحمەد هەردیە. ئەگەر كەسێك هەبێت خەڵكی كوردستان بێت، خۆی بە خوێندەوار بزانێت و نەزانێت مامۆستا هەردی كێیە، ئەوا موسیبەتە ناوی بنێن خوێندەوار. مامۆستا هەردیش، نەكە وەك نوسەری ست فاتمە، بەڵكو مامۆستا هەردی بلیمەت و ئەندازیاری هونەری حیزبایەتی، بیرمەندی نیشتیمانی، زمانزان و ئینجا شاعیر. ئەم پێشگرەی كە ئەدرێتە پاڵ هەردی كە پێی ئەڵێن (مامۆستا)، لەبەر ئەوە نیە كە (دارالمعلمینی ریفی) خوێندوە و بوەتە مامۆستا. بەڵكو لەبەر كارامەیی سەلماندنی پسپۆڕیەتی لە زۆر بواردا، وەك سیاسەت و حیزب، زانستی زمانەوانی، شیعر،  كۆمەڵناسی و تەنانەت تێگەیشتن لە دونیای مناڵ. هەردی جگە لە نیشتیمانپەروەری و خۆشەویستی بۆ ئینسان و شیعر (وەك ئامرازی دەربڕینی فكر و هەستی جوان و ئاڵۆزی ئینسانی، لە ڕێی تەكنیكێكی تایبەتی قسەكردن و ووتار)، خاوەنی هیچ شتێكیتر نەبو. كاك ڕێبین پەروەردەی مەدرەسەی ئەو ئینسانە گەورەیەیە.

 كاك ڕێبینی كوڕی مامۆستا، لە ئەنجامی كارەساتەكەی ساڵی ١٩٧٥ كە بەسەر میللەتەكەمان هات، لە ساڵی ١٩٧٥ هەتا ١٩٧٩ ئاوارەی ئێران بو. لە ڕێكخستنەكانی ناو شاری سلێمانی (پێشمەرگەی ناوشار) كەسێكی زۆر ئازا و، لە دەستگیركردنیا لە لایەن ئەمنی سلێمانیەوە (بێگومان لەگەڵ هاوبیر سیروان) لە ساڵی ١٩٨٢(ئەمنی سلێمانی بەرەبەیانێك كاك ڕێبینی لە كۆڵانێكا فڕێدا بوو، سایەقێكی تەكسی بەخێری خۆی گەیانبویەوە ماڵەوە)، كە چووم بۆلای نەم ئەناسیەوە، چونكە لە ئەمن ئەوەندەیان لێدابوو، هەموو سەر و دوموچاوو قاچەكانی ئاوسابوون. ئەگەر كاك ڕێبین خۆڕاگر نەبوایە لە ژێر ئەشكەنجەدا، ئەوا زیاد لە ٥٠ كەسی بە گرت ئەدا و كەمی لە مردن ڕزگاری ئەبو. ڕێبین لە ساڵی ١٩٨٧ بەدواوە پێشمەرگە ی شاخ بوو. لە هێرشە كەی دۆڵی جافایەتیا بەر كیمیایی كەوت و بریندار بوو. لە هەمو ئەم كارەساتانەدا كە بەسەر كاك ڕێبین هاتن، بۆ ساتێكیش نەكوڕوزایەوە و لە مەبدەئی كوردایەتی پەشیمان نەبوەوە.

نە كاك ڕێبین و نە بنەماڵەكەی، بۆ چركەساتێك خیانەتیان لە خاكی پیرۆزی كوردستان نەكردوە و، بگرە بە بەردەوام گیانفیدا و، لە ڕیزی پێشەوەی بەهرەدارانی خزمەتگوزاری خاكی پیرۆزی كوردستان بوون.
زۆر كەس لافی پۆست مۆدێرنە لێ ئەدەن. هەندێكیان لە كونجی قەناعەتی ئەوروپا، هەندێكیشیان لە كونجی قەناعەتەكەی كوردستان. جیاوازی كاك ڕێبین لەگەل هەموو ئەوانیترا ئەوەیە، كە كاك ڕێبین بە كردەوە سەلماندویەتی كە نیشتیمانپەروەرە، هەرگیزیش لەو جۆرە ئینسانانە نیە بە تەكلیف و بۆ بەرژەوەندی شەخسی شت بڵێت یان بنوسێت، وەك باوكیشی بە هیچ جۆرێك كەسێكی ڕقاوی نیە. كاك ڕێبین كە شت ئەڵێت، بە قەناعەتەوە ئەیڵێت، ئیتر نەلەترسی كەسە و نە بۆموجامەلەی كەسە. ئینجا ئەم شتانە لەوانەیە بەدڵی بەندە یان كەسانێكیتر نەبن، ئەوە مەسەلەیەكی ترە. كاك ڕێبین پێویستی بەوە نیە بۆ هیچ كەسێكی بسەلمێنێت كە ئینسانێكی نیشتیمانپەروەرە، چونكە زۆر دەمێكە ئەوەی سەلماندو.  كاك ڕێبین لەداخی بێدادی، داگیركردنی نیشتیمانەكەی و، مافە سەرەتاییەكانی ئینسان وا ئەكات.



هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی



Copyright 2018. westganews.net. All Rights Reserved.