بۆ: هاوڕێم رێباز...

‌نەبەز گۆران

سڵاو... دەستە خرپنەكانت دەگوشم

راستییەكەی هەم نیگەرانم، هەم سەرسامم! نیگەرانم لەوەی زیاد لە دەساڵە یەكتری دەناسین و، دور و نزیك ئاگامان لەیەكترییە، كەچی لەو چركەساتەی پێویستە وەك هاوڕێ پرسورا بەیەكتری بكەین بۆ ئەوەی بڕیارێك بدەین، پرس بە هاورێكانمان ناكەین و ئەبێت لە ناو دونیای شاشەكاندا بزانین هاوڕێكمان چ بڕیارێك دەدات! سەرسامیشم بەوەی تۆ بەو هێمنییەوە، بەو بروابەئیشكردنەوە، بەو نەرم و نیانیەی خۆتەوە، بەو سروشتەی هەتبوو لە گوێگرتن، بۆچی بەبێ‌ ئاگاداری هاوڕێكانت بڕیارێك دەدەی؟ حەقی خۆمە گلەیی بكەم وەك هاوڕێیه‌ك یان نا؟

رێباز گیان...

بەهیوام سەبرت هەبێت، ددان بەخۆتابگریت و، وانەزانیت هاوڕێكانت ئیتر تۆ دەخەنە پەراوێزی ژیانیانەوە. بەڵام حەزەكەم پێتبڵێم، بەینی خۆمانبێت بیانوەكەت لەسەر ریفراندۆم كەمێك لە جێگای خۆی نییە، چونكە بزوتنەوەی گۆڕان دژی ریفراندۆم نییە، بزوتنەوەی گۆڕان داوایكردوە دوابكەوێت، ئەم داواكردنەشی بۆ ئەوە نییە دژی بێت، چونكە هیچ كوردێك كە رۆژێك ئازاری كوردبوونی بینیبێت دژی ریفراندۆم و دەوڵەت نییە. داواكەی بۆ دواخستن جۆرێكە لە هەستكردن بەبەرپرسیاریەتی. هەرەشەكان بۆ سەر كۆمەڵگەكەمان لەلایەن دونیاوە دورنییە دۆخێك دروستبكات ئازاری كۆمەڵگەكەمان بدات. (هیوادارم شتی وا رونەدات) كەوایە ئەم بزوتنەوەیە لە گۆشەنیگای پاراستنی كۆمەڵگەكەو هەرێمەكەمانەوە ئەم داوایە دەكات، نەك لە گۆشە نیگای دژبوون. دەبایە كەمێك ورتر لەسەر دیدی بزوتنەوەكە بۆ ریفراندۆم و شێوەی دروستكردنی دەوڵەت وردببویتایتەوە. بۆیە مافم بدەرێ‌ وەك هاوڕێك بڵێم: بیانوەكەت تۆزێك لەجێگەی خۆی نەبوو، حەقیش نییە بزوتنەوەی گۆڕان بەوە تۆمەتباربكەیت دژی دەوڵەت بێت، چونكە وانییە. 

رێبازگیان...

من و زۆرێك لە هاورێكانت، هەرگیز ناتوانینن هیچ تۆمەتێك نە بۆتۆ، نە بۆ هاوڕێكانی ترمان لە ئایندەدا دروستبكەین. ناشتوانین رێگای جیایی بكەینە بیانوێك بۆ ئازاردانی یەكتری. تكا دەكەم وا سەیرنەكەیت مادام رێگا جیایت هەڵبژاردوە ئیتر تۆ هاورێی ئێمە نیت. ناشزانم ئایا بەرێز (كاك عومەری سەید عەلی) رێكخەر و بەرێزانی خانەی ڕاپەراندنی بزوتنەوەی گۆڕان دەستلەكاركێشانەوەكەت قبوڵدەكەن یان نا. ئەوە بڕیارێكە لای ئەوانە و كەسیتر بۆی نییە لەو بارەیەوە قسە بكات. من تەنها وەك هاوڕێك قسە دەكەم. گەر بیرت بێت نزیكەی دەساڵە یەك دەناسین و كەمێك پێكەوە كارمانكردوە. بۆمن ئەوە گرنگ نییە، هاوڕێكانم چ پۆستێكیان هەیە، ئەوەی گرنگە پاراستنی شكۆی هاوڕێیەتی و بەرگریكردنە لە بڕواكان. ئەگەر تۆ سبەی بەرێگایەكی تردا بڕۆیت و دور بیت لە رێگاكەی من، ئەمە هەرگیز ناكاتە ئەوەی من تۆ بە كەسێكی خراپ ببینم. تۆ هەر هاورێكەی جارانی. 

خۆتەزانی كاك (نەوشیروان) زۆرێك لە هاوڕێ‌ دێرینەكانی لەناو یەكێتیی نیشتیمانی ئازارێكی زۆریاندەدا، قسەی زۆر نابەجێیان پێدەوت، بەڵام كە دەهاتن بۆلای رێزی دەگرتن، تەنانەت رێزی ئەوانەشی دەگرت زۆر بەدوژمن سەیریاندەكرد و دەسەڵاتیان بەسەریدا بشكایە لەناویان دەبرد، كەچی ئەو هەمیشە لەكاتی خۆیدا رێزی دەگرتن، ئەمە پەروەردەیە. مرۆڤ ویستی لەناو رووبەری سیاسییدا كاری سیاسیی بكات، نەك هاورێكانی، تەنانەت دەبێت رێزی نەیار و دوژمنەكانی بگرێت. ئێمە گەنج بووین، زۆریش گەنج بووین كە ئەو پیاوەمان ناسی، راستی من بۆخۆم شتی زۆر جوان لەو پیاوە فێربووم . بەهەمان ئەو شتەجوانانەوە لەوم وەرگرت دەمەوێت قسە لەگەڵ تۆبكەم. گەردەتەوێت پەروەردەی سیاسیی راستەقینەی ئەو پیاوە ببینی، دەبێت لەرێگای ئەوانەوە بیبینی كە بەراستی ئەو دەناسن. 

بەهیوام دڵگران نەبیت لە هەندێك شت كە پێتدەوترێت، بەهیواشم واتێنەگەیت هاوڕێكانت ئیتر لەگەڵت گۆڕاون. لەهەرشوێنێك هەی ببە، بەڵام هەرگیز بڕواكانی خۆت لەدەست مەدە. شوێنەكان گرنگ نین، برواكان گرنگن.

پێمخۆشە بە قسەكانم دڵگران نەبیت، گەر دڵگرانیش بیت توڕەدەبم ودەموچاود دەدەم بەیەكا و وەكجاران بانگت دەكەم بۆ كافێك و، پێكەوە چایەك دەخۆینەوە و دەستێك دێنم بەسەر برینەكانتدا. 

هەركاتێك ویستت من ببینیت، هەر لەشوێنی خۆمم، لای دەستەچەپی كتێبخانەكەی (كاك نەوشیروان)دا بگەرێ، لەو ناوە دەمدۆزیتەوە.

هاوڕێت

نەبەز گۆران

Image may contain: 1 person, suit