روحانی هێرشیكرده‌سه‌ر به‌حره‌ین و ئیمارات


وێستگه‌ نیوزـ

دوای واژوكردنی رێككه‌وتنی ئاشتی له‌گه‌ڵ ئیسرائیل به‌ چاودێریی ئه‌مریكا، سه‌رۆك كۆماری ئێران هێرشكرده‌سه‌ر ئه‌و دوو وڵاته‌ی كه‌نداوی عه‌ره‌ب و تۆمه‌تباری كردن به‌وه‌ی به‌نیازن بنكه‌ی سه‌ربازی بده‌ن به‌ ئیسرائیل.

حه‌سه‌ن روحانی، سه‌رۆك كۆماری ئێران ئاساییكردنه‌وه‌ی په‌یوه‌ندییه‌كانی به‌حره‌ین و ئیماراتی به‌ پێشێلكردنی ئاسایشی نه‌ته‌وه‌یی ناوچه‌كه‌ زانی و رایگه‌یاند "سه‌رمان سوڕماوه‌ له‌وه‌ی چۆن ئه‌وانه‌ی بانگه‌شه‌ بۆ ره‌چه‌ڵه‌كی عه‌ره‌ب ده‌كه‌ن و ده‌ستییان بۆ ئه‌و كه‌سانه‌ درێژ ده‌كه‌ن كه‌ هه‌موو رۆژێك فه‌له‌ستینیه‌كان ده‌كوژن".

روحانی به‌ "درۆزن" تۆمه‌تبار كرد له‌ پرسی سه‌پاندنی سزا به‌سه‌ر ئێران و وتی "ئه‌مریكا هه‌وڵی داڕمانی ئابوری و كۆمه‌ڵایه‌تیی ئێران ده‌دات و ویستی به‌ كشانه‌وه‌ له‌ رێككه‌وتنه‌ ئه‌تۆمییه‌كه‌ پیلان بۆ هاتنه‌ناو ئێران و كۆنتڕۆڵكردنی بدات، به‌ڵام سه‌ركه‌وتوو نه‌بوو".

ئێواره‌ی دوێنێ سێشه‌ممه‌ 15ی ئه‌یلولی 2020، لە كۆشكی سپی، رێوڕەسمی واژوكردنی رێككەوتنی ئاشتی ئیمارات و بەحره‌ین لەگەڵ ئیسرائیل بەڕێوەچوو، بڕیاریشە ئیسرائیل باڵیۆزخانە لە ئیمارات و بەحره‌ین بکاتەوە.

بنیامین ناتانیاهۆ، سەرۆك وەزیرانی ئیسرائیل لە كۆشكی سپی و بە ئامادەبوونی دۆناڵد ترەمپ سەرۆكی ئەمریكا، رێككەوتنی ئاشتی لەگەڵ هەریەك لە ئیمارات و بەحره‌ین ئیمزاكرد و لە ئیمارات عەبدوڵا بن زاید، وەزیری دەرەوە و عەبدوللەتیف زەیانی وەزیری دەرەوەی بەحره‌ینیش بە نوێنەرایەتی وڵاتەكانیان رێككەوتنەكەیان ئیمزاكرد.

لەو رێوڕەسمەدا كە نزیكەی 700 میوانی وڵاتانی جیهان ئامادەی بوون، ترەمپ رایگەیاند ئێمە لێرەین بۆ ئەوەی رێڕەوی مێژوو بگۆڕین و هەنداوێكی مێژوویی لە پێناو بەهێزكردنی ئاشتی دەنێین.

لەكاتی بەڕێوەچوونی رێوڕەسمی  واژوكردنی رێككەوتنی ئاشتی، چەند موشەكێك لە كەرتی غەززەی فه‌له‌ستینه‌وە ئاڕاستەی ئیسرائیل كران.


AM:11:09:16/09/2020


ئه‌م بابه‌ته 1028 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت