هۆکاری هێرشەکەی ئەمرۆی هۆڵەندا ئاشکرابوو

‌گۆكمان تانیس

وێستگه‌ نیوزـ

ئێواره‌ی ئه‌مڕۆ دووشه‌ممه‌، پۆلیسی هۆڵه‌ندا هێرشبه‌ره‌كه‌ی شاری ئۆتریخت-ی ده‌ستگیركرد كه‌ له‌ وێستگه‌یه‌كی ترام وای ته‌قه‌ی كرد و سێ كه‌سی كوشت، دەریشکەوتوە کە هێرشبەرەکە تەقەی لە کەسێکی خۆی کردوە و کەسوکارەکەشی هەمان شتیان پشتڕاستکردوەتەوە.

پۆلیسی ئۆتریخت له‌ كۆنگره‌یه‌كی رۆژنامه‌وانیدا ده‌ستگیركردنی هێرشبه‌ره‌كه‌ی ئه‌مڕۆی راگه‌یاند و ئه‌وه‌ی سه‌باره‌ت به‌ هێرشبه‌ره‌كه‌ دوپاتكرده‌وه‌ كه‌ ناوی گۆكمان تانیس- ه‌ ته‌مه‌نی 37 ساڵه‌ و به‌ ره‌چه‌ڵه‌ك توركه‌.

هاوكات ریتگیر جیكین، داواكاری گشتیی شاری ئۆتریخت له‌ كۆنگره‌كه‌دا رایگه‌یاند كه‌ ده‌ستگیركراوه‌كه‌ تۆمارێكی تاوانی هه‌یه‌ و پێشتر له‌لایه‌ن هێزه‌ ئه‌منییه‌كانی ئه‌و وڵاته‌وه‌ ده‌ستگیركراوه‌.

دوای روداوەکەش سایتی دەیلی مەیڵ بڵاویانکردوە کە هێرشبەرەکە تەقەی لە کەسێکی خۆی کردوە و هۆکارەکەش "کێشەی خێزانی" بووە، هەڕەشەی ئەوەشی کردوە هەرکەس خۆی هەڵقورتێنێت، تەقە لەویش دەکات، کەسوکاری هێرشبەرەکەش لە تورکیاوە هەر هەمان شتیان وتوە و پشتڕاستیان کردوەتەوە کە تانیس تەقەی لە کەسێکی خۆی کردوە و کێشەکەی خێزانییە.

دوانیوه‌ڕۆی ئه‌مڕۆ دووشه‌ممه‌ له‌ چه‌ند ناوچه‌یه‌كی جیاجیای شاری ئۆتریخت-ی هۆڵه‌ندا کە دەکەوێتە نزیک سنوری ئەڵمانیا، لە هێرشێکی چەکداریدا روداوی ته‌قه‌كردن رویدا و لە ئاکامدا سێ کەس كوژران و 10ی دیکەش برینداربون.

له‌دوای روداوه‌كه‌ پۆلیسی هۆڵه‌ندا رایگه‌یاند كه‌ "پاڵنه‌ری تیرۆر" له‌پشتی ته‌قه‌كردنه‌كه‌وه‌یه‌ و پۆلیس و وێستگه‌یه‌كی تراموای گه‌مارۆدا كه‌ شوێنی سه‌ره‌كیی روداوی ته‌قه‌كردنه‌كه‌بوو، هاوكات ده‌سه‌ڵاتدارانی هۆڵه‌ندا ئاستی هه‌ڕه‌شه‌ی تیرۆرستییان بۆ به‌رزترین ئاست به‌رزكرده‌وه‌.


PM:08:39:18/03/2019


ئه‌م بابه‌ته 11916 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت