کۆبوونەوەی لوتکەی ئەنقەرە لە نێوان ئەردۆغان و پوتین و رۆحانی-دا بەڕێوەدەچێت

وێستگە نیوز-

سەرۆکانی هەر سێ وڵاتی تورکیا و روسیا و ئێران ئەمڕۆ دووشەممە لە ئەنقەرە کۆدەبنەوە و تاووتوێی چەند پرسێکی تایبەت بە سوریاو ناوچەکە دەکەن.

کۆبوونەوەکە هەوڵی دروستکردنی گرەنتیەک دەدا بۆ بنیاتنانی ئارامیەکی هەمیشەیی لە باکوری رۆژئاوای سوریا، بەتایبەتیش لە ئێستادا کە لەو ناوچەیەدا ئاڵۆزییەکان سەریان هەڵداوەوتەو و بوونەتە هۆکاری ئەوەی شەپۆلێکی دیکەی پەنابەرانی سوری روو لە تورکیا بکەن.

ئەم کۆبوونەوەیە لە کاتێکدایە کە هەریەک لە رۆحانی و پوتین پشتیوانی بەشار ئەسەد دەکەن لە رووبەڕوونەوەی ئۆپۆزسیۆنی سوریا، سەرۆکی تورکیا و ویلایەتە یەکگرتووەکانی ئەمریکا و هاوپەیمانەکانیان پشتیوانی هێز و لایەنە ئۆپۆزسیەکانی سوریا دەکەن.

ساڵی 2017 لە چوارچێوەی رێککەوتنێکدا لەگەڵ روسیا و ئێران تورکیا 12 یەکەی چاودێری لە باکوری رۆژئاوای سوریا جێگیرکرد بۆ دانانی سنورێک بۆ ئەو کوشتارەی لەنێوان سوپای سوریا و هێزەکانی ئۆپۆزسیۆن هەڵگیرسا بوو، بەم دواییانەش ئەو خاڵە سەربازییانە لەلایەن سوپای سوریاوە رووبەڕووی هێرش بوونەوە.

لەگەڵ ئەوەی لەنێوان ئەنقەرە و مۆسکۆ پەیوەندییەکی باش هەیە لە رووی سەرچاوەکانی وزە و پشتیوانی بەرگری بەڵام بەم دواییانە ئەو هێرشانەی سوپای سوریا بەرامبەر یەکە چاودێرییەکانی تورکیا ئەو پەیوەندییانەی بەرەو ئاڵۆزی برد .

ش . ر

PM:12:16:16/09/2019

ئه‌م بابه‌ته 1560 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت