ئه‌ڵێی‌ نانه‌كه‌مان سوێره‌

‌مەریوان نەقشبەندی

عەرەبە سوننەكانی عیراقیش دوای ئەوەی هەتا پێیان كرا دژایەتی كورد و كوردستانیان كرد و ماوەیەك هاوسۆزی قاعیدە و دواتریش بەشێكی زۆریان بونە داڵدەدەری تیرۆرستانی داعش و سیاسیەكانیان لەناو پەرلەمان و حكومەتی عیراقدا گەورەترین دژایەتی مافەكانی كوردیان كرد"بەڵام كاتێك لێیان قەوما و شیعەی عیراق تەنگی پێهەڵچنین لەئەنبار و سەرحەدین و فەلوجە و دیالە و بەغدا و شوێنەكانی تر"كوردستان وەك پیشەی هەمیشەیی باوەشی سۆز و لێبوردنی بۆ كردنەوە و زیاتر لە ملیۆنێكیان ئاوارەبون و هاتنە كوردستان حكومەت و خەڵكی كوردستان دەیانپارێزێت و لەم بارگرانیەدا میوانداریان دەكات و تا ئەو رادەیەی رێگای موڵكدارێتیان لەكوردستان بۆ فەراهەم كراوە بەتایبەتیش لەشاری سلێمانی.

"لەدوا بێوەفایی ئەم عەرەبە سوننانەی عیراق لێدوانی رافیع ئەلرفاعی كەسایەتی سوننە و بەناو موفتی سوننەكانی عیراق لەمیانەی بەشداریكردنی لەبەرنامەیەكی تەلەفزیۆنیدا لەشاری هەولێرەوە بەبێ گوێدانە هەستی كەسوكاری زیاتر لە 1400شەهید و زیاتر لە 8000برینداری پێشمەرگە كەلەشەڕی تیرۆرستانی داعش شەهید بوون"چاوقایمانە بەرگری لەتیرۆرستانی داعش دەكات و بەنوری چاوی خۆی وەسفیان دەكات وەك قارەمان دەیانناسێنێت"لەراستیدا من نازانم چۆن وەڵامی ئەم عەرەبە سوننەیە بدەمەوە چونكە ئەوە چەندین جارە هەڵوێستی لەم شێوەیە دەردەبڕێت و حكومەتی هەرێمیش لێی بێدەنگە"ئاخر من دڵنیام ئەگەر ئەو قسانەی رافع رفاعی لەهەولێرەوە كردی ئەگەر هەر مەلایەك هەر رۆشنبیرێك هەر سیاسیەك هەر منداڵێكی كورد بیكردایە ئێستا ڕەوانەی ناو موسڵیان كردبوو یان بۆ هەتا هەتایە لەسوچی زینداندا دەبوو.