‌با لێپرسینەوە لە "ئیبن تەیمیە" بکەین
PM:05:55:27/03/2017
توانا عوسمان


تا "کافرێک" دەکوژی، ناچاردەبیت دەیان موسڵمان و خەڵکی بێ تاوانی پێوە بکوژی.. چونکە "کافرەکان" بۆ پاراستنی خۆیان، موسڵمان و خەڵکی بێتاوان وەک قەڵغان بەکاردەهێنن.

بەڵام ئایا بۆت هەیە بۆ گەیشتن بەتیرۆرکردنی "کافرێک" دەیان موسڵمان و بێ تاوان بکوژی؟

"کافرەکان" کوشتنیان ئاسان نیە چونکە ئەوان بەچەندین خەڵکی بێ تاوان و سڤیل دەورە دراون.

نزیکەی 700 ساڵ لەمەوبەر ئیمامێکی توندڕەوی ئیسلام وەڵامێکی فیقهی ئەم پرسیارە ئاڵۆزە دەداتەوە و دەیکات بە بنەمایەکی شەرعی و دەڵێت بەڵێ ئەگەر ویستت "کافرێک" بکوژی بیکوژە ئەگەر تەنانەت موسڵمان و بێ تاوانیشی پێوەببێت.
تقي الدين أبو العباس أحمد بن عبد الحليم ناسراو بە "ئیبن تەیمیە" چەمکی "التترس" دادەهێنێت و ئەیکات بەفەتوا.

ئەم پرەنسیپە کەساڵانێکە ئەلقاعیدە و داعش و بزوتنەوە جیهادیەکان کاری لەسەر دەکەن، بنەمایەکی فیقهیە و شێخی موسڵمانان "ئیبن تەیمیە" بەشەخسی لێی بەرپرسە.
ئیبن تەیمیە لە کتێبی "مجموع الفتاوى" بەروونی فەتوا دەدات و دەڵێت "ئیمامەکان لەسەر ئەوە رێککەوتون کەئەگەر کافرەکان خۆیان لەپشتی موسڵمانەکانەوە مەڵاسدا و ئەگەر ئەمەش وایکرد موسڵمانەکان بترسن لەکوشتن، ئەوا دەکرێت لەکافرەکان بدرێت تەنانەت ئەگەر موسڵمانەکانیش پێوەببن".. "مجموع الفتاوى: ج28/ص292".

لەسەر ئەم بنەما شەرعیەی ئیبن تەیمیە، لەسەدەی بیستدا هەم ئوسامە بن لادن هەم زەواهیری هەم سەرکردەکانی داعش و بزوتنەوە جیهادیەکان پێیان وایە، ئاسایە لەپێناو ئامانجێکی "کافرانەدا" خەڵکی بێ تاوانی تر و مەدەنیش پێوەببن.. یەکەمیان ئەنێریت بۆ جەهەنەم و دووەمشیان بۆ بەهەشت.

ئەم بنەما شەرعیەی ئیبن تەیمیە کە ناوی ناوە چەمکی "التترس" واتە خۆمەڵساندن یان بەکارهێنان وەک قەڵغان، یان خۆحەشاردان لەپشتی شتێکەوە، ئەگەرچی تەمەنی نزیکەی 700 ساڵە، بەڵام لەئێستادا بنەمایەکی فیقهیە بۆ شەرعیەتدان بەو تەقینەوانەی کەمانگانە دەبێتە هۆی کوشتنی ژمارەیەکی زۆر خەڵکی موسڵمان و مەدەنی و بێتاوان، زۆر زیاتر لەژمارەی ئەو کەسانە لەبنەڕەتدا ئامانجی کردەوەکانە.

هەندێک لەرەخنەگرە "هەڵوێست وەرگرەکان" مەسەلەی توندوتیژی و رەگوڕیشەکەی دەبەنەوە بۆ ناو قورئان و فەرموودەکان، بەوەش رێگەیەکی ئاسان و بێ سوود دەگرنەبەر.. بەشێکیش لەئیسلامیە داخراوەکان ئەوەیان پێخۆشە، چونکە بەرپرسکردنی قورئان و فەرموودەکان لەتوندوتیژەیەکان، پێگەی دیفاعی ئەوان بەهێزئەکات و بەئاسانی کۆی رەخنەکان لەبەردەم دەرگای قورئاندا پان دەکەنەوە. 

بەڵام کاتی ئەوە هاتوە، ئیشەکە لەو رەخنەگرە هەڵوێست وەرگر و ئاسانخوازانە تێکبدەین، بیانوش لەئیسلامیە داخراوەکان وەربگرینەوەو بڵێن.. کێشەکە لەقورئان و فەرموودە پیرۆزەکاندا نیە.. بەڵکو کێشەکە لەناو کلتور و میراتی ئیسلامیدایە، کێشەکە لای خەڵکانی وەک ئیبن تەیمیەیە کەدەبێت لێپرسینەوە لەمیراتە فیکرەکەی بکەین.


هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی



Copyright 2018. westganews.net. All Rights Reserved.