بەرهەم ساڵح: عێراق هەوڵ دەدات ببێت بە هۆکاری ئارامی و ناوەندێکی ئاشتی لە ناوچەکەدا
وێستگە نیوز-
سەرۆک کۆماری عیراق و جێگری سەرۆک وەزیران و وەزیری دەرەوەی قەتەر کۆبوونەوە و بەرهەم ساڵح ڕایگەیاند، عێراق هەوڵ دەدات ببێت بە هۆکاری ئارامی و ناوەندێکی ئاشتی لە ناوچەکەدا.
بەپێی ڕاگەیەندراوێکی نوسینگەکەی، بەرهەم ساڵح، سەرۆک کۆماری عیراق ئەمڕۆ چوارشەممە ١٥ ی ١ ی ٢٠٢٠ لە کۆشکی سەلام لە بەغدا پێشوازیکرد لە جێگری سەرۆک وەزیران و وەزیری دەرەوەی قەتەر شێخ محمد کوڕی عەبدولرەحمان-ی دووەم.
لە دیدارەکەدا بارودۆخی ئێستای ناوچەکە و جیھان و چۆنیەتی ئارامکردنەوەی دۆخەکە گفتوگۆی لەبارەوە کرا بۆ پارێزگاریکردن لە ئاسایش و سەقامگیری ناوچەکە، ھەروەھا جەختکرایەوە لە پێویستی دان بەخۆدا گرتن و پەنابردن بۆ زمانی دیالۆکی ژیرانە بۆ کەمکردنەوەی ئاستی گرژی و پەرەسەندنەکان.
لە دیدارەکەدا سەرۆک کۆمار جەختی لەوە کردەوە عێراق هەوڵ دەدات ببێت بە هۆکاری ئارامی و ناوەندێکی ئاشتی لە ناوچەکەدا، ھاوکات پشتیوانی یەکخستنی هەوڵەکان دەکات بۆ چارەسەرکردنی قەیرانەکانی ئێستا، بەجۆرێک گەلانی ناوچەکە لە ئاشتی و خۆشگوزەرانیدا بژین.
بەرھەم ساڵح ئاماژەی بەوەشکرد کە عێراق نابێتە ناوەندێک بۆ دەست درێژیکردنە سەر وڵاتانی دراوسێ و گۆرەپانێک بۆ جەنگێکی نوێ کە توانا و وزەی گەلان لە بار بەرێت.
لە لای خۆیەوە وەزیری دەرەوەی قەتەر دووپاتی لە دۆخی هەستیاری ئێستا کردەوە و ئاماژەی بە گرنگی هەماهەنگی و کاری هاوبەش لەگەڵ لایەنە ئیقلیمی و نێودەوڵەتییەکان کرد لە پێناو گەشتن بە چارەسەرێکی ئاشتیانە کە ئاسایش و ئارامی ناوچەکە بپارێزێت.
هەر لە دیدارەکەدا چۆنیەتی گەشەپێدانی پەیوەندییە دوو قۆڵییەکانی نێوان عێراق و قەتەر گفتوگۆی لەبارەوە کرا، بەجۆرێک ئەو پەیوەندییانە خزمەت بە بەرژەوەندی هاوبەشی هەردوو گەلی برا بکات.
ش . ر
PM:04:35:15/01/2020
ئه‌م بابه‌ته 2020
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت