پارێزگاری‌ سلێمانی‌: حکومەتی هه‌رێم داواکارییەکانی پەسەندکردین ​

‌هەڤاڵ ئەبوبەکر پارێزگاری‌ سلێمانی‌

وێستگه‌ نیوز ـ
پارێزگاری‌ سلێمانی‌ رایگەیاند، حکومەتی‌ هەرێم داواکارییە کارگێڕیی و داراییەکانی‌ پارێزگاکانی‌ سلێمانی‌ و هەڵەبجە و ئیدارەکانی‌ گەرمیان و راپەڕینی‌ بۆ ئەمساڵ پەسەندکرد.


هەڤاڵ ئەبوبەکر پارێزگاری‌ سلێمانی‌ بڵاویکردەوە، ئەمڕۆ سێشەممە، بەسەرپەرشتیی سەرۆکی ئەنجومەنی وەزیران و بە ئامادەبونی جێگری سەرۆکی ئەنجومەن و وەزیرانی دارایی و ئابوریی و پلاندانان و سەرۆکی دیوانی سەرۆکایەتیی ئەنجومەنی وەزیران و پارێزگاری پارێزگاکانی سلێمانی و هەڵەبجە و فەرمانگه‌ پەیوەندیدارەکانی  ئەنجومەنی وەزیران، لە رێی ڤیدیۆ کۆنفرانسەوە کۆبوونەتەوە.


جۆین بە لەگەڵ هەواڵە بەپەلەکانی وێستگە نیوز لە تیلیگرام

ئەوەشی خستووەتەڕوو، کۆبوونەوەکە تایبەت بووە بە بوارە کارگێڕیی و دارایی و خزمەتگوزاریی و پڕۆژەکانی پارێزگاکانی سلێمانی و هەڵەبجە و ئیدارە سەربەخۆکانی گەرمیان و راپەڕین.

هەڤاڵ ئەبوبەکر دەشڵێت: "لە کۆبوونەوەکەدا بە روونی و بە وردیی راپۆرتی هاوبەشی سەرۆکایەتی دیوانی ئەنجومەنی وەزیران و پارێزگاو یەکەکارگێڕییەکان و داواکارییە کارگێڕیی و دارایی و خزمەتگوزاریی و سەرمایەگوزاریی و پەرەپێدانەکانی هەموو یەکە کارگێڕیی و فەرمانگاکان گفتوگۆیان لەسەرکرا".

باسی لەوەشکردووە، "هەموو ئەو پێشنیاز و داواکارییانەی لە راپۆرتە هاوبەشەکاندا گەڵاڵەکرابوون لەلایەن سەرۆکی ئەنجومەنی وەزیران و جێگری سەرۆکی ئەنجومەنی وەزیران و وەزیرەکانەوە پەسەندکران و بوون بەبڕیار".

بەوتەی‌ هەڤاڵ ئەبوبەکر، ئەو سێکتەر و بوارانەی لەم راپۆرتانەدا بۆ ساڵی 2021 پەسەندکراون دەتوانن بەشی زۆری داخوازیی و پێداویستییە زۆر پێویستەکانی دامەزراوە دەوڵەتییەکان دابینبکەن بۆ ئەوەی بتوانن خزمەتی زیاتری هاووڵاتیان بکەن.


PM:02:24:23/02/2021






ئه‌م بابه‌ته 3832 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت