لە مانگێكدا دووجار بەرهەم ساڵح و ئارام قادر كۆبوونەوە

‌

بەپێی راگەیەنراوی نووسینگەی ئارام قادر، سەرۆكی هاوپەیمانی نیشتمانی، لە ماوەی چوار ڕۆژی ڕابردوودا بە یاوەری هەریەك لە سالار ئەربیل، یاریدەدەری سەرۆك و شڤان سەعید ئەندامی ئەنجومەنی جێبەجێكردنی هاوپەیمانی و شیراز عەبدولغەنی بەرپرسی نوسینگەی سەرۆك، سەردانی شاری بەغدای پایتەختی عیراقیی كرد و چەند دیدار و كۆبوونەوەیەكی گرنگی ئەنجامدا.

هەر بەپێی راگەیەنراوەكە، لە میانی ئەو سەردانەدا، سەرۆكی هاوپەیمانی لەگەڵ بەرهەم ساڵح سەرۆك كۆماری عێراق و عەدنان زورفی سیاسەتمەداری دیاری عێراقی و ڕائید فەهمی سكرتێری حزبی شیوعی عێراقی و ڕەشید عەزاویی سەرۆكی حزبی ئیسلامیی عێراقیی و همام حەموودی سەرۆكی ئەنجومەنی ئیسلامیی عێراقی و  چەند سیاسەتمەدار و پەرلەمانتار و كەسایەتی تر، كۆبوونەوەی ئەنجامدا.

لە كۆبوونەوەكاندا سەرۆكی هاوپەیمانی جەختی لە پتەوكردنیی پەیوەندییە نیشتمانییەكانی نێوان لایەنە سیاسییە عێراقیی و كوردستانییەكان كردەوە لەپێناو پێشخستن و باڵاكردنی گیانی پێكەوەژیان و هەماهەنگییكردنی یەكدی، هەروەها لەكۆبوونەوەیدا لەگەڵ سەرۆك كۆماری عێراق دووپاتی لە گرنگی ڕێككەوتنی نێوان هەرێم و بەغدا كردەوە، لەبارەی بەشە بودجەی كوردستان و كێشە هەڵپەسێردراوەكانی وەكو مادەی ١٤٠ی دەستوور و خاڵە سنورییەكان و پڕچەككردنی پێشمەرگە و پرسەكانی تر.

جێی ئاماژەیە لەسەرەتای ئەم مانگەشدا لەناوچەی مێرگەپان لەشاری سلێمانی كە شوێنی حەوانەوەی بەرهەم ساڵح، سەرۆك كۆماری عێراقە، بەرهەم ساڵح و ئارام قادر كۆبوونەوە، ئەو كۆبوونەوانەش لەكاتێكدایە دوو ساڵ لەمەوبەر بەرهەم ساڵح، دوای جیابوونەوەی لەیەكێتی، لەگەڵ ئارام قادر و ژمارەیەك سیاسی دیكە حیزبێكی نوێی بەناوی (هاوپەیمانی بۆ دیموكراسی و دادپەروەری) راگەیاند و بەشداری هەڵبژاردنی پەرلەمانی عێراق لە 2018دا كرد و دوو كورسی هێنا، بەڵام پێش هەڵبژاردنی پەرلەمانی كوردستان لە ئەیلولی 2018دا بەرهەم ساڵح، وازهێنانی لەهاوپەیمانی راگەیاند و گەڕایەوە نێو یەكێتی و بووە سەرۆك كۆماری عێراق، پاشان  هاوپەیمانیش لەكۆنگرەیەكدا ناوی حیزبەكەیان لە (هاوپەیمانی بۆ دیموكراسی و دادپەروەری) بۆ (هاوپەیمانی نیشتمانی) گۆڕی.