‌حەنین بۆ صەدام!
AM:11:49:02/01/2017
رابون مەعروف

دوای شکستی حوکمڕانی هەرێم و بێهیوابونی چین و توێژێکی فراوانی خەڵك لە بەدیهاتنی خەونەکانیان بۆ دونیایەکی باشتر و دادپەروەرتر، ئێستا وڵاتەکەمان کەوتوەتە سەردەمی سەرهەڵدانی نیشانەکانی ئەو شکستە. سەرهەڵدانی خۆزگە و حەنین بۆ رۆژگاری صەدام حسێن و رژێمەکەی یەکێكە لە نیشانە هەرە شوم و خەمهێنەرەکانی شکستی حوکمڕانی کورد.

بێگومان، صەدام حسێن یەکێك لە خوێناویترین دیکتاتۆرەکان و رژێمەکەشی یەکێك لە ترسناکترین رژیمەکانی دونیای هاوچەرخ بو. رژێمەکەی صەدام نەك هەر باش نەبو، بەڵکو ئەزمونی حوکمڕانی هەرێمی کوردستان بۆیە شکستی خوارد چونکە نەیتوانی بنەڕەتەکانی رژێمەکەی صەدام تێپەڕێنێت و بناغەی سیستەمێکی سیاسی جیاواز و دادپەروەر و ئازاد دامەزرێنێت. ئەزمونی هەرێم بۆیە کەوت، چونکە هێشتا جیهانبینی رژێمەکەی صەدام زاڵ و باڵادەستە.

دوای ئەنفال و گۆڕەبەکۆمەڵەکان، پیاهەڵدان بە صەدام و رژێمەکەی، لە کوردستان و بەزمانی کوردی، ئاماژەیە بۆ کەوتن و شکستێکی گەورە کە هەمو سوچ و قوژبنێکی ئەم وڵاتەی گرتۆتەوە. لەکاتێکدا، پایەماڵکردنی بنەماکانی دادپەرروەری و راماڵینی ئازادی و مافە تایبەتییەکان و پاشەکشەی ژیانی رۆحی و کولتوری و سەرهەڵدانی گەندەڵی فراوان ،، نیشانەی شکستی حوکمڕانی هەرێمی کوردستانن، خمول و خلیچکی و نەبونی جۆشی بەرەنگاری و گیانی داهێنان و تاسە و عەزرەت بۆ ئایندەیەکی باشتر و .. دواجار سەرهەڵدانی حەنین بۆ صەدام و رژێمەکەی، ئاماژەن بۆ کەوتنی کورد وەك جڤاك و کۆمەڵگە.

حەنین و خۆزگە بۆ صەدام و رژێمەکەی نەك هەر بەشداری ناکات لە راستکردنەوەی کورد و زیندوکردنەوەی گیانی داهێنان و بەرەنگاری، بەڵکو داڕزانەکە فراوانتر و کوشندەتر دەکات. رێگەی رزگاری کۆتایی هێنانە بە هەمو ئەو بنەمایانەی صەدام و رژێمەکەیان دروستکرد کە تا ئێستا لە عێراق و هەرێمی کوردستان زاڵ و باڵادەستن. دەروازەی نەجات داهێنان و بیناکردنی ئەزمونێکیتری حوکمڕانییە کە نەك هاوشێوەی رژێمەکەی صەدام نەبێت بەڵکو هیچ خاڵێکی هاوبەش کۆیان نەکاتەوە.



هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی



Copyright 2018. westganews.net. All Rights Reserved.