وێستگه نیوزـ
حكومه‌تی ئه‌ڵمانیا بڕیاریدا مه‌شق و راهێنان به هێزه عیراقییه‌كان رابگرێت، ئه‌وه‌ش له‌كاتێكدایه كه ئه‌مڕۆ ئه‌مریكا بڕیاریدا ئه‌و كارمه‌ندانه‌ی كه له نوێنه‌رایه‌تییه‌كانی عیراق ناپێویستن، بگه‌ڕێنێته‌وه بۆ وڵاته‌كه‌ی.
ئاژانسی هه‌واڵی رۆیته‌رز بڵاویكرده‌وه كه ئه‌مڕۆ چوارشه‌ممه 15ی ئایاری 2019، حكومه‌تی ئه‌ڵمانیا بڕیاریداوه پرۆسه‌ی مه‌شق و راهێنان به هێزه عیراقییه‌كان و هێزه‌كانی پێشمه‌رگه‌ی كوردستان رابگرێت.
به‌گوێره‌ی ئاژانسه‌كه، هۆكاری راگرتنی ئه‌و پرۆسه‌یه ئه‌وه‌یه كه گرژی و ئاڵۆزییه‌كان له ناوچه‌ی خۆرهه‌ڵاتی ناوه‌ڕاست به‌ره‌و زیادبوون ده‌ڕوات.
ئەڵمانیا 160 راوێژکار و سەربازی لە عیراق هه‌یه كه ئه‌ركیان راهێنان و مەشقکردنه بە هێزی پێشمەرگە و هێزە عیراقییەکان، لەو ژمارەیەش 100 سەربازیان لە هەرێمی کوردستانن و راهێنان بە هێزی پێشمەرگەی كوردستان دەکەن.
بڕیاره‌كه‌ی ئه‌ڵمانیا بۆ راگرتنی مه‌شق و راهێنانه‌كان به هێزی پێشمه‌رگه و هێزه عیراقییه‌كان له‌كاتێكدایه كه هه‌ر ئه‌مڕۆ چوارشه‌ممه 15ی ئایاری 2019، وه‌زاره‌تی ده‌ره‌وه‌ی ئه‌مریكا، له راگه‌یه‌ندراوێكدا فه‌رمانی ده‌ركرد بۆ ئه‌و كارمه‌ندانه ده‌ركرد كه کاری پێویستیان لە باڵیۆزخانەی ئەمریکا لە بەغدا و کۆنسوڵخانەی ئەمریکا لە هەولێر نییە، نوێنه‌رایه‌تییه‌كانیان له به‌غدا و هه‌ولێر جێبهێڵن و بگه‌ڕێنه‌وه ئه‌مریكا.
وه‌زاره‌تی ده‌ره‌وه‌ی ئه‌مریكا، هۆكاری ده‌ركردنی ئه‌و فه‌رمانه‌ی بۆ ئه‌وه گه‌ڕاندوه‌ته‌وه كه میلیشیاكان هه‌ڕه‌شه‌ن بۆ سه‌ر هاوڵاتییانی ئه‌مریكا و رۆژئاواو به‌رژه‌وه‌ندییه‌كانییان.
هه‌ر له راگه‌یه‌ندراوه‌كه‌دا وه‌زاره‌تی ده‌ره‌وه‌ی ئه‌مریكا، به شێوه‌یه‌كی كاتی پێدانی ڤیزای له نوێنه‌رایه‌تییه‌كانی خۆی له عیراق و هه‌رێمی كوردستان راگرتووه.
ئه‌وه‌ش له‌كاتێكدایه رۆژی یەکشەممە 12ی ئایاری 2019، باڵیۆزخانه‌ی ئه‌مریكا له به‌غدا لە بەیاننامەیەکدا رایگه‌یاند" ئامۆژگاریی سەرجەم هاوڵاتیانی ئەمریکا دەکەین له زیادبوونی ئاڵۆزییەکان لە عیراق، بۆیە دەبێت لەو بارەیەوە ئاگاداربن".
باڵیۆزخانه‌كه داواشی لە هاوڵاتیانی وڵاتەکەی کردووە لەم کاتەدا سەردانی عیراق نەکەن، هاوكات داواشی لە هاوڵاتییانی خۆی لە عیراق كردوه بۆ هەر زانیارییەکی زیاتر سەردانی ماڵپەڕی باڵیۆزخانەکە بکەن لە بەشی خزمەتگوزاریی تایبەت بە هاوڵاتیانی ئەمریکا.
ناوبە ناو باڵیۆزخانەی ئەمریکا لە بەغدا هۆشداری دەداتە هاوڵاتیانی خۆی لە عیراق کە ئاگاداری خۆیان بن لە بوونی ئەگەری هێرشکردن بۆ سەر بنکە و بارەگاکانی وڵاته‌كه‌ی.
ئەو هۆشدارییە نوێیەی باڵیۆزخانەی ئەمریکا لە بەغدا لە کاتێکدایە، ئاڵۆزییەکانی نێوان واشنتن و تاران ڕۆژ لە دوای ڕۆژ لە پەرەسەندندایە و ژمارەیەک لە لێپرسراوان و پەرلەمانتارانی عیراقیش به‌پێویستی ده‌زانن بەغدا خۆی لە ئاڵۆزییەکانی نێوان ئێران و ئەمریکا بە دووربگرێت و خۆی نەکاتە لایەنێک لەو ناکۆکیانەدا.
PM:02:34:15/05/2019