‌ياریكردن بە یەكریزی كوردەوە
PM:09:12:12/01/2018
نەبەز گۆران



ئێستا دەنگێك پەیدابووە، داوا دەكات لە ناوچە كێشە لەسەرەكاندا كورد بە یەك لیست بەژداری هەڵبژاردنەكان بكات! ئەم دەنگە گەر بە دیوە (كورد بوون)ەكەدا تەماشای بكەیت، دەنگێكە شایەنی پاڵپشتی كردنە، ئەما كاتێك تەمی سەر دەنگەكە لابدەیت و ماهییەتە ئایدۆلۆژییەكەی دەخەیتە روو، دەزانی ئەم دەنگە، مانایەكی نییە جگە لە خزمەتكردنی ئایدۆلۆژیای حیزبی، لەژێر گوتاری یەكریزیدا.

نوكتەیەك هەیە پڕە لە حەقیقەت.دەڵێت: ” كوردەكان تەنها لەكاتی هەڵپەركێدا دەستی یەكتری دەگرن.” ئەم نوكتەیە بەشێكە لەو كلتوورەی كۆمەڵگەی كوردیی لەسەر بونیاد نراوە. ئەشێت لە دیوێكدا وەك نوكتە سەیری بكەین، لێ‌ دیوە راستەقینەكەی پڕە لەو حەقیقەتەی كۆمەڵگەی كورد مێژووەكەی مێژووێك بووە لە پەرتەوازەیی. كاتێك حیزبی كوردیی دروستدەبێت، ئەم پەرتەوازەییە قوڵتردەبێتەوە و لەشوێنی یەكگوتاری و، یەكریزی، ئایدۆلۆژیا و بەرژەوەندی حیزبی و تاكە كەسی شوێنی دەگرێتەوە.

لە سەرەتای ساڵانی شەستەكانەوە بەشی باشووری كوردستان، لەرێگای حیزبەوە پەرتەوازەییەكەی گەیاندوەتە ئاستێك زۆر قورسە بە كاتێكی كەم سەرلەنوێ‌ بونیادی بنێیتەوە. خۆ كوێركردنە گەر پێمانوابێت كوردی ئەم بەشە لەهەوڵی یەكریزیدا بووە. دروستبوونی حیزب، بنەوانێك نەبووە بۆ خەمی گشتی، بە پێچەوانەوە بنەوانێك بووە بۆ هەڵوەشاندنەوەی ئەو خەمە گشتییە. حیزب كە دێت گوتاری گەورە گەورە هەڵدەگرێت، لەپشت هەریەك لەو گوتارانەشەوە، بیركردنەوەیەكی جەهەنەمی خۆی شاردوەتەوە. هێندەی حیزب كاریكردوە بۆ هەڵوەشاندنەوەی یەكریزی، هیچ كات دژەكانی ئەم كۆمەڵگەیە ئەو كارانەیان نەكردوە. یەكریزی كاتێك دروستدەبێت خەمی گشتی شوێنی خەمی تاكەكەسی و ئایدۆلۆژی حیزبی بگرێتەوە. ڤەلێ‌ كە ئایدۆلۆژیا و بەرژەوەندی تایبەت هەمیشە لە پێش خەمە گشتییەكانەوەبێت، بەرزكردنەوە و هاواركردنی گوتاری یەكریزی، مانایەكی نییە.

حوكومڕانی حیزب لە ماوەی بیست و پێنج ساڵ، مۆدێلێك بوو بۆ دابەشكردنی كۆمەڵگە بەسەر رەنگە حیزبییەكاندا. مۆدێلێك بوو تەنانەت حیزب دەستی خستە ناو (خێزان) كە بناغەی كۆمەڵگەیە و، لە (خێزان)ەوە، تا دەگاتە رووبەری گشتی پەرتەوازە كرا. ئێستا كە باس لە یەكریزی دەكرێت بۆ ناوچەیەك، ئەمە نمایشێكە بۆ داپۆشینی بیركردنەوە دۆزەخییەكە. ئەركی هەریەكێك لە تاكەكانی ئەم كۆمەڵگەیە بنەوانی پەرتەوازەییەكە بناسێت و، دەست بخاتە سەر برینە راستەقینەكە، نەك فریوی گوتارێك بخوات بۆ پاراستنی بەرژەوەندی تاكەكەسی و ئایدۆلۆژی حیزبی بەرزدەكرێتەوە.

