‌رووداوەکانی پەرلەمان لەبەغدا لەگۆشەنیگای هەرێمی کوردستانەوە
PM:05:17:02/05/2016
توانا عوسمان

ئەگەر لەتێڕوانینی سیاسی و چاودێرانی هەرێمی کوردستانەوە دیقەتی روداوەکانی پەرلەمانی عێراق بدەین، دوو شتمان بەزەقی بۆ رووندەبێتەوە..

یەکەم: تێروانینێکی بێ ئومێدانەی وا هەیە کەپێی وایە ئەوەی لەپەرلەمان روویدا "کۆتایی پرۆسەی سیاسیە لەعێراقدا" وەک ئەوەی لەزاری پەرلەمانتارێک و نوسەرێکی کوردەوە گوێمانلێبوو.

دووەم: تێڕوانینێکی توڕەی وەهاش هەیە "بەتایبەت لەناو تۆرە کۆمەڵایەتیەکان" کەئەزموونی بەغدا مایەی گاڵتەپێکردنەو ئەو خەڵکەشی هەڵیانکوتایە سەر پەرلەمان مرۆڤ نین و تەنانەت وەک پەرلەمانتار رەنگین عەبدوڵاش ووتی "حەیوانن".!

بەبۆچونی من هەردوو تێروانینەکە هەڵەیە، ئەوەی روویدا نەک کۆتایی پرۆسەی سیاسی نیە لەبەغدا، بەڵکو بەشێکە لەچڕبونەوەی پرۆسەی سیاسی، بەتایبەت کەهەڵکوتانە جەماوەرییەکە بەبێ چەک کرا، کەسی تیا نەکوژرا، دوای چەند کاتژمێرێک خەڵکەکە پاشەکشەیان کرد، ئەمەش جوڵەیەکە لەچوارچیوەی پرۆسەی سیاسی حساب بۆکراودا.. بیرمان نەچێت بەغدا ٣٥ ساڵ دیکتاتۆرێکی خوێناوی حوکمی کردوەو پێش ئەوەش ٥ ساڵ بەزنجیرەیەک کودەتادا تێپەڕیوە "١٩٦٣-١٩٦٨"..

هەموو هاتنە دەرەوەیەکی دەستەڵاتیش لەقۆناغێکی دیکتاتۆرییەوە بۆ قۆناغی پەرلەمانی، بە ماوەیەکی ناجێگیر و سەختدا تێدەپەرێت و باجی گەورەی هەیە.. ئایا دەزانن ئێمە لەهەرێم دوای قۆناغی دیکتاتۆریی سەدام، کەوتینە شەڕی ناوخۆوە و لەپەڕلەمانەوە بەجیهاز رەسەدی کاتیۆشامان ئەدا بەیەکتر؟ ئایا بیرمانە ئێمە لە ١٩٩٤ تا ١٩٩٨ لەشەری ئەهلیدا بووین و تا ٢٠٠٥ دوو ئیدارە بووین و بەئێستاشەوە هەرێمی کوردستانمان بەفیعلی یەکنەخستوە! سەبارەت بەتێڕوانینی دووەمیش ئەوانەی کەپێیان وایە ئەو خەڵکەی هەڵیکوتایە سەر پەرلەمان، حەیوانن.. دەڵیم: هەموو ئەوانەی ئاگایان لەمێژووی کۆمەڵگەکان و ئەوانەشی لەسایکۆلۆجیان جەماوەر تێدەگەن، دەزانن کەهەمیشە قەرەباڵغیەکان وەختێک دەگەنە خاڵی توڕەیی لەیەکدەچن، یەک روخساریان هەیە، ئیتر ئەگەر لەسلێمانی بێت یان بەغدا یان لەندەن یان پاریس یان ولایەتی میزووری ئەمەریکی..

لەلەندەن ساڵی ٢٠١١ خۆپیشاندان، دژی کوژرانی گەنجێک بەدەستی پۆلیس بوە مایەی لێشاوێک لەتاڵانکردن و دوکان شکاندن و سوتاندنی موڵکی گشتی و تایبەت و بەهۆیەوە ١١٠٠ کەس دەستگیرکران..

لە فەرەنسا لە ٢٠٠٥ تورەیی خۆپیشاندەران لەسەر مامەڵەی رەگەزپەرستانەی پۆلیس بوە مایەی ٨٧٠٠ حاڵەتی سوتاندنی ئۆتۆمبێل و دوکان و شوێنی گشتی و بەدرێژایی ١٩ شەو ٢٧٠٠ کەس دەستگیرکران.. ئەمە جگە لەپشیێوییەکانی ولایەتی میزووری لە ئەمەریکا پێش ساڵێک..

ئەسڵەن ئەگەر بەراوردی بکەین بەوەی بەغدا لە هەموو تورەییە جەمارەرییەکەی پەرلەماندا، کەس نەکوژرا، گڕ بەرنەدرایە هیچ جێگەیەک "کەزۆر ئاسانە" هەروەها لە هیچ لەڤیدیۆکدا نەمانبینی هاوڵاتیەک چەکداربێت، نە بەدەمانچە نەبەچەقۆ.. لەکاتێکدا توڕەیی خەڵکی بەغدا دژی کوژرانی گەنجێک یان مامەڵەیەکی رەگەزپەرستانەی پۆلیسێک نیە، بەڵکو توڕەییە بەرامبەر بەدەستەڵاتدارێتی ١٣ ساڵی رابردوودا لەواقعێک کەزیاتر لە 1 ملیۆن هاوڵاتی مەدەنی تیاکوژراوەو سەدان ملیار دۆلاری تیا بەهەدەر دراوە.

تێبینی: هاوسۆزم لەگەڵ پەرلەمانتارە گیرخواردو ئازاردراوەکان و بەتایبەت کوردەکان، بەقەد دونیایەک بەسەلامەتبونیان دڵخۆشم و وێنەکەی ئارام و ئاڵاش دڵی رۆشن کردمەوە.

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی



Copyright 2018. westganews.net. All Rights Reserved.