ناوماڵی كورد ناوماڵی حیزبی لە باشووری كوردستان لەوپەڕی درز تێبووندایە. ئەو هێزانەی بانگەشەی یەكریزی دەكەن، خۆیان دینەمۆی لێكترازانن. یەكریزی لای ئەوان ئەو كاتە مانای هەیە حیزب و كەسەكانی بپارێزێت. بۆئەوەی یەكریزی دروستبێت، پێویستە تەواوی بیركردنەوەی سیاسیی بگۆڕێت. چاوەرواندەكرا پاش شكستە گەورەكەی (16 ئۆكتۆبەر) بیركردنەوەی سیاسیی لە بنەرەتەوە بگۆڕێت، كەچی نەك نەگۆڕا، جارێكی دیكە حیزب بە هەمان نالۆژیكی و بەهەمان كەرەستەی بەرهەم هێنانی رق و، دابەشكردنی كۆمەڵگە بەسەر رەنگی حزبیدا كەوتەوە گەڕ. ئەم وزە دۆزەخییە لە تێگەیشتنی سیاسیی بووەتە كۆسپێكی گەورە لەبەردەم كۆمەڵگە. باشووری كوردستان لەژێر چنگی دوو حیزبی باڵادەستدا، تەنها شكستی لە بەرێوەبردن و، شكستی لە پاراستنی ناوچەكانی خۆی نەهێناوە، بەڵكو شكستی لە دروستكردنی پایە راستەقینەكانی كۆمەڵگەیەكی تەندروستیش هێناوە. كاتێك حیزب بانگەشە بۆ وتارێك دەكات، لەپشت وتارەكەوە بەرژەوەندییەك وەستاوە، ئەو بەرژەوەندییە پەیوەندی بە خەمی گشتییەوە نییە و وتارەكە بۆ خزمەتكردنی ئەو بەرژەوەندییەیە، تا ئەو چیرۆكە كۆتایی نەیەت، خەمە گشتییەكە شوێنی خۆی ناگرێت.

حیزبی كوردی ناتوانێت یەكریزبێت، ئەمە مێژووەكەیان و سروشتیانە. بۆچوونی جیاواز لەسەر خۆ بەرێوەبردن و سیستەم، لەبری یەكتر قبوڵكردن یەكتر سڕینەوە هاتوەتە جێگای. بڕواكردن بەوەی كە باس لە یەكریزی دەكرێت، ئیشی ئەوانەیە حیزب وەك خۆی ناناسن. پەرتەوازەیی بەشێكی گەورەی پەروەردەی حیزبییە. شكستانی حیزب نابنە دینەمۆیەك بۆ سەرلەنوێ‌ بیركردنەوەی نوێ‌، لەبری ئەمە دەسەڵات ویستن و، پاراستنی میراسێكی پیسخۆر_گەندەڵ شوێنی كۆی بیركردنەوە نوێیەكان دەگرێتەوە!

پاش ئەم دیمەنە خەمبارانە، ئێستا باس لەیەكریزی دەكرێت بۆ ناوچەیەكی لەدەستچوو، كە بەهۆی هەڵەو بیركردنەوەی نارێكوپێكەوە دیمەنەكان رویاندا. لەبری گەڕانەوە بۆ بونیادی هەڵەكان بانگەشەی یەكریزی بۆ پاراستنی حیزب شوێنی دەگرێتەوە! لە كاتێكدا ئەو دەنگەی باس لەم یەكریزییە دەكات ئامادەنییە لە بچوكترین دەسەڵاتی خۆی خۆشبێت! ئامادەنییە سازشێك لەبەردەم حیزبێكی كوردییدا بكات و، ئامادەیە گەورەترین شازش لەگەڵ بێگانەكان بكات! ئەم عەقڵە چۆندەتوانێت یەكریزی دروستبكات؟! كە ئەم عەقڵە بانگەشەی یەكریزی بكات، بێگومان یەكریزی جگە لەیارییەك بۆ كاتێكی دیاریكراو، ئەركێكی دیكەی نییە.

نەبەز گۆران



ئه‌م بابه‌ته 798 جار خوێنراوه‌ته‌وه‌‌
هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی



Copyright 2017. westganews.com. All Rights Reserved.